1 Taateenaꞌo 18 - Kafa Linguistics Project

Eliyaasinaa Baꞌaalee Keemechinaꞌonochi Mooyo

¹ Meeti aabo beshetoyee gubb, keejjinnee natooba, Doono Yeeri Eliyaasich, “Hamiree Akaabich bekkebe; showee toommooch amiyon dichemmo taane” iye.

² Ebich Eliyaasi Akaabich bekkeya hammiye. Ebiyooba Shamaaree showoo oogichii shaacetone.

³ Akaabiyoo taatee kechi ukkiroo tuneti Abidiyin ceeggiye. Abidiyi Doono Yeerin oogichii shattiibeeti ashoone.

⁴ Elizabeeli Doono Yeerichi keemechinaꞌon bi wuxiihooba, Abidiyi keemechi balle asheenaꞌon daammiꞌi, aachi aachoon gutte xaqqee gofooch aachiichii, koshonaa aaconon immii beehe.

⁵ Akaabiyoo Abidiyich, “Showee daggooch beeti aachi xuupho bullinaa bamboo bullinooch tiyiree hambe. Gijjeenaꞌo bulli ciyaachemmoyich, haresheenaꞌonaa bicereenaꞌonon no wodiyemmi mocoon diqqich danemmo noone” iye.

⁶ Ebich boonoshi hammemmi showoon qoodeeheete; Akaabi bi qell ikke badd, wotta Abidiyi bare badd hammiyeete.

⁷ Abidiyi hammii bi beetaa, gommoochaa Eliyaasi biinna danehe. Abidiyiyoo biin ariihe; baroona guufeechii, “Ta doono Eliyaaso, iberoon ebi halla neene?” iye.

⁸ Biyoo wochiꞌi, “Eeha taane. Hiniich ta beemon hamiree, ne doonoyich gete” iye.

⁹ Abidiyiyoo wochiꞌi, “Ne guuno taan bi wuxemmoyich, Akaabi kishooch beshii imma ne iyaabeeto, amoon ta gondetenane?

¹⁰ Beeyechi ne Nuggishoo Doono Yeeri beege! Ta doono neen qaawoyich, wochoon bi daachiyaani aagetoo woyee taatee showoo aalloone. Boonoshi showooch aallo ne tunoon boonoshi arichiihooba, neen daneyaaneenaꞌo boonoshi tunoon xiishoyich, boonoshin wogiitone.

¹¹ And ne, ‘Hamiree ne doonoyich, hiniich ta beemon gete’ iyine.

¹² Neyee giishechoon ta wokkemmona, Doono Yeerichi Ayaano ta ariyaani xaaꞌooch neen daammemmone. Ebina hammaa Akaabich ta getaa, neen bi muccegaata, taan wuxemmone. Ne guuno ta, ta bushittinoochee tiijjaꞌa Doono Yeerin shattaabeeto taane.

¹³ Ta doonocho, Elizabeeli Doono Yeerichi keemechinaꞌon bi wuxiihooba, amoon ta tuniito gaata waayeyaano neene? Doono Yeerichi keemechi balle asheenaꞌon daammaꞌa, aachi aachoon gutte xaqqee gofooch aachaachaa, koshonaa aaconon boonoshich immehoye.

¹⁴ And ne, ‘Hamiree ne doonoyich, hiniich ta beemon gete’ iyine. Biyoo taan wuxemmone” iye.

¹⁵ Eliyaasiyoo, “Bi aafooch neexaꞌa ta maddaabeeti, Beshe Mawe Doono Yeeri beege! Hanaach Akaabina danemmo taane” iye.

¹⁶ Ebich Abidiyi Akaab waan hammiꞌi biich gettiye. Akaabiyoo Eliyaasina daneya hammiye.

¹⁷ Akaabi Eliyaasin beeggiꞌi, “Israꞌeeleenaꞌon duꞌiya beetocho, ebi neene?” iye.

¹⁸ Eliyaasi wochiꞌi, “Israꞌeeleenaꞌon duꞌiyaabeeto, neennaa ne nihoochi kechi asheenaꞌonani, ta toono taane. Doono Yeerichi getoon qajjiyote; Baꞌaaleenaꞌonoo dabbiyote.

¹⁹ Andoo asheenaꞌo Qermeloosi guudoochaa taanna boonoshi danemmoyich Israꞌeelee asho bullich wochoon daachiibe. Elizabeeli madoochee maabeeti, awudde ballaa aache Baꞌaalee keemechinaꞌonaa nuggishee Asheerichi awudde balle keemechinaꞌona woyemmoyich tuniibe” iye.

²⁰ Ebich Akaabi Israꞌeelee asho bullich wochoon daachiihe; are keemechinaꞌonoo Qermeloosi guudooch kiciye.

²¹ Eliyaasi asheenaꞌo aafooch waaꞌi, “Mulloon guttiyoona shaami ittoshi beeyemmo, aati wottooniye? Nuggishoo, Doono Yeeri gaata, Doono Yeerich goyinne maddebote. Baꞌaalo gaata, Baꞌaaloyich goyinne maddebote” iye. Tunebaani asheenaꞌo ikke qaaroonona biich wochaaneenaꞌone.

²² Aroochee Eliyaasi asheenaꞌoyich, “Doono Yeerichi keemechinaꞌo daggoochee ta baach echeto taane. Tunebaani Baꞌaalee keemechinaꞌo awudde ballaa aacheenaꞌone.

²³ Gutte wuro nooch ichebe. Boonoshiyoo ikke wuron boonoshich kaaci guuribeete; bashi, quumoon maaci kichibeete; michi toommoochoo qeeneete. Tunebaani qaaqqoon shookkaayeete. Tawoo ohe wuron ebiyoommon qanniiree michi toommooch qeennemmo taane. Aroochoo qaaqqoon shoohaachemmo taane.

²⁴ Boonoshiyoo boonoshi nuggishoochi shigoon ceegeete. Tawoo Doono Yeerichi shigoon ceeggemmo taane. Waayeꞌi qaaqqoon deejjimmi nuggishoo, aroo Nuggishoone” iye. Asheenaꞌo bulliyoo wochiꞌi, “Ebi gaawe yibbaatoone” iyeete.

²⁵ Aroochee Eliyaasi Baꞌaalee keemechinaꞌoyich, “Meeto ittoshi tunetoyich, ikke wuron kaaciree shiichi qanniibote; ittoshi nuggishoochi shigoon ceegote; tunebaani arooch qaaqqoon shookkaahote” iye.

²⁶ Boonoshich icheti wuron daammiꞌi qanniiheete. Haroochee aabee daggemmi wottoon, “Baꞌaaloocho, no qolloon waayebe” iibee boonoshi nuggishoochi shigoon ceeggiyeete. Tunebaani qaareto, boonoshi qolloonoo waayeto aalloone. Boonoshi shuuneti deejjee gudee gaꞌoochaanoo yubbeheete.

²⁷ Aabee daggehaa Eliyaasi, “Nuggishoo bi tunetoyich, qaaroon oogichiree cookibote; diqqich gabooch giyiꞌi, woyee maach kechiꞌi, woyee gommo shaꞌee tunemmone. Woyee diqqich tokkete beeyemmone; shuurikkibote” iibee boonoshin cooqqiriye.

²⁸ Ebich ooge qaaroona cookiibee, boonoshi doyoommon boonoshi damoo oogichii ufemmi wottoon, boonoshi ashittinoon goraadoonaa cuboona qoccii mayii beeheete.

²⁹ Showoo beshetoyee gubb womikkee deejjoo giddeebeeti saatee wottoon geyee beeheete. Tunebaani qaareto, ebin aaxxiito, boonoshi qolloonoo waayeto aalloone.

³⁰ Eliyaasiyoo asheenaꞌoyich, “Ta waan giddebote” iye. Asheenaꞌo bulliyoo bi waan giddeheete. Biyoo happeeti, Doono Yeerichi deejjee gudoon wochinnoon shuunehe.

³¹ Aroochee Eliyaasi, “Ne shigo Israꞌeeli getteyemmone” iꞌi, Doono Yeeri gettiti Yaaqobi bushiisheenaꞌochi yoodee haddoommona, aaraa gutte xaqqoon deebiye.

³² Ebi xaqqeenaꞌona Doono Yeerichi shigoyich deejjee gudoon shuunehe; ebi deejjee gudee guudoona ikke baaretee aacon yechi bede oppoon iijjiye.

³³ Mixonoo qeenniye; wurochi meenon quumoona maaccii kichiichii, michi toommooch qeenniye. Aroochee asheenaꞌoyich, “Awudde baaretee ceeni aacon miccemmi deejjoonaa mixonochi toommooch tibibote” iye.

³⁴ Wottoo “Daakki tibibote” iye. Boonoshiyoo wochinnoon tibiyeete. “Keejjinnoon tibibote” iye. Boonoshiyoo keejjinnoon tibiyeete.

³⁵ Aaco deejjee gudee guudoona wocciye; oppoochoo ceenniye.

³⁶ Womikkee deejjee saato bedaa keemechi Eliyaasi giddeꞌi, “Abrahamichi Nuggishoo, Yisaaqichi Nuggishoo, Israꞌeelichi Nuggishoo Doono Yeero, ne, Israꞌeeleenaꞌo toommooch Nuggishoo ne tuno, tawoo ne guuno ta tuno, ebinoo ne qaaroona ta tuniyoo hanaach arichebe!

³⁷ Doono Yeero, Nuggishoo ne tunoon, boonoshi mulloon ne waan ne wochoonoo hini asheenaꞌo ariyemmoyich, ta qolloon waayebe; ta Doono Yeero, ta qolloon waayebe” iye.

³⁸ Bekkech Doono Yeerichi qaaqqoo kindiye; deejjoon, mixon, xaqqeenaꞌonaa showoonon maahe; oppee daggeexi aaconoo napphee shuuꞌiihe.

³⁹ Asheenaꞌo bulli ebin beeggii, baroona guufeechii, “Doono Yeeri, aroo Nuggishoone. Doono Yeeri, aroo Nuggishoone” iyeete.

⁴⁰ Aroochee Eliyaasi boonoshich, “Baꞌaalee keemechinaꞌon yeshote; boonoshiichee ikkolla muriccaaye” iye. Boonoshiyoo yechiyeete. Eliyaasiyoo Qishooni aacooch daammiꞌi, aroochaa boonoshin wuxiye.

Amiyo Dihoo

⁴¹ Eliyaasiyoo Akaabich, “Ooge amichi qaaro taach bi waayee beetoyich, tiyiree damba hambe; mame; uye” iye.

⁴² Ebich Akaabi maa ucha hammiye. Eliyaasiyoo Qermeloosi guudi toommooch kechiye. Bi qelloon bi gutenee daggooch geddiꞌi, showooch guufehe.

⁴³ Bi aafee bushoyich, “Hamiree baharo waan ciine” iye. Bi aafee bushoo hammii ciinniꞌi, “Arooch amolla aalloone” iye. Eliyaasiyoo hami bi beeggemmoyich shabaatte wottoon wochehe.

⁴⁴ Shabaattinnoochaa bi aafee bushoo, “Ebiyoche, ashi kisha bede giisheche qubee baharoochee kechaa beetine” iye. Eliyaasiyoo, “Hamiree, Akaabich, ‘Amiyo neen yeshaan beetaa, ne gaarin qanniiree desh kindibe’ gete” iye.

⁴⁵ Giisheche saatoyee gubb, quboonaa yongoonoochee tiyitona, shimaayoo manderehe; giidechi amiyoo dihiye. Akaabiyoo gaariich kechiꞌi, Yezireeli hammiye.

⁴⁶ Doono Yeerichi giidoo Eliyaasi toommooch waahe. Bi tahoon bi shimetooch cuchiichii, Yezireel beddaahaa, Akaabi aafooch shiichii wocciye.