1 Saameeli 8 - Kafa Linguistics Project

Israꞌeeleenaꞌo Taatoo Taatemmoyich Qaawoo

¹ Saameeli bi geenetoyee gubb, bi anaami bushiisheenaꞌo Israꞌeeleenaꞌon boonoshi nalli qeejjemmoyich ukkiriihe.

² Bi gutenee bushoochi shigo Yoꞌeeli tunemmona, bi guuchoochi shigo wotta Abiyi getteehe. Boonoshiyoo Beershaab tuneꞌi nallii qeejjii beeheete.

³ Tunebaani bi bushiisheenaꞌo boonoshi nihoochi gommon dabbaaneenaꞌone. Boonoshiyoo gaacoon dano waan guuddiyeete. Xuccoon maabee dayinnetoon dabii beeheete.

⁴ Ebich Israꞌeeleenaꞌon qeejjiibeeti geeneenaꞌo bulla kicee, Saameel waan Raama waaꞌi,

⁵ biich ishichiyeete: “And ne, geeneto neene. Ne bushiisheenaꞌoo ne gommon dabbaaneenaꞌone. Ebich bare aageteenaꞌo bullichoommon noon qeejjemmi taatoon taatiibe” iyeete.

⁶ Asheenaꞌo “Noon qeejjemmi taatoon nooch taatiibe” boonoshi geto Saameelin emirikkaanoone. Ebich Doono Yeer waan corootiye.

⁷ Doono Yeeriyoo Saameelich ishichiye: “Boonoshi toommooch ta taateyaachemmoyich boonoshi qajjito taanani, neen toonoone. Ebich ebi asheenaꞌo neech gettiibeeti mooyo bullin elle waayebe.

⁸ Boonoshin Gibitsee ta kichiti aaboochee tiijjiꞌi hanaach beddaahaa taan qajjiichii, bare nuggisheenaꞌoyich goyinnee maddetinaꞌone. Ebi ne toommooch boonoshi tuniibeeto, ta toommooch boonoshi tuniitoommoniye.

⁹ Ebich boonoshi gettii beeton waayebe; tunebaani boonoshi toommooch taatemmi taatoo bi tuniyemmi mooyon getiree, boonoshin meeqqeqqiibe” iye.

¹⁰ Saameeliyoo Doono Yeeri gettito bullin taatoon boonoshich bi taatiyemmoyich echeti asheenaꞌoyich gettiye;

¹¹ ishichiinoo iye: “Ittoshi toommooch taatemmi taatoo bi tuniyemmi mooyo ebine: Ittoshi anaami bushiishoon daamiree, gaarinaa hareshoona ginee koyechinaꞌon tuniyemmone; bi gaari aafooch woccii beetinaꞌonoo tuniyemmone;

¹² boonoshin hume ginee iraasheenaꞌonaa aache ginee iraasheenaꞌonon tuniyemmone; bi goyoon gochechinaꞌonaa bi maayoon qeccechinaꞌonon tuniyemmone; wotta ginee qiicoonaa gaarichi qiicoonon shuunechinaꞌon tuniyemmone.

¹³ Ittoshi maache bushiisheenaꞌon daamiree, shittoon shuunechinaꞌonaa maayi kachiyechinaꞌonon tuniyemmone.

¹⁴ Beshe gaaweto tuneti, ittoshi goyee budon, woyinee goyee budonaa zayitee michi budonon deꞌiree bi naayinaꞌoyich immemmone.

¹⁵ Ittoshi maayoonaa woyinoonoochee asraatoon deꞌiree biyee deshi ukkireenaꞌonaa bi naayinaꞌonoyich immemmone.

¹⁶ Ittoshi guuninaꞌonaa gonneenaꞌonon, ebiyoommon wotta gaawi gaawe gurimaashe ittoshi bushiisheenaꞌonaa ittoshi kureenaꞌonon daamiree bi shuunoon boonoshi shuunemmoyich tuniyemmone.

¹⁷ Ittoshi bagoonaa emmishoonoochee asraatoon deqqemmone. Ittoshiyoo biich guunon tunemmo ittoshine.

¹⁸ Arooba ittoshich ittoshi kaacciti taatoochi naboona cookemmo ittoshine. Tunebaani arooba Doono Yeeri ittoshi cookoon waayeyaachemmone” iye.

¹⁹ Tunebaani asheenaꞌo Saameelichi yibbaatoon waayemmon qajjiichii, ishichiyeete: “Ebi tuneyaache; no qaawaabeeto, no toommooch taatemmi taatooniye.

²⁰ Nowoo wotta bare aageteenaꞌochoommon, noon qeejjemmi, ginee koyee xaaꞌoochaanoo no aafooch shiichemmi taatooniye no qaawaabeeto” iyeete.

²¹ Saameeliyoo asheenaꞌochi yibbaatoo bullin waayehe. Ebi aroonoo wochiꞌi Doono Yeerich gettiye.

²² Doono Yeeriyoo Saameelin “Boonoshi yibbaatoon waayebe; boonoshichoo taatoon taatiibe” iye. Aroochee Saameeli Israꞌeeleenaꞌo bullich “Ittoshi katemi katemooch wottebote” iye.