1 Saameeli 31 - Kafa Linguistics Project

Saaꞌoolinaa Bi Bushiisheenaꞌona Qitoo

¹ Arooba Filsixeemeenaꞌo Israꞌeeleenaꞌon kochiyeete. Israꞌeeleenaꞌo boonoshi aafoochee wocee aalleheete. Meetinaꞌo Giliboꞌi geppoochaa koyaa qitiyeete.

² Filsixeemeenaꞌo Saaꞌoolinaa bi bushiisheenaꞌonon yookkii dabbiyeete. Boonoshiyoo Saaꞌoolichi keejje bushiisheenaꞌon, eboshiyoo Yonaataanin, Abinadaabinaa Malkishuwinon wuxiyeete.

³ Koyoo Saaꞌooli toommooch kupphee kupphee hammiye. Shangechinaꞌo biin qaakkii kochii mayiiheete.

⁴ Saaꞌooli bi quyee naayon “Hini dokireyaaneenaꞌo waaree ta kashoona kaachemminaꞌone; ebiyee ne goraadoon kaaciree, ne taan koye” iye. Tunebaani bi quyee naayo oogichiꞌi bi shattitoyich, ebin tuniyoon qajjiye. Ebich Saaꞌooli bi goraadoon kaacciꞌi aree toommooch taachehe.

⁵ Bi quyee naayo Saaꞌooli qitoon beeggiꞌi, biyoo ebiyoommon bi goraadee toommooch taacheꞌi, biinna tookkii qitiye.

⁶ Saaꞌooli, keejje bi bushiisheenaꞌo, bi quyee naayonaa bi asheenaꞌo bullina arooba qitiyeete.

⁷ Yezireeli bambee beqachinaa Yoordaanoosi aachee beqachinooch beeti Israꞌeeleenaꞌo, Israꞌeelee ginee naayo bulli wocee aalloon, wotta Saaꞌoolinaa bi bushiisheenaꞌona qitoon waayeꞌi, boonoshi katemi katemoon duppii wocee aalleheete. Filsixeemeenaꞌo waaꞌi are katemeenaꞌooch koteheete.

⁸ Bi dechara Filsixeemeenaꞌo dubenee toommoochee gaacechi mooyon shooti daamma waaꞌi, Saaꞌoolinaa keejje bi bushiisheenaꞌonochi dubeno Giliboꞌi geppooch qeyiꞌi beeton daneheete.

⁹ Boonoshiyoo Saaꞌoolichi qettoon kuxxiyeete; bi ginee qiicoon shoottiyeete. Aroochee ebi mishiraachoon hamiree shahalleenaꞌo beeti kexoochaa, wotta boonoshi asheenaꞌoyich boonoshi gettemmoyich Filsixeemee showoo bulliich wocheyechinaꞌon daachiiheete.

¹⁰ Bi ginee qiicoonoo boonoshi nuggishee Ashitarooti yaafee kexooch kotiiheete. Bi dubenoonoo Beet Shani katemee xaqqee uxerooch yooddiyeete.

¹¹ Filsixeemeenaꞌo Saaꞌooli toommooch tuniiton Gilaadee showooch beeti Yabeeshi asheenaꞌo waayeꞌi,

¹² ginee anaaminaꞌo tiyii, xumo bullin shaꞌeebee Beet Shan hammiyeete. Boonoshiyoo Saaꞌoolichi dubenoonaa bi bushiisheenaꞌochi dubenoonon xaqqee uxeroochee kindiiꞌi, Yabeesh deebii, aroochaa qaaqqoona goggiyeete.

¹³ Aroochee boonoshi shaawushoon daammiꞌi, Yabeesh beeti tamariskee michi xepphooch duukkiyeete. Shabaatte qemonoo coomiyeete.