1 Saameeli 5 - Kafa Linguistics Project

Taabootee Naboona Filsixeemeenaꞌo Toommooch Shaggiti Mooyo

¹ Filsixeemeenaꞌo Yeerichi taabootoon boonoshi keccitoyee gubb, Ebenezeeree Ashidood shaaggiꞌi daammiyeete.

² Boonoshiyoo Yeerichi taabootoon daammiꞌi, boonoshi nuggishoo Daagoonichi yaafee kexooch geddiyeete; Daagooni gaꞌoochoo kotiiheete.

³ Ashidoodi asheenaꞌo dechara maaddoona tiyii ciinniꞌi, Daagooni Doono Yeerichi taabootee aafooch, showooch guufeꞌi beeton beeggiyeete. Aroochee tiijjiꞌi bi xaaꞌooch wochii neechiyeete.

⁴ Bi dechara maaddoona tiyiꞌi ciinniꞌi, Daagooni andoo Doono Yeerichi taabootee aafooch, showooch guufeꞌi beeton beeggiyeete. Bi qelloonaa bi gutte kishoona kuxeꞌi kellee gaakkooch holliichaa, echeto bi duboo baachiye.

⁵ Ebich Daagoonichi qeesheenaꞌonaa bi yaafee kexooch giyii beetinaꞌo bullina hanaach beddaahaa boonoshi besheebeeto, Ashidood beeti Daagooni kechi kellee gaakkoon neexaanoon shaaddeꞌiniye.

⁶ Doono Yeeri Ashidoodi asheenaꞌon naxeꞌi oogichii keqqichiye. Boonoshinaa boonoshi guudoona beeti asheenaꞌonon gaabee biiyoona yexxiye.

⁷ Ashidoodi asheenaꞌo ebin boonoshi beeggiyooba, ishichiyeete: “Israꞌeelee Nuggishoo noonnaa no nuggishoo Daagooninon naxetone. Ebich taabooto no waan beeyaaye” iyeete.

⁸ Ebina Filsixeemee taateenaꞌo bullin boonoshi waan ceeggii ikkooch kiciꞌi, “Israꞌeelee Nuggishoochi taabootoon aabichibona?” iyeete. Boonoshiyoo “Israꞌeelee Nuggishoochi taabootoon Gaat daambote” iyeete. Ebich Israꞌeelee Nuggishoochi taabootoon Filsixeemeenaꞌochi bare katemoo tuneti Gaat daammiyeete.

⁹ Arooch boonoshi daammitoyee gubb, Doono Yeeri are katemeexi asheenaꞌon naxehe. Boonoshi toommoochoo oogeti keqqoon deebiye. Giisho oogoo getaanoon, are katemeexi asheenaꞌo toommooch gaabee biiyoon deebiꞌi boonoshin yexxiye.

¹⁰ Ebich Yeerichi taabootoon Filsixeemeenaꞌochi bare katemoo tuneti Eqiroon daachiiheete. Tunebaani Yeerichi taabooto Eqiroon waammona, are katemeexi asheenaꞌo “Israꞌeelee Nuggishoochi taabootoon no waan boonoshi deebito, noonnaa no asheenaꞌonon wuxii aalliyoyichiye” iꞌi cookiyeete.

¹¹ Yeeri boonoshin oogichiꞌi bi naxetoyich, wotta qitoo katemoo bullin woddiiꞌi bi keqqichitoyich, asheenaꞌo Filsixeemee taateenaꞌo bullin ceeggii kiciꞌi ishichiyeete: “Israꞌeelee Nuggishoochi taabootoon daachiibote; noonnaa no asheenaꞌonon bi wuxaachemmoyich, bi xaaꞌooch wottebe” iyeete.

¹² Qitoochee muriccitinaꞌon gaaboo oogichiꞌi bi qaakkiitoyich, are katemeexi asheenaꞌo cookoo shimaayooch kechiye.