1 Taateenaꞌo 1 - Kafa Linguistics Project

Daawitichi Geenee Yemeenooba Tuneti Mooyo

¹ Taatoo Daawiti geenee baayehe. Asheenaꞌo bullikkoon tajjitaa, biich qeecon qajjiye.

² Ebich bi asheenaꞌo biich ishichiyeete: “Taatoo no doonoyich gidiide bushee qaaweebuye; areyoo bi aafooch tuneree taatoon heetebuye. Taatoochi sheenooch qeyiree qeechibuye” iyeete.

³ Ebich Israꞌeelee showoo bulliichee gaawe malletechi busheen qaawiyeete. Shuneemee ashe Abishagin daneꞌi, taatoo waan deebiyeete.

⁴ Ebi busheyoo oogeton mallet gaawe busheene. Taatoo aafooch beeꞌa biin heetaa beehan; tunebaani taatoo biin qeyaanoone.

Adoniyaasi Taateya Qaawoo

⁵ Ebiyooba Hagiiti bushoo Adoniyaasi “Taatemmo taane” iꞌi tiyiye. Gaarinaꞌon, hareshechinaꞌonaa bi aafooch woccemmi aache asheenaꞌonon qanniihe.

⁶ Bi nihoo kashoona bi beeti yemeenooch, “Amoyich ebin tuniinne?” iꞌi ciroona biin kaaree ariyaanoone. Adoniyaasiyoo oogeton mallet gaawe ashoone; biyoo Abisoloomi hilloone.

⁷ Adoniyaasi Tseruuyichi bushoo Yoꞌaabinaa qeeshoo Abiyataarina tookkii koceehe. Boonoshiyoo Adoniyaasin dabbiꞌi biin gaacheheete.

⁸ Tunebaani qeeshoo Sadooqi, Yoyaadi bushoo Beenayi, keemechi Naataani, Shimeꞌi, Reꞌinaa Daawitichi quyee naayinaꞌona Adoniyaasina tookkii tuneyaaneenaꞌone.

⁹ Adoniyaasiyoo bageenaꞌon, wurinaꞌonaa gubbeneenaꞌonon En Rogeeli aachi xuuphee gaꞌooch beeti Zoheleeti Xaqqoochaa deejjiye. Bi maneenaꞌo tuneti taatoochi bushiishoo bullinaa taatoo iraashiiti Yihudee iraasheenaꞌo bullinon ceeggiye.

¹⁰ Tunebaani keemechi Naataanin, Beenayin, taatoochi quyee naayinaꞌonaa bi manoo Solomooninon ceegaanoone.

Solomooni Taatoo Tuno

¹¹ Aroochee Naataani Solomoonichi indee Baarshabich ishichiye: “No doono Daawiti ariyaanoon, Hagiiti bushoo Adoniyaasi taatoon waayeyaane neene?

¹² Andoo waaree, ne kashoonaa ne bushoo Solomooni kashoonon aabichiree ne wodiyemmo gaata, ta ciicoon waayebe.

¹³ Kaate taatoo Daawit waan hamiree, ‘Taatoo ta doonocho, ne gonnee taach “Ne bushoo Solomooni ta hillooch taatemmone; ta taatee qeenoochoo kotemmone” iyaa wogeyaano neene? Ishigaata, amoyich Adoniyaasi taatehe?’ gete.

¹⁴ Taatoyich ne geti beetaa, tawoo ne hillooch giyiree, ne gettetooch ceechemmo taane” iye.

¹⁵ Ebina Baarshabi taatoo waan gatooch giyahan. Taatoo oogichii geenetone. Shuneemee ashe Abishagiyoo biich maddaa beehan.

¹⁶ Baarshabiyoo showooch yittaꞌa taatoyich goyinnehan. Taatoo “Amooniye ne qaawaabeeto?” iye.

¹⁷ Biyoo taatoyich “Ta doonocho, ne gonnee taach ‘Ne bushoo Solomooni ta hillooch taatemmone; ta taatee qeenoochoo kotemmone’ iyaꞌa ne Nuggishoo Doono Yeerina wogeto neene.

¹⁸ Ebiyoche, and Adoniyaasi taatetone. Tunebaani taatoo ta doono ne ebi mooyon ariyaano neene.

¹⁹ Biyoo meeti wuron, gubbeneenaꞌonaa bageenaꞌonon deejjitone. Taatoochi bushiishoo bullin, qeeshoo Abiyataarinaa ginee iraashoo Yoꞌaabinon ceeggitone; tunebaani ne guuno Solomoonin ceegaanoone.

²⁰ Andoo taatoo ta doonocho, ne hillooch taatoo ta doono taatee qeenooch kotemmo konigaata boonoshich ne gettemmoyich, Israꞌeelee asho bulli aafo bi ciinniibeeto, neeniye.

²¹ Ebi tuno qayigaata, taatoo ta doono ne, kashaꞌa ne qaabbechinaꞌo waan ne xaꞌeehooba, taannaa ta bushoo Solomoonina gonde ashooch haddeyemmo noone” iyan.

²² Aroochee taatoona tookkaa yibbaatooch bi beetaa, keemechi Naataani waaꞌi giyiye.

²³ Taatoyich “Ebiyoche, keemechi Naataani waatone” iꞌi gettiyeete. Biyoo taatoo aafooch waa giyii, showooch guufeꞌi goyinnehe.

²⁴ Aroochee ishichiye: “Taatoo ta doonocho, ‘Adoniyaasi ta hillooch taatemmone; ta taatee qeenoochoo kotemmone’ ito neene?

²⁵ Hanaach desh kindiꞌi, meeti wuron, gubbeneenaꞌonaa bageenaꞌonon deejjitone. Taatoochi bushiishoo bullin, ginee iraashoo Yoꞌaabinaa qeeshoo Abiyataarinon ceeggitone. Ebiyoche, boonoshiyoo bi aafoochaa maa uchiibee, ‘Taatoo Adoniyaasi hume naton taatebe!’ ii beetinaꞌone.

²⁶ Tunebaani ne guuno taan, qeeshoo Sadooqin, Yoyaadi bushoo Beenayinaa ne guuno Solomooninon ceegaanoone.

²⁷ Ebi mooyo tuneto, ne hillooch taatoo ta doono taatee qeenooch kotemmo konigaata ne guuno nooch getaanoon, ta doono ne daaggeenane?” iye.

²⁸ Aroochee taatoo Daawitiyoo “Baarshabin taach ceegote” iye. Biyoo taatoo beetooch waaꞌa bi aafooch neexahan.

²⁹ Taatoo ishichiꞌi wogehe: “Ta kasheen iritoo bulliichee wodiiti Doono Yeeri beege!

³⁰ ‘Ne bushoo Solomooni ta hillooch taatemmone; ta keroon ta taatee qeenooch kotemmone’ iyaꞌa Israꞌeelee Nuggishoo Doono Yeerina neech ta wogetoommon, iberoon hanaach tuniyemmo taane” iye.

³¹ Baarshabiyoo showooch yittaꞌa taatoyich goyinnaachaa, “Taatoo Daawiti ta doono bulli yemeenoon kashoona beebe” iyan.

³² Taatoo Daawitiyoo “Qeeshoo Sadooqin, keemechi Naataaninaa Yoyaadi bushoo Beenayinon taach ceegote” iye. Boonoshiyoo waa taatoo aafooch neexeheete.

³³ Aroochee taatoo boonoshich ishichiye: “Ittoshi doono ta asheenaꞌon yeshi hambote; ta bushoo Solomoonin ta bicereen yebbiiree, desh Giyooni aachi xuuphooch daambote.

³⁴ Aroochaa qeeshoo Sadooqinaa keemechi Naataanina biin huutiree, Israꞌeeleenaꞌo toommooch taatiibeete; tiroon (waaringoon) hugibee, ‘Taatoo Solomooni hume naton taatebe!’ getote.

³⁵ Biin deeniree damba wobote; biyoo waaree, ta taatee qeenooch kotebe; ta keroon taatebe. Yihudee asheenaꞌonaa Israꞌeeleenaꞌonochi toommooch taatoo bi tunemmoyich biin kaacceto taane” iye.

³⁶ Yoyaadi bushoo Beenayi taatoyich ishichiye: “Ameena; taatoo ta doono ne Nuggishoo Doono Yeeri tunebe gete.

³⁷ Doono Yeeri taatoo ta doono neenna tookkii bi tunoommon, Solomoonina tookki tunebe. Bi taatee qeenonoo taatoo ta doono ne taatee qeenoyee beshoon tuniibe” iye.

³⁸ Ebich qeeshoo Sadooqi, keemechi Naataani, Yoyaadi bushoo Beenayi, taatoochi quyee naayinaꞌo tuneti Kereeteenaꞌonaa Feleeteenaꞌona desh hammiꞌi, Solomoonin taatoo Daawitichi bicereen yebbiiꞌi, Giyooni aachi xuuphooch deebiyeete.

³⁹ Qeeshoo Sadooqiyoo zayitee xoofoon danee duukkaanoochee deebiꞌi, Solomoonin huuttiye; tiroon huggiyeete. Asheenaꞌo bulliyoo “Taatoo Solomooni hume naton taatebe!” iyeete.

⁴⁰ Boonoshiyoo shumburoon huggii, oogichii cookii ililiibee, bi hillooch dabbii hammiyeete; boonoshi cookoochee tiyitona showoo shuuriye.

⁴¹ Adoniyaasinaa bi ceeggiti asheenaꞌona gifiroon maa uchii ciicha boonoshi bedooch, ebin waayeheete. Yoꞌaabiyoo tiree qaaroon waayeꞌi, “Katemoochee waayeebeeti, ebi dullee qaaro, amoone?” iye.

⁴² Ebin getooch bi beetaa, qeeshoo Abiyataari bushoo Yonaataani waahe. Adoniyaasiyoo “Ne gaawe asho neene; ne deebaabeeto gaawe worooniye; hach gibe” iye.

⁴³ Yonaataaniyoo Adoniyaasich ishichiye: “Gaawe woroo toonoone. Taatoo no doono Daawiti Solomoonin taatiitone.

⁴⁴ Biinna tookkii qeeshoo Sadooqin, keemechi Naataanin, Yoyaadi bushoo Beenayin, Kereeteenaꞌonaa Feleeteenaꞌonon taatoo daachiitone. Boonoshiyoo biin taatoochi bicereen yebbiitinaꞌone.

⁴⁵ Qeeshoo Sadooqinaa keemechi Naataanina Giyooni aachi Xuuphoochaa huuttiꞌi taatiitinaꞌone. Aroocheenoo emiroona kechiyeete. Katemoo bi dullito ebinane. Ittoshi waayeti qaaro ebine.

⁴⁶ Solomooni taatee qeenooch kotetone.

⁴⁷ Ebiyeenoo wotta taatoochi asheenaꞌo taatoo no doono Daawit waan waaꞌi, ‘Ne Nuggishoo Solomoonin neyee besh aricheton, bi taatee qeenonoo ne taatee qeenoyee beshoon tuniibe’ iꞌi biin diiritinaꞌone. Taatoo Daawitiyoo bi qeenoochaa Doono Yeerich goyinneꞌi,

⁴⁸ ‘Hanaach ta yaroochee ta taatee qeenooch kotemmon ta hajjee aafo beeggemmoyich tuniiti, Israꞌeelee Nuggishoo Doono Yeeri galleteebe’ itone” iye.

⁴⁹ Ebina Adoniyaasi ceeggiti asheenaꞌo keqqoona qeweheete; tiyii boonoshi kaatti kaatta shaceheete.

⁵⁰ Adoniyaasiyoo Solomoonin shattiye; tiyii hammiꞌi, deejjee gudee qareenaꞌon yechiye.

⁵¹ Asheenaꞌo Solomoonich, “Ebiyoche, Adoniyaasi neech shattiꞌi, ‘Taatoo Solomooni bi guuno taan goraadoona bi wuxaachemmoyich wogebe’ iꞌi deejjee gudee qareenaꞌon yechitone” iyeete.

⁵² Solomooniyoo ishichiye: “Bi shaaddoon bi tachigaata, bi qelli eexoochee ikkeyona showooch hollaachemmine. Tunebaani ikke gondo bi waanee danegaata, qitemmone” iye.

⁵³ Aroochee taatoo Solomooni asheenaꞌon wochetaa hammiꞌi deejjee gudoochee biin kindiiheete. Biyoo waaꞌi, taatoo Solomoonich yittii goyinnehe. Taatoo Solomooniyoo “Ne kexooch hambe” iye.