1 Taateenaꞌo 17 - Kafa Linguistics Project

Eliyaasi Amiyo Dihaachemmo Tunoon Keemo

¹ Arooba Gilaadee showooch beeti, Tishibee asho Eliyaasi Akaabich “Biich ta maddaabeeti, beeyechi Israꞌeelee Nuggishoo Doono Yeeri beege! Amiyo dihemmoyich ta gettemmi wottoon, waabeeti natinaꞌooch amiyo woyee doshoo (caagibano) beetaachemmone” iye.

² Aroochee Doono Yeeri biich ishichiye:

³ “Hiniichee tiyiree, aabi-keyo waan hambe. Yoordaanoosi aacoochaa aabi-keyo waan beeti, Keriiti woce aaco beetooch aashebe.

⁴ Aacon aroochee uchemmo neene. Kurecheenaꞌoo maayoon neech arooch boonoshi deebemmoyich getteto taane” iye.

⁵ Ebich Doono Yeeri gettitoommon tuniihe; Yoordaanoosi aacoochaa aabi-keyo waan beeti, Keriiti woce aaco beetooch hammiꞌi kotehe.

⁶ Kurecheenaꞌoo koshonaa meenonon maaddoonaa womikkoona biich deebii beeheete. Aroocheenoo aacon uchii beehe.

⁷ Amiyo dihoo qajjitoyich, giishechoon yagiichii, are aaco tahiye.

Eliyaasinaa Sarefaatechi Xuume Ureena

⁸ Aroochee Doono Yeeri Eliyaasich ishichiye:

⁹ “Tiyiree, Sidooni gaꞌooch beeti Tsarefaata hami kotebe. Ebi aroochaa ikke xuume ure neech bi maanjemmoyich getteto taane” iye.

¹⁰ Ebina tiyii, Tsarefaata hammiye. Katemee kellooch shaggiꞌi, ikke xuume ure arooch kakkoo macaa beetin beeggiye. Biyoo areen ceeggiꞌi, “Ta uchemmi giisheche aacon qiicoona taach deebe” iꞌi qollehe.

¹¹ Aacon deeba bi hammaa beetee, daakkii ceeggiꞌi, “Giisheche koshin yeshi wobe” iꞌi qollehe.

¹² Ureyoo “Beeyechi ne Nuggishoo Doono Yeeri beege! Qondooch beeti, koppee ikke buddineenaa qullooch beeti zayitee cingeenoyee besh, kosho taach aalloone. And hiniich ta waato, giisheche kakkoon maci daamiree ebi areen taannaa ta bushoonoyich kachiyane; ebi areen no maatoyee gubb qitishiye no gettemmo” iyan.

¹³ Aroochee Eliyaasi biich “Shattaahine; hamiree ne gettetoommon tuniibe; tunebaani shiichiree areechee giisheche koshin kachiiree taach deebe. Ebiyee gubb, neennaa ne bushoonoyich kachiibe.

¹⁴ Israꞌeelee Nuggishoo Doono Yeeri ishichitone: ‘Amiyon showee toommooch Doono Yeeri ta, dichimmi aabooch beddaahaa, qondoochee buddino kuxeyaachemmone; qulloocheenoo zayito ciyaachemmone’ itone” iye.

¹⁵ Biyoo hammaꞌa Eliyaasi gettitoommon tuniihan. Ebina Eliyaasi, ureenaa bi kechi ashoona meeti aaboon maaheete.

¹⁶ Eliyaasina getteeti, Doono Yeerichi qaaroommon, qondoochee buddino, qulloocheenoo zayito ciyaanoone.

¹⁷ Ebiyee gubb, are kechi gennee tuneti xuume ureechi bushoo biiyehe. Bushoochi biiyo qaakkii qaakkii hammiꞌi, kashaanoon cikkimiye.

¹⁸ Ureyoo Eliyaasich “Yeeri ashoocho, amooniye neech ta hallito? Hiniich ne waato, ta axaaxoon shalligichiree ta bushoon wuxiyane?” iyan.

¹⁹ Eliyaasiyoo, “Ne bushoon taach imbe” iye. Bushoon bi sheenoochee deqqiꞌi bi beeti kechi toommeexi kexooch kichiye; bi qeenoochoo qeejjiye.

²⁰ Aroochee, “Ta Nuggishoo Doono Yeero, taan iibbiyaabeeti hini xuume ureechi bushoon wuxoona bi toommooch iritoon deebenne?” iꞌi Doono Yeer waan cookiye.

²¹ Bushoo toommooch keejje wottoon yappimiichii, “Ta Nuggishoo Doono Yeero, hini bushoochi kashe wottemmoyich neen qollehoye” iꞌi Doono Yeer waan cookiye.

²² Doono Yeeriyoo Eliyaasichi cookoon waayehe. Bushoochi kasheyoo wottahan; bushoo wodiye.

²³ Aroochee Eliyaasi bushoon kechi toommeexi kexoochee dechi kexooch kindiihe. Bushoochi indeyichoo “Ebiyoche, ne bushoo woditone” iꞌi immiye.

²⁴ Ureyoo Eliyaasich, “Yeer asho ne tunoon, ne noonoochee kechiti, Doono Yeerichi qaaro iberoo bi tunoonoo and ariiti taane” iyan.