1 Saameeli 9 - Kafa Linguistics Project

Saaꞌoolinaa Saameelina Dano

¹ Arooba Qiishi getteebeeti, ikke aricheti uro beehe. Biyoo Biiniyaami yoodoochee tuneti Afihi bushoo, Bekoraati bushoo, Tseroori bushoo, Abiꞌeeli bushoone.

² Biichoo Saaꞌooli getteebeeti, mallet gaawe gurimaashe bushoo beetone. Israꞌeeleenaꞌo daggooch biinoommi mallet gaawe asho aalloone. Saaꞌooli neex genjoone; asho bulli bi gogoyee deshiye bi beeto.

³ Ikke areddoon Saaꞌooli nihoo Qiishichi kureenaꞌo aalleheete. Ebich Qiishi bi bushoo Saaꞌoolich “Aafee bushiisheenaꞌo daggoochee ikkoon yeshi hamiree kureenaꞌon qaawibe” iye.

⁴ Boonoshiyoo geppechi Efreemee showoonaa Shalishee showoonon besheheete; tunebaani daneyaaneenaꞌone. Shaꞌiliimee showoona besheheete; aroochoo mucceheete. Boonoshi hilla wotteꞌi, Biiniyaamee showoona besheheete; tunebaani andoo kureenaꞌon daneyaaneenaꞌone.

⁵ Tsuufee showooch boonoshi shaggimmona, Saaꞌooli bi aafee bushoyich “Ne waataa no hilla wottebone; ta nihoo kureenaꞌoyich gaboon qayiichi, nooch keqqi beeyemmone” iye.

⁶ Bi aafee bushoo Saaꞌoolich “Hini katemooch asheenaꞌo biin oogiibeeti, Yeer asho beetone. Bi gettito bulli iberoon ceennii beetone. Ne waataa bi waan hambone. Biyoo diqqich kureenaꞌon aabiichee no danemmo gaata nooch malletemmone” iye.

⁷ Saaꞌooliyoo bi aafee bushoyich “Bi waan no hamigaata, biich amooniye no immemmo? No kojjoochee shoho ciiretone. Yeer ashoyich no immemmi wojjoo nooch aalloone. Amo nooch beete?” iye.

⁸ Bi aafee bushoo Saaꞌoolich wochiꞌi, “Sheqeelee heeca bede xure birewee ta waan beetine. Areen Yeer ashoyich ta imaa, kureenaꞌon aabiichee no danemmo gaata nooch malletemmone” iye.

^9-11 Saaꞌooliyoo bi aafee bushoyich “Ebi gaawe gaboone. Ne waataa hambone” iye. Ebina Yeer asho beeti katemooch hammiyeete. Are katemooch shagoyich geppoon kechiibee, aacon kitta kechiibeeti maache bushiisheenaꞌona daneheete. Boonoshiyoo “Yaaꞌecho hini katemooch beete?” iꞌi echeheete. Wonna Israꞌeeleenaꞌo waanaa ikke asho Yeer waanee eche waayeya bi hamigaata, “Ittoshi waataa yaaꞌecho waan hambone” ii beetone. Ebiyoo keemecho, arooba yaaꞌecho bi gettee beetoyichiye.

¹² Maache bushiisheenaꞌo boonoshich wochiꞌi ishichiyeete: “Eeha, beetone. Ittoshiyee aaf hammiibeeto bi tunetoyich, kaate afaafine hambote. Asheenaꞌo hanaach guudi toommeexi goyinnee xaaꞌoochaa deejjoon giddiyemminaꞌo boonoshi tunetoyich, no katemooch bi waato, batt hanaachiye.

¹³ Katemooch ittoshi giyaahaa, mamoyich guudi toommeexi goyinnee xaaꞌooch bi hamaan beetaa, bekkech biin danemmo ittoshine. Deejjoon Yeeri diiremmoyich qollemmo biine; ebich bi waammi wottoon asheenaꞌo ciroona maataachemminaꞌone. Aroyee gubb ceekketi asheenaꞌo maayemminaꞌone. And kaateree hambote; biin bekkech danemmo ittoshine” iyeete.

¹⁴ Ebina boonoshiyoo katemooch hammiyeete. Katemooch giyii boonoshi beetaa, Saameeli guudi toommeexi goyinnee xaaꞌooch hamma, boonoshi beeto waan waahe.

¹⁵ Saaꞌooli Saameel waan waahoobee bi yiichich, Doono Yeeri Saameelich ishichiꞌi gettitone:

¹⁶ “Yaach ebi saatooch Biiniyaamee showoochee tuneti ikke uroon ne waan deejjemmo taane. Ta asheenaꞌo tuneti Israꞌeeleenaꞌo toommooch iraashoo bi tunemmoyich, bi shimbooch zayitoon huute. Biyoo ta asheenaꞌon Filsixeemeenaꞌo kishoochee wodiyemmone. Ta asheenaꞌochi xuuxoon beeggeto taane; boonoshin ta gaachemmoyich boonoshi cookiibeeti cookoon waayeto taane” itone.

¹⁷ Saameeli Saaꞌoolin beeggiye; Doono Yeeriyoo biich “Are neech ta getteti uro hinine. Ta asheenaꞌon qeejjemmo, biine” iye.

¹⁸ Aroochee Saaꞌooli katemee uxeree kellooch, Saameel waan giddeꞌi, “Yaaꞌecho kexo aabiich gaata taach gete” iye.

¹⁹ Saameeliyoo Saaꞌoolich ishichiye: “Yaaꞌecho geto, taane. Hanaach taanna tookki maayemmo ittoshi tunetoyich, and tayee shiichiree guudi toommeexi goyinnee xaaꞌooch hambe. Yaach maaddoona echeya ne waati mooyo bullin neech getiree kexooch ne wottemmoyich tuniyemmo taane.

²⁰ Keejje qemoyee aaf aalleti kureenaꞌoyich aaxxiyaahine; danetinaꞌone. Israꞌeeleenaꞌo oogichiꞌi qaawiibeeto, koniniye? Neennaa ne aabbi kechi asheenaꞌo bullinon toone?” iye.

²¹ Saaꞌooliyoo wochiꞌi, “Ta, Israꞌeelee yoodeenaꞌo daggoochee giishecho tuneti, Biiniyaami yoodee asho taane. Ebi Biiniyaami yoodo bulli daggoochee ta yaroo giishechoone. Ishigaata, aabichaꞌa ishin taach gettenne?” iye.

²² Saameeli Saaꞌoolinaa bi aafee bushoonon daammii ikke goddemmooch giijjiye. Ceegaa waati, shaasha bede asheenaꞌo daggooch daammii, oogee xaaꞌooch boonoshin kotiihe.

²³ Saameeliyoo maayee kachiyechon “ ‘Badd kotiibe’ iyaꞌa neech ta immeti meechi quumoon deebe” iye.

²⁴ Ebina maayee kachiyecho wochee meenon ikkot deebiꞌi Saaꞌooli aafooch geddiye. Saameeliyoo Saaꞌoolin “Ebeege; ebi neech koteti meenone; mame; ta ataalliti asheenaꞌona tookki ne maayemmoyich, and ebi saatoyich neech badd kotetone” iye. Ebina Saaꞌooli arooba Saameelina tookkii maahe.

²⁵ Aroochee guudi toommeexi goyinnee xaaꞌoochee katemooch dugilla hammiyeete. Saaꞌoolich kechi toommooch qeyi xaaꞌoo qannaa arooch tokketee qeyiye.

Saameeli Zayitoon Huuttiꞌi Saaꞌoolin Taatiyoo

²⁶ Boonoshiyoo yaaꞌoona tiyiyeete. Showoo bekkemmona, Saameeli Saaꞌoolin kechi toommoochee ceeggiꞌi, “Ne tiyaa neen gommon deeni beshiibona” iye. Ebina Saaꞌooli tiyaa, biinnaa Saameelina maaxooch kechiyeete.

²⁷ Katemee ciirooch boonoshi shaggimmona, Saameeli Saaꞌoolin “Ne aafee bushoo noyee aaf shiichi bi hammemmoyich gete” iye. Aafee bushoo hammimmona, Saameeli Saaꞌoolin “Ne, hiniich giishechoon ne yagaa, Yeeri gettiton neech getona” iye.