1 Taateenaꞌo 19 - Kafa Linguistics Project

Horeebi Guudooch Eliyaasi Keyo

¹ Akaabi ebi bullin Eliyaasi tuniyoon, keemechinaꞌo bullin goraadoona bi wuxoon Elizabeelich gettiye.

² Elizabeeliyoo, “Ebi keemechinaꞌo toommooch ne tuniitoommon, yaach ebi goora ne toommooch tuniyoo ta qayigaata, nuggisheenaꞌo ta toommooch ebin tuniibeete; ebinoo daakkibeete” iyaꞌa Eliyaas waan wocheyechon daachiihan.

³ Eliyaasiyoo shattiꞌi bi kasheen wodiyoyich, Yihudee showooch beeti Beershaab tiyii hammiye; bi aafee bushoon arooch echiihe.

⁴ Biyoo ikke heeyi gommon barahee daggoona hammiye. Aroochee ikke michi baatooch koteechii, “Doono Yeero, taach beddiye. Ta qaabbechinaꞌoyee beshaano taane. Ta kasheen daambe” iꞌi qollehe.

⁵ Biyoo are michi baatooch teeqqehe; tokketoo biin yechiye. Diqqoona maraakoo biin shuurikkiꞌi biich, “Tiyiree mame” iye.

⁶ Tiyii ciinniꞌi, ebiyoche bi qoyooch xaqqee gudooch kachiti koshonaa qondee ikke aacona beeton beeggiye. Maa uchiichii, wochinnoon tokketehe.

⁷ Doono Yeerichi maraakoo wochinnoon waa, biin shuurikkiꞌi, “Ne hammemmi gommo woho bi tunetoyich, tiyiree mame” iye.

⁸ Tiyiꞌi maahe; uchiinoo iye. Aree giidoona Doono Yeerichi guudooch, Kooreeb beddaahaa, aabbe areddoonaa aabbe xumoonon qaxiriye.

⁹ Arooch beeti xaqqee gofooch shaggiꞌi, arooch qeyiye. Aroochee Doono Yeeri biich, “Eliyaaso, hiniich amooniye ne hallaa beeto?” iye.

¹⁰ Biyoo, “Beshe Mawe Nuggishoo Doono Yeeri neech oogichaa qanaateto taane. Israꞌeeleenaꞌo neenna tookkii boonoshi giyiti wogoon biichitinaꞌone; ne deejjee gudeenaꞌon happitinaꞌone; ne keemechinaꞌonoo goraadoona wuxitinaꞌone. Ta ikkeeto baach, echeto taane. Taanoo wuxoyich qaawii beetinaꞌone” iye.

¹¹ Doono Yeeriyoo, “Guudi toommooch keyiree, Doono Yeeri ta aafooch neexebe” iye. Aroochee Doono Yeeri beshehe. Doono Yeeri aafoochaa ooge giidechi yongo guudinaꞌon boriye; ogooge xaqqeenaꞌonoo shiqiye; tunebaani Doono Yeeri yongee daggooch aalloone. Yongee hillooch showoo qewehe; tunebaani Doono Yeeri showee qewee daggooch aalloone.

¹² Showee qewee hillooch qaaqqoo waahe; tunebaani Doono Yeeri qaaqqee daggooch aalloone. Qaaqqee hillooch shaashikkee qaaro waayeehe.

¹³ Eliyaasiyoo ebin waayeꞌi, bi aafoon bi tahoona oppeechii, kechii xaqqee gofee kellooch neexehe. Aroochee, “Eliyaaso, hiniich amooniye ne hallaa beeto?” ii beeti qaaroon waayehe.

¹⁴ Biyoo, “Beshe Mawe Nuggishoo Doono Yeeri neech oogichaa qanaateto taane. Israꞌeeleenaꞌo neenna tookkii boonoshi giyiti wogoon biichitinaꞌone; ne deejjee gudeenaꞌon happitinaꞌone; ne keemechinaꞌonoo goraadoona wuxitinaꞌone. Ta ikkeeto baach, echeto taane. Taanoo wuxoyich qaawii beetinaꞌone” iye.

¹⁵ Doono Yeeriyoo biich, “Ne hilla wotteree, Damaasiqi gaꞌooch beeti barahooch hambe; arooch shagiree, Hazaheelin Sooriyee taatoo bi tunemmoyich huute.

¹⁶ Nimishi bushoo Yehin, Israꞌeelee taatoo bi tunemmoyich huute. Abeel Meholi katemee asho, Shafaaxi bushoo Elisayin ne keroon keemecho bi tunemmoyich, huute.

¹⁷ Hazaheelichi goraadoochee muricciton Yehi wuxemmone. Yehichi goraadoochee muricciton Elisayi wuxemmone.

¹⁸ Tawoo Israꞌeeleenaꞌo daggoochee shabaatte hume asheenaꞌon taach echiyemmo taane. Eboshi bulliyoo Baꞌaaloyich goyinneyaani, boonoshi noonoonoo Baꞌaaloochi shahalloon shumaani asheenaꞌone” iye.

Eliyaasi Elisayin Ceego

¹⁹ Ebina Eliyaasi aroochee tiyii hammiꞌi, Shafaaxi bushoo Elisayi aaraa gutte kashee gattoona gochii bi beetaa, ciireexi aaraa guttinnoon aroo bi qelloona gochii bi beetaa danehe. Eliyaasi aroona besheebee bi iddimoon bi toommooch duppiye.

²⁰ Elisayi gatteenaꞌon duppiichii Eliyaasin dabbii wocciye. Aroochee, “Ta nihoonaa ta indeenon diggii shumiree keyone; aroyee gubb neen dabbemmo taane” iye. Eliyaasiyoo, “Wotteree hambe; neen amo hallitote?” iye.

²¹ Elisayiyoo bi hilloochee wottehe; gutte gattoon daammii guuriꞌi, meenon gattee qiicoona kiijjiye. Asheenaꞌoyichoo immiye; boonoshiyoo maaheete. Biyoo tiyiꞌi, Eliyaasin dabbii hammiye; biichoo maddehe.