1 Taateenaꞌo 10 - Kafa Linguistics Project

Sheebee Taatee Solomoon Waan Womo

¹ Sheebee taatee Doono Yeeri Solomoonich immiti worganikkiti shalligoon waayaꞌa, turitoona biin phireya waahan.

² Meeti deennechon dabbiyaꞌa, qimaamoon, wodde aachoonaa aaxxe xaqqoonon gaaleenaꞌooch xaaniyaꞌa, Yerusaalem waahan. Solomoon waan giyaꞌa, bi mullooch beeti echo bullin biin echahan.

³ Solomooniyoo bi echeto bullin wochiye. Taatoo biishaani turito amolla aalloone.

⁴ Sheebee taatee Solomoonichi ariyoo bullin, bi haggiti taatee kexon,

⁵ bi madooch giddeebeeti maayoon, bi iraasheenaꞌochi kotee xaaꞌoon, bi maddechinaꞌochi shuunee qociyoonaa boonoshi tahoonon, bi xoofechinaꞌonaa Doono Yeerichi yaafee kexooch bi deejjiti, micciibeeti deejjoonon beeggaꞌa, kashkuxoon worganahan.

⁶ Biyoo taatoyich ishichiyan: “Ta showooch beechaa, ne shuuneti shuuneechonaa ne ariyeechonon ta waayeti woroo iberoone.

⁷ Tunebaani waaꞌa ta hajjee aafoona ebi mooyinaꞌon ta beeggemmi wottoon, iberiyaane taane. Iberoochaa qatonolla taach getaaneenaꞌone. Ne ariyoonaa ne gaannoona ta waayetoyee beshoone.

⁸ Ne asheenaꞌo am shaahe ixechinaꞌone! Bulli aaboon ne aafooch neexeꞌi, ariyoona ceenniti ne yibbaatoon waayeebeeti ne maddechinaꞌo am shaahe ixechinaꞌone!

⁹ Neenna emiriꞌi, Israꞌeelee taatee qeenooch neen kotiiti, ne Nuggishoo Doono Yeeri diireebe. Doono Yeeri Israꞌeeleenaꞌon bulli yemeenoon shunniꞌi, dayinnetoonaa cadiqittinoona ne qeejjemmoyich boonoshi toommooch neen taatiihe” iyan.

¹⁰ Aroochee taatoyich awudde hume kiilo giraam bede aachoon, dofee qimaamoonaa aaxxe xaqqoonon immahan. Sheebee taatee, taatoo Solomoonich immetoommi dofee qimaamo aroyee gubb ciroona waataanoone.

¹¹ Ofiiree showee aachoon deebiti, Kiraamichi markabeenaꞌo meeti naddee mixonaa aaxxe xaqqoonon wotta deebitinaꞌone.

¹² Taatoo naddee mixoochee Doono Yeerichi yaafee kexonaa bi taatee kexonochi daabboon, wotta shoddechinaꞌoyich giishi ximboonaa ooge ximboonon shuunehe. Hanaach beddaahaa ebiyoommi naddee mixo ciroona waataanoone; bekkeenoo ariyaanoone.

¹³ Taatoo Solomooni Sheebee taateyich, bi daaggoona bi immitoyee baroo, bi qaawito bullinaa bi waanee bi echeto bullinon immiye. Biyoo wottaꞌa, bi asheenaꞌona tookkaa bi showooch hammahan.

Taatoo Solomoonichi Gaannee Woddo

¹⁴ Solomoonich nati natooch giyiibeeti aachoo, hiyaa keejje hume kiilo giraam bedoone.

¹⁵ Ebiyoo giixechinaꞌo waanee, gabiyee guudeenaꞌo waanee, Arabee taateenaꞌo bullinaa woraaferasheenaꞌona waanee giyii beeton daakkaanooniye.

¹⁶ Taatoo Solomooni aachoon qichiiꞌi, gutte balle ogooge gaachoon shuunehe; ikkikke gaachooch giyito, shiritte balle sheqeelee aachoone.

¹⁷ Ebiyoommon wotta aachoon qichiiꞌi keejje balle gishiishi gaachoon shuunehe; ikkikke gaachooch giyito, gutte kiilo giraam bede aachoone. Taatoo eboshin Libanoosi Shaaroo getteebeeti taatee kexooch kotiihe.

¹⁸ Aroochee taatoo dangeyi gashoochee ooge taatee qeenon shuuniiꞌi, xalle aachoona dikkiihe.

¹⁹ Taatee qeenooch kecheebeeti shiritte daqqeenaꞌo beetinaꞌone. Taatee qeeno gubbi bi toommoochaa muumoone; ebi qeechi okkinaa hachinooch kishee degeenaꞌo beetinaꞌone. Ebi degeenaꞌochi gaꞌooch gutte daaheree misilo neexeꞌi beetone.

²⁰ Shiritte daqqooch, bi ikkikkoona yoochinaa qanninooch, ikkikke daaheree misilo neexetone. Ebiyoommi taatee qeeno amee taatee showoocholla ciroona shuunee ariyaanoone.

²¹ Taatoo Solomooni uchiibeeti xoofoo bulli shuuneeto, aachoocheeniye. Libanoosi Shaaroo getteebeeti taatee kechi qiico bulli shuuneeto, xalle aachoocheeniye. Solomoonichi taatee yemeenooch birewoo qallayeeto bi tunetoyich, birewoochee shuuneeti qiico ciroona aalloone.

²² Taatoyich Kiraamichi markabeenaꞌona tookkii baharee toommona tegiibee Tarisheshee showooch hammiibeeti giixee markabeenaꞌo beetinaꞌone. Ebi markabeenaꞌoo keejj keejje natooch ikke wottoon, aachoon, birewoon, dangeyi gashoon, shakkoonaa sheexxoonon deebii beeheete.

²³ Taatoo Solomooni showee toommeexi taateenaꞌo bulliyee beshiti gaannechonaa shalligechona tunehe.

²⁴ Yeeri biich immiti shalligoon waayoyich, showoo bulliich beeti asheenaꞌo Solomoonina danoyich qaawii beeheete.

²⁵ Boonoshiyoo boonoshi ikkikkoona nati natooch, birewee qiicoonaa aachee qiicoonon, tahoon, ginee qiicoon, qimaamoon, haresheenaꞌonaa bicereenaꞌonon wojjoon biich yechii waa beeheete.

²⁶ Solomooni gaarinaꞌonaa hareshechinaꞌonon kiciye. Ikke humaa awudde balle gaarinaꞌonaa aaraa gutte hume hareshechinaꞌona biich beetinaꞌone. Eboshinoo gaarinaꞌochi katemoonaa bi beeti Yerusaaleminooch boonoshi beeyemmoyich tuniihe.

²⁷ Taatoo, birewoo xaqqoochoommon Yerusaalem bi woddemmon tuniihe. Yigee mixonoo Shefeeli worebe showooch colleebeeti caaroochoommon bi woddemmoyich tuniihe.

²⁸ Solomooniyoo haresheenaꞌo Gibitsee showoonaa Quwee showoonoochee kemetaa boonoshi woyemmoyich tuniihe. Taatoochi giixechinaꞌo haresheenaꞌon Quwee showoochee kemeꞌi deebii beeheete.

²⁹ Ikke gaarich shiritte balle sheqeelee birewoon, ikke hareshoyich balli aache sheqeelee birewoon qocciꞌi Gibitsee deebii beeheete. Ebi taatoochi giixechinaꞌo wochiꞌi Hitee taateenaꞌonaa Sooriyee taateenaꞌonoyich kemmii beeheete.