1 Saameeli 27 - Kafa Linguistics Project

Daawiti Filsixeemee Showooch Hamo

¹ Tunebaani Daawiti bi mulloona “Ikke areddoon Saaꞌooli taan wuxoon qayaachemmone. Ebich muricciꞌi Filsixeemeenaꞌo showooch hamoyee besh, taach bare gaawe mooyo aalloone. Aroochee Saaꞌooli Israꞌeelee showoo bulliich taan qaawoon qajjemmone. Tawoo bi kishoochee muriccemmo taane” iꞌi gabiye.

² Ebich Daawitinaa biinna tookkii beeti shiritte balle asheenaꞌona tiyiꞌi, Maꞌooki bushoo, Gaati taatoo Akiish waan hammiyeete.

³ Daawitinaa bi asheenaꞌona boonoshi kechi asheenaꞌona tookkii Akiish waan, Gaat koteheete. Daawitiyoo bi gutte mecheenaꞌona tookkii beehe. Eboshiyoo Yezireelechee Akinoꞌaminaa Naabaali mechee, Qermeloosechi Abigelinane.

⁴ Saaꞌooliyoo Daawiti Gaat muricciꞌi bi hamon waayeꞌi, biin qaawoon qajjiye.

⁵ Aroochee Daawiti Akiishich ishichiye: “Ne aafoochaa gidoon daneto ta tunegaata, hini showooch beeti katemeenaꞌo daggoochee ta beeyemmi xaaꞌoo taach ichebe. Ne guuno ta, neenna tookki taatee katemooch ta kotemmo, amoyichiye?” iye.

⁶ Ebina arooba Akiishi Tsiqilaagi katemoon Daawitich immiye. Ebich hanaach beddaahaa Tsiqilaagi Yihudee taateenaꞌocho tunehe.

⁷ Daawitiyoo Filsixeemeenaꞌo showooch ikke nattaa awudde agenoon kotehe.

⁸ Daawitinaa bi asheenaꞌona kechiꞌi Geshuureenaꞌon, Gerizeenaꞌonaa Amaleeqeenaꞌonon kochii beeheete. Ebi asheenaꞌo Xeleemee tiijjiꞌi, Shuurinaa Gibitsinooch beddaahaa beeti asheenaꞌone.

⁹ Daawitiyoo are showoon kochiꞌi aalliihe. Anaamon tuneba maacheen koninolla kashoona echiyaanoone. Tunebaani bageenaꞌon, miiminaꞌon, kureenaꞌon, gaaleenaꞌonaa tahoonon kecciꞌi Akiish waan waahe.

¹⁰ Akiishiyoo “Hanaach aabi waan hammiꞌi kochiyote?” iꞌi echee beehe. Daawitiyoo “Negeebi barahooch beeti Yihudee showooniye”; woyee “Negeebi barahooch beeti Yerahimeeleenaꞌo showooniye”; woyee “Negeebi barahooch beeti Qeeneenaꞌo showooniye” ii beehe.

¹¹ Daawiti woroon Gaat hamiree boonoshi getaachemmoyich, anaamo tuneba maache, koninolla kashoona echiyaanoon wuxii ciichiye. Ebiyoo “Daawiti ebin tuniitone getiree asheenaꞌo gettemminaꞌone” iꞌi bi gabitoyichiye. Filsixeemee showooch bi beemmi yemeeno bullin ebi bi doyoone.

¹² Akiishiyoo Daawitin gibenehe. Ebiyoo “Bi asheenaꞌo tuneti Israꞌeeleenaꞌona tiyaareeto bi tunetoyich, bulli aaboon taach maddemmone” iꞌi bi gabitoyichiye.