1 Saameeli 6 - Kafa Linguistics Project

Israꞌeelee Showooch Yeerichi Taabooto Wotto

¹ Doono Yeerichi taabooto Filsixeemee showooch shabaatte agenoon kotehe.

² Filsixeemeenaꞌo qeesheenaꞌonaa kaayechinaꞌonon ceeggiꞌi, “Doono Yeerichi taabootoon aabichibona? Aabichiree bi showooch no wochemmo gaata nooch arichiibote” iyeete.

³ Boonoshiyoo ishichiyeete: “Israꞌeelee Nuggishoochi taabootoon ittoshi wochigaata, ittoshi xuꞌoyich tunemmi nummoona tookki daachiibotani, shokkoon daachiyaahote. Ebina ittoshiyoo wodemmo ittoshine. Biyoo amoyich ittoshin naxoochee wotteyaache bi ito gaata ariyemmo ittoshine” iyeete.

⁴ Asheenaꞌoo “Xuꞌoyich tunemmi, no daachiyemmi nummoo, amoone?” iꞌi echeheete. Boonoshiyoo ishichiyeete: “Ittoshinaa ittoshi taateenaꞌonon yexxiti naxo ikkoo bi tunetoyich, Filsixeemee taateenaꞌochi haddoona, gaaboon shaahiitaa aachoochee shuuneeti uuche mooyonaa aachoochee shuuneeti uuche iiccoonon daachiibote.

⁵ Gaabee misileenaꞌon, ittoshi showoon aalliibeeti iicceenaꞌochi misileenaꞌonoo shuuneree Israꞌeelee Nuggishoyich oogoon imbote. Ebin ittoshi tuniigaata, diqqich ittoshin, ittoshi nuggisheenaꞌonaa ittoshi showoonon naxoon qajjemmo tunemmone.

⁶ Gibitseenaꞌonaa Farooninochoommon, amoyichiye mulli manjoo ittoshi tuneebeeto? Israꞌeeleenaꞌon boonoshi gawukkaa boonoshi kechii hammito, Yeeri boonoshi kashoona bi kaachitoyee gubbiye.

⁷ “Andoo ikke andire gaarin qanniibote. Wotta waanjoo boonoshi qettooch haxxee ariyaani, xaachiibeeti gutte miinji indeenaꞌon deebiree are gaariich xandibote; tunebaani maanji bushiisheenaꞌon kexooch wochibote.

⁸ Doono Yeerichi taabootoon daamiree gaari toommooch kotiibote; xuꞌoyich tunemmi nummoyich ittoshi giddiiti, aachoochee shuuneeti misileenaꞌon saaxenooch gedi bi gaꞌooch kotiibote; aroochee bi shunnito waan bi hammemmoyich tuniichi,

⁹ manjii ciinote. Bi showoo waan, ebiyoo Beet Shemeesh waan bi hamigaata, ebi naxoon no toommooch deebito, Israꞌeelee Nuggishoone getone. Tunebaani ebi tuno qayigaata, hini mooyo no toommooch bi shaggito baad cikkiinani, bi noon naxetaa tunee bi qayon ariyemmo noone” iyeete.

¹⁰ Asheenaꞌo boonoshich getteetoommon tuniiheete. Xaachiibeeti gutte miinji indeenaꞌon daammii gaariich xandiichii, boonoshi maamon daammii kexooch hicciyeete.

¹¹ Doono Yeerichi taabootoon, aachoochee iicceenaꞌon shaahiitaa shuuneeti misileenaꞌonaa gaaboon shaahiitaa shuuneeti misileenaꞌonon yechiti saaxenoonoo gaari toommooch kotiiheete.

¹² Miiminaꞌoo Beet Shemeesh daammiibeeti gommon yechiꞌi, qanna yoocha getaanoon qaaddiibee aaf qaxiriyeete. Filsixeemee taateenaꞌo Beet Shemeesh boonoshi katinnimmi wottoon dabbii hammiyeete.

¹³ Arooba Beet Shemeeshi asheenaꞌo teepphoon qecciibee bambooch beeheete. Boonoshiyoo kaama ciinniꞌi taabootoon beeggiyeete. Ebina oogeton emiriyeete.

^14-15 Gaariyoo Beet Shemeesh beeti Yaasichi goyee xaaꞌooch waaꞌi, ikke ooge xaqqee gaꞌooch neexehe. Leweenaꞌo Doono Yeerichi taabootoonaa biinna tookkii beeti, aachoochee shuuneeti misileenaꞌon yechiti saaxenoonon kindiiꞌi are ooge xaqqee toommooch kotiiheete. Beet Shemeeshi asheenaꞌo gaari shuuneeti mixon baddeꞌi, miiminaꞌon guurii, micciibeeti deejjoon tuniiꞌi Doono Yeerich deejjiyeete. Aroochee daakkiꞌi micciibeeti deejjoonaa bare deejjoonon Doono Yeerich deejjiyeete.

¹⁶ Uuche Filsixeemee taateenaꞌo ebin boonoshi beeggitoyee gubb, arooba Eqiroon wotteheete.

¹⁷ Filsixeemeenaꞌo boonoshi xuꞌoyich tunemmi, aachoochee gaaboon shaahiitaa shuuneeti nummoon Doono Yeerich boonoshi daachiito, ikkoon Ashidoodich, ikkoon Gaazich, ikkoon Ashiqeloonich, ikkoon Gaatinaa wotta ikkoon Eqirooninoyichiye.

¹⁸ Wotta aachoochee shuuneeti iicceenaꞌon uuche Filsixeemee taateenaꞌo qeejjiibeeti katemeenaꞌochi haddoommona daachiiheete. Ebi katemeenaꞌo Doono Yeerichi taabootoon boonoshi kotiiti ooge xaqqo beetooch beddaahaa beeti, xaqqee uxerechi katemeenaꞌonaa xaqqee uxeraalli, gishiishi katemeenaꞌonane. Ebi ooge xaqqo hanaach beddaahaa Beet Shemeesh beeti Yaasichi goyee xaaꞌooch beetone.

¹⁹ Doono Yeerichi taabootee maac boonoshi ciinnitoyich, Beet Shemeeshi asheenaꞌoochee Yeeri shabeenaꞌon wuxiye. Doono Yeeri ebi shaahoon asheenaꞌon bi wuxitoyich, asheenaꞌo eeppii tuummiyeete.

²⁰ Ebina Beet Shemeeshi asheenaꞌo “Ebi Yaafe Nuggishoo Doono Yeeri aafooch neexoon hakkemmo, konine? No waanee bi wokkemmoyich, taabootoon koni waaniye no daachiyemmo?” iyeete.

²¹ Qiriyaat Yeꞌariimi katemooch beeti asheenaꞌo waan wocheyechinaꞌon daachiiꞌi ishichiyeete: “Filsixeemee asheenaꞌo Doono Yeerichi taabootoon wochitinaꞌone; no waan waaree, damba ittoshi katemooch daambote” iyeete.