1 Taateenaꞌo 12 - Kafa Linguistics Project

Roboꞌami Toommooch Israꞌeeleenaꞌo Timo

¹ Roboꞌami Shekeem hammiye; ebiyoo Israꞌeeleenaꞌo bulli biin taatiiya arooch boonoshi kiceetoyichiye.

² Taatoo Solomooni aafoochee maxxeꞌi Gibits beeti, Nebaaxi bushoo Yeroboꞌami ebi mooyon waayeꞌi, Gibitsee wottee waahe.

³ Israꞌeeleenaꞌo bi waan wochoon daachiiꞌi biin ceekkiiheete. Aroochee Yeroboꞌaminaa Israꞌeelee iitoo bullina Roboꞌam waan waaꞌi, biich ishichiyeete:

⁴ “Ne nihoo magge waanjoon no toommooch minjitone. And illa, ne nihoo no toommooch maggiiti shuunoonaa no toommooch bi minjiti magge waanjoonon nooch ne kettiigaata, neech maddemmo noone” iyeete.

⁵ Biyoo boonoshich, “Hambote; hanaachi keejj ta waan wotteree wobote” iye. Ebina asheenaꞌo wotteꞌi hammiyeete.

⁶ Aroochee taatoo Roboꞌami “Ebi asheenaꞌoyich ama getiree wochibote?” iꞌi bi nihoo Solomooni kashoona beehooba, bi nihoyich maddeebee echeti, geeneenaꞌon echehe.

⁷ Boonoshiyoo, “Hanaach hini asheenaꞌoyich deꞌa iyaꞌa ne hajjee gaata, shiimoona boonoshin ne yibbaatiigaata, boonoshiyoo bulli yemeenoon neech hajjeeyeemminaꞌone” iꞌi wochiyeete.

⁸ Tunebaani Roboꞌami geeneenaꞌo ciicciti ciicoon qajjiichii, biinna tookkii dicciti, wotta bi aafooch neexee maddeebeeti gurimaasheenaꞌona tookkii koceehe.

⁹ Biyoo boonoshich, “ ‘Ne nihoo no toommooch minjiti waanjoon nooch kettiibe’ ii beeti asheenaꞌoyich ta wochemmoyich, taach ittoshi ciiccemmo, amooniye?” iye.

¹⁰ Biinna tookkii dicciti gurimaasheenaꞌo biich, “ ‘Ne nihoo no toommooch magge waanjoon minjitone. Ne, nooch kettiibe’ ii beeti asheenaꞌoyich ‘Ta qeexxe ta nihoochi shimetoyee beshe uureene.

¹¹ Ta nihoo magge waanjoon ittoshi toommooch minjitone; tunebaani ta, aroyee beshoon ittoshich maggiyemmo taane. Ta nihoo arengoona ittoshin xoobbitone; tunebaani ta, barahee machoona ittoshin xoobbemmo taane’ gete” iyeete.

¹² Taatoo, “Hanaachi keejj ta waan wotteree wobote” bi itoyich, Yeroboꞌaminaa asheenaꞌo bullina keejjinnee qemooba wotteꞌi waaheete.

¹³ Taatoo geeneenaꞌo ciicciti ciicoon qajjiichii, asheenaꞌoyich magge mooyon yibbaatehe.

¹⁴ Biyoo gurimaasheenaꞌochi ciicoon waayeꞌi, “Ta nihoo magge waanjoon ittoshi toommooch minjitone; tunebaani ta aroyee beshoon ittoshich maggiyemmo taane. Ta nihoo arengoona ittoshin xoobbitone; tunebaani ta, barahee machoona ittoshin xoobbemmo taane” iye.

¹⁵ Doono Yeeri Shiloohee asho Akiyina, Nebaaxi bushoo Yeroboꞌamich bi gettiti qaaroon ceechoyich, Doono Yeer waanaa maacheto bi tunetoyich, taatoo asheenaꞌo mooyon waayeyaanoone.

¹⁶ Israꞌeeleenaꞌo bulli taatoo boonoshi mooyon waayee qayon beeggiꞌi, ishichii wochiyeete: “Daawit waanee no danemmi mooyo amoone? Iseyi bushoo waanee no woraashemmi mooyo aalloone. Israꞌeeleenaꞌote, ittoshi duukkaani duukkaanooch wottebote; Daawito, and ne hajjee kexon quyebe” iyeete. Ebina Israꞌeeleenaꞌo boonoshi duukkaani duukkaanooch wotteheete.

¹⁷ Tunebaani Yihudee katemeenaꞌooch koteti Israꞌeeleenaꞌo toommooch Roboꞌami taatehe.

¹⁸ Aroochee taatoo Roboꞌami maddechinaꞌochi ukkiroo tuneti Adoraamin Israꞌeeleenaꞌo waan daachiihe; tunebaani Israꞌeeleenaꞌo bulli xaqqoona yexxiꞌi biin wuxiyeete. Taatoo Roboꞌamiyoo afaafinoona gaariich kechiꞌi, muriccii Yerusaalem hammiye.

¹⁹ Ebina Israꞌeeleenaꞌo hanaach beddaahaa Daawitichi yareenaꞌo toommooch hukkoon shuuneheete.

²⁰ Gibitsee Yeroboꞌami wottoon Israꞌeelee asho bulli waayeꞌi, boonoshi kiceeti xaaꞌooch bi woyemmoyich ceekkiiꞌi, boonoshi bulli toommooch biin taatiiheete. Yihudi yoodoyee besh, Daawiti kechi ashoon dabbito ikkolla aalloone.

Shemayaahi Keemmiti Keemo

²¹ Roboꞌami Yerusaalem waachii, Israꞌeeleenaꞌon koyiree, taatittinoon biich boonoshi wochemmoyich, Yihudi yoodee asho bullinaa Biiniyaami yoodoonoochee aricheti balli shinne hume ginee naayinaꞌon kiciye.

²² Tunebaani Yeer asho Shemayaahich Yeeri ishichiye:

²³ “Solomooni bushoo, Yihudee taatoo Roboꞌamich, Yihudi yoodo bullinaa Biiniyaami yoodo bullinoyich, echeti asheenaꞌo bullichoo, ishichibe:

²⁴ Doono Yeeri ishichiye: ‘Ebi mooyo ta waanee bi tunetoyich, ittoshi xibeenaꞌo tuneti Israꞌeeleenaꞌon koyoyich hammaahote; asho bi ikkikkoona bi kexi kexooch wottebe’ itone gete” iye. Boonoshiyoo Doono Yeerichi qaaroon waayeheete; Doono Yeeri gettitoommon, boonoshi kexi kexooch wotteheete.

Aachee Maamochi Misilo Beeteelinaa Daaninooch Neexo

²⁵ Aroochee Yeroboꞌami geppechi Efreemee showooch beeti Shekeem mishigoon shuuneꞌi arooch kotehe; wotta aroochee kechii hammii, Phiniꞌeel mishigoon shuunehe.

^26-27 Yeroboꞌamiyoo bi mulloona, “Hini asheenaꞌo deejjoon giddiyoyich Yerusaalem beeti, Doono Yeerichi yaafee kexooch boonoshi hamigaata, wochinnoon boonoshi mulloon boonoshi doono tuneti, Yihudee taatoo Roboꞌam waan wochemminaꞌone; taanoo wuxemminaꞌone; Yihudee taatoo Roboꞌam waan wottemminaꞌone. Taatittinoo Daawiti kechi asheenaꞌoyich wottemmone” iꞌi gabiye.

²⁸ Taatoo ebin asheenaꞌona tookkii bi boyeetoyee gubb, gutte maanji misiloon aachoochee shuuneꞌi asheenaꞌoyich, “Israꞌeeleenaꞌote, damba Yerusaalem ebichi wottoon ittoshi hammito beddiye. Gibitsee ittoshin kichiti nuggisheenaꞌo hinoshine” iye.

²⁹ Ikkoon Beeteel, wotta ohe ikkoon Daan neechiye.

³⁰ Asheenaꞌo maanji misiloyich goyinneya Beeteelinaa Daaninooch hammii beeheete. Ebin tuniyoona axaaxoon shuuneheete.

³¹ Yeroboꞌami guudinaꞌo toommooch kexinaꞌon shuunehe. Leweenaꞌo tuneyaani qeesheenaꞌon, asheenaꞌo bull daggoochee kaacciye.

³² Yihudee showoochaa baaroo baaree beetoommon, shimittinnee agenee aaraa uuchinnee qemooba, bi baareyemmon Yeroboꞌami tuniihe; deejjee gudoochoo deejjiye; bi shuuneti maaminaꞌochi misiloyich deejjoon deejjiye; ebi bullin Beeteelaa tuniihe. Guudi toommeexi goyinnee xaaꞌeenaꞌoyich bi kaacciti, qeesheenaꞌon Beeteel kotiihe.

³³ Baaree aabo bi tunemmoyich bi gettiti aabooba, ebiyoo shimittinnee agenee aaraa uuchinnee qemooba, deejjoon deejjoyich, Beeteel bi shuuneti deejjee gudooch hammiye; Israꞌeeleenaꞌoyich baaree aaboon tuniiꞌi bi maacciti ebi aabooba deejjee gudooch deejjoon deejjiye.