1 Saameeli 28 - Kafa Linguistics Project

¹ Ebiyee gubb, Filsixeemeenaꞌo Israꞌeeleenaꞌon koyoyich boonoshi ginee naayinaꞌon kiciyeete. Akiishiyoo Daawitich “Neennaa ne asheenaꞌona koyooch taanna tookki hammemmo ittoshi tunoon ariibe” iye.

² Daawitiyoo Akiishich “Deꞌa; ne guuno ta tuniyemmon arooba ne aafoona beeggemmo neene” iye. Akiishiyoo “Gaawiye; tawoo bulli aaboon taan ne quyemmoyich, quyee naayon tuniyemmo taane” iye.

Qititinaꞌona Yibbaataabeeti Ure Waan Saaꞌooli Hamo

³ Aroyee aaf Saameeli qititone. Israꞌeeleenaꞌo bulliyoo biich eeppiꞌi, bi hajjee katemoo tuneti Raama biin duukkitinaꞌone. Saaꞌooliyoo qititi ashoona tookkii yibbaatee beetinaꞌonaa allaameenaꞌonon Israꞌeelee showoochee boonoshi aallemmoyich tuniitone.

⁴ Filsixeemee ginee naayinaꞌo kiceeꞌi hammii Shuneemi katemee gaꞌooch kaamboon geddii koteheete. Saaꞌooli Israꞌeeleenaꞌon kiciye. Boonoshiyoo Giliboꞌa hammii kaamboon geddii koteheete.

⁵ Saaꞌooli Filsixeemee ginee naayinaꞌon beeggiꞌi shattiye; bi mulloo keqqoona qewehe.

⁶ Biyoo Doono Yeer waan corootiye. Doono Yeeriyoo gumona woyee Uriimoona woyee keemechinaꞌona biich wochemmon qajjiye.

⁷ Saaꞌooliyoo bi naayinaꞌon “Eke qititi asheenaꞌona yibbaataabeeti ureen ittoshi qaawaa hamiree bi waanee eche waayebona” iye. Bi naayinaꞌo biich “Qititinaꞌona yibbaataabeeti ure En Door beetine” iyeete.

⁸ Saaꞌooliyoo koni bi gaata bi aricheyaachemmoyich tunii, bi tahoon shaddii, gutte asheenaꞌon bi hillooch dabbiiꞌi, xumoona ure waan hammiye. Biinoo “Eke qititi ashoon echeree, ta toommooch amo tunemmo gaata taach gete; eke ta gettemmi ashoon taach ceegi tiijjibe” iye.

⁹ Tunebaani ure biich ishichiyan: “Saaꞌooli qititi asheenaꞌona yibbaatee beetinaꞌonaa allaameenaꞌonon Israꞌeelee showoochee bi aalliyoon xiishaa ariyaabeeto neene. Ishigaata, taan wuximmoyich taach olloon ne tunaabeeto, amoyichiye?” iyan.

¹⁰ Saaꞌooliyoo “Beeyechi Doono Yeeri beege! Ebi mooyona ne toommooch shaggemmi amee iritolla aalloone” iꞌi Doono Yeerichi shigoona wogehe.

¹¹ Ureyoo “Konin neech ceegi tiijjibote?” iyaa echahan. Biyoo “Saameelin taach ceegi tiijjibe” iye.

¹² Ureyoo Saameelin ceeggaa tiijjiyan; biinoo beeggaꞌa, oogeti qaaroona cookiyan. Saaꞌoolinoo “Ne, Saaꞌooli tunaachaa, amoyich taan dawushinne?” iyan.

¹³ Taatoo biin “Shattaahine; amooniye ne ciinnaabeeto?” iye. Ureyoo “Ayaano showoochee kechii beeton beeggaabeeti taane” iyan.

¹⁴ Biyoo “Bi shaahoo amoommone?” iye. Ureyoo “Iddimoon taheti ikke geene uro kechii beetone” iyan. Saaꞌooliyoo ure beeggeto Saameelin bi tunoon ariiꞌi, showooch baroona guufeꞌi goyinnehe.

¹⁵ Saameeliyoo Saaꞌoolin “Amoyichiye taan kashiyaache ne iyaabeeto? Amoyichiye ta woyemmoyich ne tuniito?” iye. Saaꞌooliyoo “Oogeton xuuxeto taane. Filsixeemeenaꞌo taanna koyee beetinaꞌone. Yeeriyoo ta waanee wokkitone. Keemechinaꞌona, woyee gumona, taach wochemmon qajjitone. Neen ta ceeggeto, amoon ta hallemmo gaata taach ne gettemmoyichiye” iye.

¹⁶ Saameeliyoo ishichiye: “Doono Yeeri ne waanee wokkitoyee, neech ettoon bi tunetoyee, illa taan ne echaabeeto amoyichiye?

¹⁷ Doono Yeeri ta noonoona bi gettiton ne toommooch ceechitone. Biyoo ne taatittinoon ne kishoochee tiijjiꞌi ne giyoo Daawitich immitone.

¹⁸ Doono Yeerich deꞌa geton ne qajjetoyich, bi kaaree shiixxoonoo Amaleeqeenaꞌo toommooch kindiyoon ne qajjetoyich, Doono Yeeri and ebi mooyon ne toommooch tuniitone.

¹⁹ Doono Yeeri neennaa Israꞌeeleenaꞌonon Filsixeemeenaꞌo kishooch beshiiree immemmone. Yaach neennaa ne bushiisheenaꞌona taanna tookki tunemmo ittoshine. Ebina Doono Yeeri Israꞌeelee ginee naayinaꞌon Filsixeemeenaꞌo kishooch beshiiree immemmone” iye.

²⁰ Saameeli gettiti mooyoochee tiyitona shattiꞌi Saaꞌooli neexoona showooch yangeehe. Aroobee areddoo bullinaa xumo bullinon maayoon maataano bi tunetoyich giidoo qachehe.

²¹ Ureyoo Saaꞌool waan waa, keqqee toommooch bi beemon beeggaꞌa biich ishichiyan: “Ebiyoche, ne gonnee ta, ne getoon waayeti taane. Ta kashoon qitooch beshiyaꞌa imona ne getteton ceechiti taane.

²² Andoo ne gonnee ta gettaa beeton waayebe. Kuppheree gommon ne hammemmoyich, giisheche maayoon ta giddiitaa mame” iyan.

²³ Biyoo “Maataache” iꞌi qajjiye. Tunebaani bi naayinaꞌo ureena tookkii tuneꞌi, kupphii boonoshi qolletoyich, boonoshi qolloon waayehe. Showoocheenoo tiyiꞌi qeenooch kotehe.

²⁴ Ureyichoo awujjiti gubbenoo beetone. Ebi gubbenoo afaafinoona bi basheyemmoyich tuniihan. Buddinoon daammaꞌa xiriqqahan. Bukee shittoon gedaanoon koshon kachiihan.

²⁵ Saaꞌoolinaa bi asheenaꞌonoyich giddiihan. Boonoshiyoo maaheete. Aroochee aroobee xum tiyii hammiyeete.