1 Taateenaꞌo 13 - Kafa Linguistics Project

Yihudee Showoochee Waati Yeer Ashoochi Mooyo

¹ Yeroboꞌami ixaanoon shookka deejjee gudee gaꞌooch neexee bi beetaa, ikke Yeer asho Doono Yeeri gettiti qaaroona Yihudee showoochee Beeteel waahe.

² Ebi uro Doono Yeeri biich gettitoommon deejjee gudee toommooch bunneꞌi ishichiye: “Hini deejjee gudoocho, hini deejjee gudoocho, Doono Yeeri ishichiye: ‘Yosiyaasi getteebeeti bushoo Daawiti yaroochee shiijjemmone. Biyoo ne toommooch deejjoon deejjiibeeti, guudi toommeexi goyinnee xaaꞌee qeesheenaꞌon ne toommoochaa deejjemmone; asheenaꞌochi shaawushoonoo ne toommoochaa michemmone’ itone” iye.

³ Arooba ebi Yeer asho ishichiꞌi malletoon gettiye: “Doono Yeeri gettiti malletoo ebine: ‘Ebiyoche, hini deejjee gudo gaahemmone; bi toommooch beeti tulloo shacemmone’ itone” iye.

⁴ Taatoo Yeroboꞌamiyoo ebi Yeer asho deejjee gudee toommooch bunnee bi gettiton waayeꞌi, neexee bi beeti, deejjee gudee xaaꞌoochaa bi kishoona kochii bekkiiꞌi, “Yeshote” iye. Tunebaani uro toommooch bi yaggiti kishoo wogii echehe; qodonoo mawiihe.

⁵ Ebi Yeer asho Doono Yeerichi qaaroona gettiti malletoommon, deejjee gudo gaahehe; tulloo shacehe.

⁶ Aroochee Yeer ashoyich taatoo, “Taach ne Nuggishoo Doono Yeerin qollebe; ta kishoo wodemmoyich corootibe” iye. Ebich Yeer asho Doono Yeerin qollehe. Taatoochi kishoo wodiye; wonnee bi gooroochoo wottehe.

⁷ Yeer ashoon taatoo, “Tookki kexooch hambone; ta kexooch kashebe; wojjoonoo neech immemmo taane” iye.

⁸ Tunebaani Yeer asho taatoyich ishichiye: “Ne gaannee qaton taach ne immemmo gaatoona, neenna tookki hamaache. Hini xaaꞌoochaa koshon maataache; aaconoo uyaache.

⁹ Koshon ta maataachemmoyich, aacon ta uyaachemmoyich, ta waati gommonoo ta wotteyaachemmoyich, Doono Yeeri taach gettitone” iye.

¹⁰ Beeteel bi waati gommona tuneyaanoon, bare gommona wottee hammiye.

¹¹ Ebiyooba Beeteel koteti, keemechi ikke geene uro beehe. Bi bushiisheenaꞌo bi waan waaꞌi, arooba Yeer asho Beeteelaa bi tuniito bullin, wotta taatoyich bi gettitonoo boonoshi nihoyich gettiyeete.

¹² Boonoshi nihoo, “Bi hammiti gommo, aabinane?” iꞌi echehe. Boonoshiyoo Yihudee showoochee waati uro hammiti gommon boonoshi nihoyich bekkiiheete.

¹³ Ebich bi bushiisheenaꞌon “Taach kurooch koroon haxote” iye. Kurooch koroon boonoshi haxaa, yebbeꞌi,

¹⁴ are Yeer ashoon dabbiye. Aroochee ikke ooge michi baatooch kotee bi beetaa daneꞌi, “Yihudee showoochee waati, Yeer asho, neene?” iꞌi echehe. Uroo, “Eeha taane” iꞌi wochiye.

¹⁵ Are keemecho, “Taanna tookki kexooch waaree maayoon mame” iye.

¹⁶ Yeer asho ishichiꞌi biich wochiye: “Neenna tookki wotteree hamaache. Hini xaaꞌoochaanoo koshon neenna tookkiree maataache; aaconoo uyaache.

¹⁷ Hiniichaa koshon ta maataachemmonaa aacon ta uyaachemmonoyich, ta waati gommonoo ta wotteyaachemmoyich, Doono Yeeri taach gettitone” iye.

¹⁸ Tunebaani keemechi geene uro, “Tawoo neenoommi keemecho taane. ‘Koshon bi maayemmonaa aacon bi uchemmonoyich, wochiree ne kexooch biin deebe’ iꞌi maraakoo Doono Yeerichi qaaroona taach gettitone” iye; tunebaani bi ishichito, kootooniye.

¹⁹ Ebich Yeer asho biinna tookkii wotteꞌi, bi kexoochee koshon maahe; aaconoo uchiye.

²⁰ Madee toommooch boonoshi beetaa, Doono Yeerichi qaaro biin wochii deebiti keemechi geene uro waan waahe.

²¹ Biyoo Yihudee showoochee waati Yeer ashoyich ishichiye: “Doono Yeeri ishichiye: ‘Doono Yeeri ta qaaroon waayo ne qajjetoyich, ne Nuggishoo Doono Yeeri ta neech getteti getoon quyo ne qajjetoyich,

²² maayoon ne maataachemmonaa uyoon ne uyaachemmonoyich, neech ta getteti xaaꞌooch wottaa waaꞌa koshon maa aacon ne uchetoyich, ne dubeno ne qaabbechinaꞌochi maashooch shagaachemmone’ itone” iꞌi cookii gettiye.

²³ Ebi Yeer asho maa uchii bi itoyee gubb, biin wochii deebiti keemecho kurooch koroon biich haxxiye.

²⁴ Aroochee yebbeꞌi hammii bi beetaa, daaheroo gommoochaa biinna daneꞌi wuxiye; bi dubenoo gommooch yacheehe. Kuroo dubenee gaꞌooch neexee beehe. Wotta daaheroo dubenee gaꞌooch neexee beehe.

²⁵ Arooba gomma besheenaꞌo gommooch yacheeꞌi beeti dubenoonaa bi gaꞌooch neexeꞌi beeti daaheroonon beeggiyeete. Ebi asheenaꞌoo keemechi geene uro beeti katemooch waaꞌi, ebin yibbaateheete.

²⁶ Gommoochee biin wochii deebiti keemecho ebin waayeꞌi, “Ebi uro Doono Yeerichi getoon waayeyaani Yeer ashoone. Doono Yeeri bi gettitoommon daaheroyich beshiiꞌi bi imaa, biin tiichii wuxitone” iye.

²⁷ Aroochee bi bushiisheenaꞌon, “Kurooch koroon taach haxote” iye. Boonoshiyoo haxxiyeete.

²⁸ Aroochee hammiꞌi, gommooch yacheeꞌi beeti dubenoon, wotta kuroonaa daaheroona dubenee gaꞌooch neexeꞌi beetinaꞌon danehe. Daaheroo dubenoon maataanoone; kuroonoo tiishaanoone.

²⁹ Aroochee keemecho ebi Yeer ashoochi dubenoon tiijjiꞌi, kuree toommooch xaaniye. Eefiree duukka Beeteeli katemooch deebiye.

³⁰ Aroochee bi hajjee maashooch duukkiye. Boonoshiyoo, “Ye ta manoocho!” iibee eeppiyeete.

³¹ Boonoshi duukkitoyee gubb, bi bushiisheenaꞌoyich ishichiye: “Ta qitigaata, Yeer asho duukketi oppooch taan duuhote; ta shaawushoonoo bi shaawushee gaꞌooch kotiibote.

³² Beeteel beeti deejjee gudee toommooch, Shamaaree showeexi katemeenaꞌooch beeti guudi toommooch beeti goyinnee xaaꞌeenaꞌo bulli toommonoochoo, Doono Yeerichi qaaroona cookiꞌi bi gettiti mooyo iberoo ceennemmone” iye.

³³ Ebiyee gubboo tunetaa, Yeroboꞌami gonde bi gommoochee wotteyaanoone. Guudi toommeexi goyinnee xaaꞌeenaꞌooch boonoshi maddemmoyich, asheenaꞌo bulliichee qeesheenaꞌon ukkiriihe; qeeshoo tunoyich qaawito bullin guudi toommeexi goyinnee xaaꞌeenaꞌooch bi maddemmoyich ukkirii beehe.

³⁴ Ebi axaaxoo Yeroboꞌami kexo happeyemmonaa showee toommoochee bi aallemmonoyich naboo tunehe.