1 Taateenaꞌo 11 - Kafa Linguistics Project

Solomooni Doono Yeer Waanee Woho

¹ Taatoo Solomooni Farooni busheyee bareenaꞌon, meeti bare showee maacheenaꞌon, ebiyoo Moꞌabee maacheenaꞌon, Amoonee maacheenaꞌon, Edoomee maacheenaꞌon, Sidoonee maacheenaꞌonaa Hitee maacheenaꞌonon shunniye.

² Doono Yeeri Israꞌeeleenaꞌoyich “Ittoshi mulloon boonoshi nuggisheenaꞌo waan wochemminaꞌo boonoshi tunetoyich, boonoshina tookki shaageyaahote” bi iti aagetee maacheenaꞌon Solomooni kashkuxoon shunniye.

³ Biichoo taateenaꞌochi bushiisheenaꞌo tuneti shabaatte balle mecheenaꞌonaa keejje balle naamacheenaꞌona beetinaꞌone. Ebi bi mecheenaꞌo bi mulloon Yeer waanee bara wochiyeete.

⁴ Solomooni geenehooba, bi mecheenaꞌo bi mulloon, bare nuggisheenaꞌo waan wochiyeete. Solomooni, bi nihoo Daawitichoommon, bi mullo bi Nuggishoo Doono Yeerich gibeneeto tuneyaanoone.

⁵ Solomooniyoo Sidooneenaꞌochi nuggishee Ashitarootinaa Amooneenaꞌochi ciigiiti nuggishoo Milikoominoyich goyinnehe.

⁶ Ebina Solomooni Doono Yeeri aafooch gonde mooyon tuniihe. Bi nihoo Daawitichoommon, Doono Yeerin ceeni bi mulloona dabbaanoone.

⁷ Solomooni Yerusaalemaa aabi-keyo waan beeti guudi toommooch Moꞌabeenaꞌochi ciigiiti nuggishoo Kemooshinaa Amooneenaꞌochi ciigiiti nuggishoo Molookinoyich goyinnee xaaꞌoon shuunehe.

⁸ Boonoshi nuggisheenaꞌoyich ixaanoon shookkii, deejjoon deejjiibeeti, bare showee asheenaꞌo tuneti bi mecheenaꞌo bullichoo wotta ebiyoommon shuunehe.

⁹ Gutte wottoon biich bekketi, Israꞌeelee Nuggishoo Doono Yeer waanee bi mulloon bi wochitoyich, Solomoonin Doono Yeeri kaarehe.

¹⁰ Bare nuggisheenaꞌon bi dabbaachemmoyich biich bi gettitaanona, Doono Yeerichi getoon waayeyaanoone.

¹¹ Ebich Doono Yeeri Solomoonich ishichiye: “Ebin ne tuniitoyich, neech ta getteti ta wogoonaa ta doyoonon quyo ne qajjetoyich, ne taatittinoon ne kishoochee bogiree ne naayoyich immemmo taane.

¹² Tunebaani ne nihoo Daawiticha getiree, ne yemeenooch ebin tuniyaachemmo taane. Ne taatittinoon ta boggemmo, ne bushoo kishoocheeniye.

¹³ Tunebaani ta guuno Daawitinaa ta kaacceti Yerusaaleminoyicha getiree, taatittino bullin bogaachemmo taane. Ne bushoyich ikke yoodoon immemmo taane” iye.

Solomooni Toommooch Tiyiti Etteenaꞌo

¹⁴ Doono Yeeri Edoomee taatee yaroochee, Edoomee asho Hadaadin etto tuniiꞌi Solomooni toommooch tiijjiye.

¹⁵ Ebiyee aaf Daawiti Edoomeenaꞌona bi koyehooba, qititinaꞌon duukka waati, bi ginee iraashoo Yoꞌaabi Edoomee showooch beeti anaamo bullin wuxitone.

¹⁶ Yoꞌaabinaa Israꞌeelee ginee naayo bullina Edoomee showooch beeti anaamo bullin wuxii boonoshi ciichimmi wottoon, shiritte agenoon arooch kotetinaꞌone.

¹⁷ Tunebaani Hadaadi busheebee, Edoomee asheenaꞌo tuneti, bi nihoochi naayinaꞌona tookkii Gibits maxxehe.

¹⁸ Boonoshiyoo Miidiyamee showoochee tiyii, Faraanee barahooch hammiyeete. Faraanee barahoochee giisheche asheenaꞌon yechii, Gibitsee showooch, Gibitsee taatoo Faroon waan waaheete. Biyoo Hadaadich kexonaa maayoonon daaggiye; showoonoo biich immiye.

¹⁹ Farooniyoo Hadaadin gaawe aafoona ciinniye; ebich bi mechee gennee abeeti Xahifeneesichi maneen biich shaakkiihe.

²⁰ Xahifeneesichi manee, Genubaatin biich shiyahan. Ebi bushoon Xahifeneesi Farooni kexoochaa dichiyan. Genubaatiyoo Farooni bushiishoona tookkii dicciye.

²¹ Hadaadi Gibits beechii, Daawiti qitiꞌi bi qaabbechinaꞌo waan bi xaꞌeyoon, ginee iraashoo Yoꞌaabiyoo qitoon waayehe. Hadaadiyoo Faroonin “Ta showooch wotteree ta hammemmoyich daaggiibe” iye.

²² Tunebaani Farooni biich, “Ne showooch hamoyich ne qaawito, ta waanee amoon muccaꞌaaniye?” iye. Hadaadiyoo biich, “Amoonolla mucceyaano taane; ta hammemmoyich baach daaggibe” iye.

²³ Yeeri wotta Tsobaahee taatoo tuneti, bi doono Hadadezeer waanee maxxeti, Eliyaadi bushoo Rezoonin etto tuniiꞌi, Solomooni toommooch tiijjiye.

²⁴ Tsobaahee ginee naayinaꞌon Daawiti wuxitoyee gubb, Rezooni asheenaꞌon bi waan kiciꞌi bokkeeneꞌochi ukkiroo tunehe. Ebi asheenaꞌoo Damaasiqa hammiꞌi, arooch koteheete; Damaasiqaanoo biin taatiiheete.

²⁵ Hadaadi deebiti iritoyee baroo, Rezooni Solomooni kashoona beeti yemeeno bulliich Israꞌeeleenaꞌochi etto tunehe. Sooriyee showooch taatehe; Israꞌeeleenaꞌonoo tiyaarehe.

Yeroboꞌamich Doono Yeeri Gibenikkiti Gibeno

²⁶ Bi naayinaꞌoochee ikkoo, Efreemee showooch beeti Tsereedi katemee asho, Nebaaxi bushoo Yeroboꞌami taatoo Solomooni toommooch tiyiye. Bi indeyoo Tseruꞌaahi getteyaabeeti xuume ureene.

²⁷ Taatoo toommooch Yeroboꞌami tiyiti naboo ebine: Taatoo Solomooni Miiloo getteebeeti xaaꞌoon shuunii, bi nihoo Daawiti Katemee uxeree tiishoonoo dookkii beehe.

²⁸ Yeroboꞌami shuunee ariyechi ashoone. Solomooniyoo ebi gurimaashoo shuunoona galleteeto bi tunoon beeggiꞌi, Yooseefi yoodee showooch beeti maddechinaꞌo toommooch ukkiriihe.

²⁹ Ikke areddoon, Yeroboꞌami Yerusaalemee kechii bi hammii beetaa, Shiloohee asho tuneti, keemechi Akiyi gommoochaa biinna danehe. Areegaata, Akiyi andire qoreddoon taheꞌiniye bi beeto. Boonoshi guttoo baachiye gaddooch beeto.

³⁰ Akiyi bi taheti qoreddoon yechii, aaraa gutte beera keexxiye.

³¹ Aroochee Yeroboꞌamich ishichiye: “Aashire keexoon neech dambe; Israꞌeelee Nuggishoo Doono Yeeri ishichiye: ‘Solomoonichi taatittinoon bi kishoochee boggemmo taane; aashire yoodoon neech immemmo taane.

³² Tunebaani ta guuno Daawitinaa Israꞌeelee asho bulli daggoochee ta kaacceti Yerusaaleminoyicha getaa, ikke yoodo biich echemmone.

³³ Ebin ta tuniyemmoo, taan qajjiichii, Sidooneenaꞌochi nuggishee Ashitarootin, Moꞌabeenaꞌochi nuggishoo Kemooshinaa Amooneenaꞌochi nuggishoo Milikoominoyich goyinnee bi maddetoyichiye; wotta ta aafooch kaame mooyon tuniyoona, ta qociyoonaa ta getoonon quyoon, bi nihoo Daawiti ta gommona bi hamoommon, hamonoo bi qajjitoyichiye.

³⁴ “ ‘Tunebaani taatittino bullin bi kishoochee tiijjaachemmo taane. Ta qociyoonaa ta getoonon quyeti, ta kaacceti Daawiticha getiree, kashoona bi beeti yemeeno bulliich biin wulloo tuniyemmo taane.

³⁵ Tunetaa taatittinoon bi bushoochi kishoochee tiijjemmo taane; neechoo aashire yoodoon immemmo taane.

³⁶ Ta shigo arooch bi beeyemmoyich, ta kaacceti katemoo Yerusaalem, ta guuno Daawitich ceechoo bulli aaboon ta aafooch bi beeyemmoyich, bi bushoyich ikke yoodoon immemmo taane.

³⁷ Neen ta taatiitaa, ne qaawito bulli toommooch taatemmo neene; Israꞌeelee taatoo tunemmo neene.

³⁸ Ta guuno Daawitichoommon ta geto bullin ne waayegaata, ta gommona ne hamigaata, ta qociyoonaa ta getoonon quyoona ta aafooch kaame mooyon ne tuniigaata, neenna tookki tunemmo taane. Daawitichi taatittinoon ta manjiyoommon, ne taatittinoon manjiyemmo taane; Israꞌeeleenaꞌon neech immemmo taane.

³⁹ Ebina Daawitichi shiijjereenaꞌon xuuxiyemmo taane; tunebaani bulli yemeenoon toonoone’ itone” iye.

⁴⁰ Ebich Solomooni Yeroboꞌamin wuxiya qaawiye; tunebaani Yeroboꞌami Gibits maxxehe; Gibitsee taatoo Shishaaq waan hammiꞌi, Solomooni qitimmi wottoon arooch kotehe.

Solomooni Qitoo

⁴¹ Solomooni shuuneti eche shuunoo, bi tuniiti mooyo bullinaa bi ariyoona Solomoonichi kiinee macaafooch kooreetone.

⁴² Solomooni Yerusaalem beechii Israꞌeelee showoo bulliich bi taateto aabbe natone.

⁴³ Solomooni qitiꞌi bi qaabbechinaꞌo waan xaꞌeehe; bi nihoo Daawiti Katemooch duukkehe. Bi bushoo Roboꞌami bi xaaꞌooch kereeꞌi taatehe.