1 Saameeli 7 - Kafa Linguistics Project

¹ Qiriyaat Yeꞌariimi asheenaꞌo waaꞌi, Doono Yeerichi taabootoon daammiyeete. Aroochee geppechi katemooch beeti, Abinadaabi kexooch daammiyeete. Ebi taabootoon bi quyemmoyich, bi bushoo Elazaarin yaafiyeete.

Saameeli Woraaferashoo Tuneꞌi Israꞌeeleenaꞌon Qeejjoo

² Taabooto Qiriyaat Yeꞌariim bi kotetoochee tiijjiꞌi meeti yemeeno beshehe. Aroochoo hiye naton kotehe. Aroobee yemeenooch Israꞌeeleenaꞌo bulli ayinii tuummiꞌi Doono Yeer waan wotteheete.

³ Aroochee Saameeli Israꞌeeleenaꞌo bullich ishichiye: “Ibere mulloona Doono Yeer waan wottoon ittoshi qaawigaata, dallaawe nuggisheenaꞌonaa Ashitarooti misileenaꞌonon ittoshi waanee wokkiibote; ittoshi mulloonoo Doono Yeer waan wochibote; biich baach goyinne maddebote; biyoo Filsixeemeenaꞌo kishoochee ittoshin wodiyemmone” iye.

⁴ Ebina Israꞌeeleenaꞌo Baꞌaaleenaꞌonaa Ashitarootinochi shahalleenaꞌon boonoshi waanee wokkiiꞌi Doono Yeerich baach goyinnee maddeheete.

⁵ Saameeliyoo Israꞌeeleenaꞌo bullich wocheꞌi, “Mitsiphi katemooch kiceebote; tawoo aroochaa ittoshich Doono Yeerin qollemmo taane” iye.

⁶ Ebich Mitsipha kiceeheete. Aacon kittiꞌi Doono Yeerich ukkii deejjiyeete. Arooboo coomiyeete. Boonoshiyoo “Doono Yeerin xuqqeto noone” iyeete. Saameeliyoo Mitsipha tuneꞌi Israꞌeeleenaꞌo mooyon nallii beehe.

⁷ Israꞌeeleenaꞌo Mitsipha kiceyoon Filsixeemeenaꞌo waayeheete. Ebich Filsixeemee taateenaꞌo boonoshin kocha kechiyeete. Israꞌeeleenaꞌo ebin waayeꞌi oogichii boonoshi shattitoyich,

⁸ Saameelich “Filsixeemee asheenaꞌo kishoochee noon bi wodiyemmoyich, no Nuggishoo Doono Yeer waan kuxaanoon corootibe” iyeete.

⁹ Saameeliyoo xammiibeeti, ikke bagee bushoon daammii guuriꞌi, amolla echeyaanoon micciibeeti deejjoon tuniiꞌi Doono Yeerich deejjiye. Aroochee Israꞌeeleenaꞌon bi gaachemmoyich Doono Yeer waan corootiye. Doono Yeeriyoo bi corootoon waayehe.

¹⁰ Saameeli micciibeeti deejjoon bi deejjii beetaa, Filsixeemeenaꞌo Israꞌeeleenaꞌon kocha giddeheete. Tunebaani arooba Doono Yeeri xeeyoochoommon boonoshi toommooch gigeꞌi Filsixeemeenaꞌon keqqichiye. Israꞌeeleenaꞌo aafoocheenoo woce boonoshi aallemmoyich tuniihe.

¹¹ Israꞌeeleenaꞌo Mitsiphee kechiꞌi, Filsixeemeenaꞌon wuxiibee, Beet Kaari katemoon boonoshi beshiimmi wottoon boonoshin yookkii dabbiyeete.

¹² Aroyee gubb Saameeli ikke xaqqoon daammiꞌi, Mitsiphinaa Sheeninochi gutte daggooch neechiye. Biyoo “Hanaach beddaahaa Doono Yeeri noon gaachetone” iꞌi, aroon Ebenezeeri iꞌi shigiihe.

¹³ Ebina Filsixeemeenaꞌo hakkoo guuteeheete. Aroyee gubb wochinnoon Israꞌeeleenaꞌo showooch shagaaneenaꞌone. Saameeli kashoona bi beeti yemeeno bullin Doono Yeeri bi giidoon Filsixeemeenaꞌo toommooch bekkiihe.

¹⁴ Filsixeemeenaꞌo Israꞌeeleenaꞌo waanee deqqiti, Eqiroonee tiijjiꞌi Gaat beddaahaa beeti katemeenaꞌo Israꞌeeleenaꞌoyich wotteheete. Wotta Israꞌeeleenaꞌo ebi katemeenaꞌochi guudoona beeti boonoshi showoon Filsixeemeenaꞌo kishoochee wochiiheete. Arooba Israꞌeeleenaꞌonaa Amooreenaꞌonochi daggooch shunoo beetone.

¹⁵ Saameeli kashoona bi beeti yemeeno bullin Israꞌeeleenaꞌon nallii qeejjii beehe.

¹⁶ Biyoo nati natona Beeteeli, Galigalinaa Mitsiphinooch guuddiꞌi, arooch beeti Israꞌeeleenaꞌon nallii qeejjii beehe.

¹⁷ Aroochee bi kexo Raama bi tunetoyich, Raama wottee beehe. Aroochaanoo Israꞌeeleenaꞌo mooyon nallii qeejjii beehe. Biyoo Doono Yeerich deejjee gudoon Raama shuunehe.