1 Saameeli 30 - Kafa Linguistics Project

Amaleeqeenaꞌo Tsiqilaagin Michii Aalliyoo

¹ Daawitinaa bi asheenaꞌona keejjinnee qemooba Tsiqilaag boonoshi shaggaahaa, Amaleeqeenaꞌo Negeeb beeti Yihudee showoonaa Tsiqilaaginon kochitinaꞌone; Tsiqilaaginoo qaaqqoona michitinaꞌone.

² Maacheenaꞌonaa arooch beeto bullinon giisho oogoo getaanoon kecciyeete. Keccii daamoyee besh ikkoonolla wuxaaneenaꞌone.

³ Daawitinaa bi asheenaꞌona katemooch boonoshi shaggaahaa, katemoo qaaqqoona miccii aalletone; wotta boonoshi mecheenaꞌo, boonoshi anaami bushiishoonaa maache bushiishoona kecceꞌi hammitinaꞌone.

⁴ Ebich Daawitinaa biinna tookkii beeti asheenaꞌona boonoshi qaaroon oogichiꞌi, kashoon boonoshi guuteemmi wottoon eeppiyeete.

⁵ Daawitichi gutte mecheenaꞌo, eboshiyoo Yezireelechee Akinoꞌaminaa Qermeloosechi Naabaali mechee, Abigelina wotta kecaa hammitinaꞌone.

⁶ Asheenaꞌo biin xaqqoona yexxa boonoshi itoyich, Daawiti oogeton xuuxehe. Ebiyoo asheenaꞌo boonoshi anaami bushiisheenaꞌonaa maache bushiisheenaꞌonochi naboona mooyo boonoshich bi caammitoyichiye. Tunebaani Daawiti bi Nuggishoo Doono Yeerina kupphehe.

⁷ Aroochee Daawiti Ahimeleeki bushoo, qeeshoo Abiyataarin “Eke efoodoon taach deebe” iye. Abiyataariyoo deebiye.

⁸ Daawitiyoo “Ebi bokkeenaꞌon yoohi dabbibota? Dabbiree boonoshin yechehote?” iꞌi Doono Yeer waan corootiye. Doono Yeeriyoo “Yoohi dabbibe; boonoshin yeshiree keccetinaꞌon wochemmo neene” iye.

⁹ Ebina Daawitinaa biinna tookkii beeti shiritte balle asheenaꞌona tiyiꞌi, Besoori aacooch hammii shaggiyeete. Boonoshi daggoochee ikkikkeenaꞌo arooch echeheete.

¹⁰ Daawitinaa awudde balle asheenaꞌona yookkii dabbiyeete. Tunebaani gutte balleenaꞌo oogeton boonoshi maraatetoyich are Besoori aacon kimon hakkaaneenaꞌone.

¹¹ Daawitina tookkii beeti asheenaꞌo ikke Gibitsee ashoon gommoochee daneꞌi Daawit waan deebiyeete. Biichoo bi maayemmi maayoonaa aaconon immiyeete.

¹² Ebiyoommon wotta balaasee michi aafee nuuphoochee giishechoonaa shuuqqiti gutte woyinee aafee yuunjoonon biich immiyeete. Biyoo ebin maaꞌi kupphehe; keejje areddoonaa keejje xumoonon amoonolla maataanoone.

¹³ Daawitiyoo biin “Ne doono, konine? Ne showoo, aabiichiye?” iꞌi echehe. Biyoo “Ta Gibitsee asho taane. Wotta ikke Amaleeqoochi guuno taane. Ta biiyetoyich keejje qemoyee aaf ta doono hiniich taan duppiichii hammiye.

¹⁴ Nowoo Negeebi barahooch beeti Kereetee showoon, Yihudee showoonaa Kaaleebichi showoonon kochehone. Tsiqilaaginoo qaaqqoona michiyone” iye.

¹⁵ Daawitiyoo “Ebi are bokkeenaꞌo beetooch taan daami shaggiyenne?” iꞌi echehe. Uro wochiꞌi, “Taan wuxaachemmo ne tunoonaa ta doono kishooch beshiiree taan imaachemmo ne tunoonon Yeerichi shigoona ne wogegaata, boonoshi beetooch neen daami shakkiyemmo taane” iye.

Daawiti Amaleeqeenaꞌon Kochii Wochoo

¹⁶ Are Gibitsee asho Daawitin daammii shakkiihe. Areegaata, are bokkeenaꞌo Filsixeemee showoonaa Yihudee showoonoochee kecciꞌi boonoshi deebiti mooyoochee tiyitona emiree baaroon geddii duubbiibee, xaaꞌi xaaꞌoona shaceꞌi maa uchii beeheete.

¹⁷ Daawitiyoo showee haroochee tiijjiꞌi xumemmi wottoon boonoshin kochiye. Gaaleen yebbeꞌi muricciti awudde balle gurimaasheenaꞌoyee besh, boonoshi daggoochee muriccito aalloone.

¹⁸ Daawitiyoo Amaleeqeenaꞌo keccii daammiti mooyo bullinaa bi gutte mecheenaꞌonon dihiiꞌi wochii deebiye.

¹⁹ Giishi mooyo tuneba ooge mooyo, anaami bushiisheenaꞌo tunebeeta maache bushiisheenaꞌo, Amaleeqeenaꞌo keccii daammitoochee aalleto amolla aalloone. Daawiti bullin dihiiꞌi wochii deebiye.

²⁰ Ebiyoommon wotta Daawiti bageenaꞌon, emmisheenaꞌonaa miiminaꞌonon dihiiꞌi wochiye. Bi asheenaꞌo eboshin boonoshiyee aaf gasheebee, “Ebi Daawitichone” iyeete.

²¹ Daawiti boonoshi maraatetoyich biin dabbemmon mawiiꞌi gommooch echeti, Besoori aacooch beeti gutte balle asheenaꞌo waan waahe. Boonoshiyoo Daawitinaa biinna tookkii beeti asheenaꞌona daneya kechiyeete. Daawitiyoo boonoshi waan giddeꞌi boonoshin diggiihe.

²² Tunebaani Daawitin dabbii hammiti asheenaꞌo daggoochee gondeenaꞌonaa xummeenaꞌona tuneti ikkikkeenaꞌo “Hini asheenaꞌo noonna tookkii hamaaneenaꞌo boonoshi tunetoyich, dihiiyaa no deebeti kecceti mooyoochee boonoshich qoodaachemmo noone; boonoshi mecheenaꞌonaa bushiisheenaꞌonon baach yeshi hambeete” iyeete.

²³ Tunebaani Daawiti boonoshich ishichiye: “Ta maneenaꞌote! Doono Yeeri immiti mooyoyich ebin tuneyaahote. Noon quyeto, no toommooch waati bokkeenaꞌon no kishooch beshiiꞌi immito, biine.

²⁴ Ebi ittoshi gettii beeton waayemmo aalloone. Qiicoon quyoyich gubb echeti asheenaꞌochi qoodoo ginooch hammitinaꞌochi qoodoona tookki tatoone bi tunemmo. Bulliyoo tatoone bi qoodeyemmo” iye.

²⁵ Daawiti aroobee aaboochee tiijjiꞌi hanaach beddaahaa, Israꞌeeleenaꞌoyich ebi mooyon sheeroonaa doyoonon tuniiꞌi neechiye.

²⁶ Daawitiyoo Tsiqilaag waachii, bi shunechinaꞌo tuneti Yihudee showee geeneenaꞌoyich, “Doono Yeerichi etteenaꞌo waanee kecceti mooyoochee ittoshich icheti imoone” iꞌi kecceti mooyoochee qoodiꞌi daachiihe.

²⁷ Ebinoo Beeteeli beetinaꞌoyich, Ramootaa deshi-waan beetinaꞌoyich, Yatiir beetinaꞌoyich,

²⁸ Aroꞌeer beetinaꞌoyich, Sifimoot beetinaꞌoyich, Eshiteeminaa

²⁹ Rakaalinooch beetinaꞌoyich, ebiyoommon wotta Yerahimeeli katemeenaꞌooch beetinaꞌoyich, Qeeni katemeenaꞌooch beetinaꞌoyich,

³⁰ Horim, Borishaan, Ataak,

³¹ Kebiroon, ebiyoommon wotta Daawitinaa bi asheenaꞌona guudditi katemeenaꞌo bulliich beetinaꞌoyich daachiihe.