1 Saameeli 29 - Kafa Linguistics Project

Daawiti Tsiqilaag Wottemmoyich Akiishi Tuniyoo

¹ Filsixeemeenaꞌo boonoshi ginee naayinaꞌo bullin Afeeq deebii kiciyeete. Israꞌeeleenaꞌo Yezireeli bambooch beeti aachi xuuphee gaꞌooch kaamboon geddiꞌi kotetinaꞌone.

² Uuche Filsixeemee taateenaꞌo boonoshi ginee naayinaꞌon dabbiiꞌi, balloonaa humoonon tuneꞌi boonoshi hammii beetaa, Daawitinaa bi asheenaꞌona Akiishina tookkii tuneꞌi gubb dabbii beeheete.

³ Filsixeemee ginee iraasheenaꞌo “Ebi Hibireenaꞌo hiniich amooniye boonoshi hallii beeto?” iꞌi echeheete. Akiishi boonoshich ishichiye: “Hini Israꞌeelee taatoo Saaꞌoolichi naayo Daawitine. Biyoo taanna tookkii bi tuneto natoyee dambane. Taanna tookkii bi tunetoochee tiijjiꞌi and beddaahaa, amee gondoonona bi toommoochee daneyaano taane” iye.

⁴ Filsixeemee ginee iraasheenaꞌo Akiishin kaareꞌi biich ishichiyeete: “Hini uroon bi kotemmoyich biich ne immeti katemooch bi wottemmoyich tuniibe. Koyoochaa etto tuneree no toommooch bi tiyaachemmoyich, noonna tookki ginooch hamaachemmone. Bi doonona tookki bi shunemmo amoonane? No asheenaꞌo qettoon kuxona toone?

⁵ Boonoshinaa boonoshina caphee duubbiibee, ‘Saaꞌooli humeenaꞌon wuxiye; Daawiti aashire humeenaꞌon wuxiye’ iꞌi boonoshi shoddeto hini Daawitich toone?” iyeete.

⁶ Ebich Akiishi Daawitin ceeggiꞌi ishichiye: “Beeyechi Doono Yeeri beege; ne, gibeneeto neene; ta waan ne waatoochee tiijjiꞌi and beddaahaa ne toommoochee ta daneti gondo aalloone. Ebich koyooch taanna tookkaa ne hamon shunnaabeeto taane; tunebaani bare Filsixeemee taateenaꞌo neen gaawe aafoona ciinaaneenaꞌone.

⁷ Ebich illa ne kexooch wottebe; diggoona hambe. Filsixeemee taateenaꞌon ayinikkemmi mooyo amoonolla tuniyaahine” iye.

⁸ Daawiti Akiishich ishichiye: “Amooniye ta gondeto? Hamiree taatoo ta doono ne etteenaꞌona tookki ta koyeyaachemmoyich tuniyemmi, hiniich ta waatoochee tiijjiꞌi hanaach beddaahaa, ne naayo ta toommoochee ne daneti gondo amoone?” iye.

⁹ Akiishiyoo Daawitich wochiꞌi, “Yeerichi maraakoochoommon muricaallo ne tunoon ariibeeto taane. Tunebaani Filsixeemee ginee iraasheenaꞌo ‘Noonna tookki ginooch hamaachemmone’ itinaꞌone.

¹⁰ Illa ebich Saaꞌoolin qajjiꞌi ta waan waati ittoshi bulli yaach maaddoona tiyiree, hiniichee hambote” iye.

¹¹ Ebich Daawitinaa bi asheenaꞌona Filsixeemeenaꞌo showooch wotteya maaddoona tiyii qaxiriyeete. Tunebaani Filsixeemeenaꞌo Yezireel hammiyeete.