1 Saameeli 26 - Kafa Linguistics Project

Daawiti Guttinnoon Saaꞌoolin Wuxaanoon Qayo

¹ Ikkikke asheenaꞌo Ziifee Gibaaha, Saaꞌool waan wochinnoon hammiꞌi, “Daawiti Yihudee barahoochaa aabi-keyo waan beeti, Hakili geppooch aasheꞌi beetone” iyeete.

² Ebina Saaꞌooli tiyii, Israꞌeeleenaꞌo daggoochee aricheti keejje hume asheenaꞌon yechiꞌi, Daawitin qaawooch desh Ziifi barahooch hammiye.

³ Boonoshiyoo hammiꞌi Yihudee barahoochaa aabi-keyo waan beeti Hakili geppooch, gommi gashooch kaamboon geddiꞌi koteheete. Tunebaani Daawiti andoo are barahoochiye bi beeto. Daawitiyoo Saaꞌooli biin qaawiꞌi are barahooch womon bi ariihooba,

⁴ qiiddechinaꞌon daachiiꞌi, Saaꞌooli womon xiishiye.

⁵ Biyoo aroochee tiyii, Saaꞌooli beeti xaaꞌooch hammiye. Saaꞌoolinaa bi ginee iraashoo, Neeri bushoo Abeneerina qeyiti xaaꞌoon beeggiye. Saaꞌooli bi ginee naayinaꞌo guuddiꞌi tokketeti xaaꞌee gutte daggooch tokketetone.

⁶ Daawitiyoo Hitee asho Ahimeleekinaa Tseruuyichi bushoo, Yoꞌaabichi manoo Abishayinon “Ittoshi daggoochee Saaꞌoolichi kaambooch taanna tookki hammemmo, konine?” iꞌi echehe. Abishayiyoo “Ta neenna tookki hammemmo taane” iye.

⁷ Ebina Daawitinaa Abishayina xumoona ginee naayinaꞌo beetooch hammiyeete. Boonoshi shaggaahaa, Saaꞌooli asheenaꞌo qeyiibeeti gutte daggooch tokketeꞌi beehe. Bi ginoo bi qoy, showooch hogeeꞌi beehe. Abeneerinaa ginee naayinaꞌona bi guudoona tokketeꞌi beeheete.

⁸ Abishayi Daawitich ishichiye: “Hanaach Yeeri ne ettoon ne kishooch beshiiꞌi immitone. And illa ikke wottoon showoona xaaqqi ginoona koyone. Koshiyoo taach qaawiyaache” iye.

⁹ Tunebaani Daawiti Abishayich ishichiye: “Wuxiyaahine! Doono Yeeri huuttito toommooch gonde mooyon tuniichii, xuꞌaalli xalloo tuno aalloone.

¹⁰ Doono Yeeri beege! Doono Yeeri biin naxemmone; woyee bi aabo shagaa qitemmone; woyee ginoochaa qitemmone.

¹¹ Doono Yeeri huuttito toommooch gonde mooyon tuniyoon Doono Yeeri ta waanee wokkiibe. Ebi bi qoy beeti bi ginoonaa aachi qiicoonon baach ne yeshaa hambone” iye.

¹² Ebina Daawiti Saaꞌoolichi qoy beeti bi ginoonaa aachi qiicoonon daammiye. Boonoshi guttiyoo aroochee hammiyeete. Ebin beeggito woyee ariito woyee tokketoochee tiyito, koniyoona aalloone. Doono Yeer waanee tuneti magge tokketoo boonoshi toommooch bi tunetoyich asheenaꞌo bulli tokketetinaꞌone.

¹³ Aroochee Daawiti beqach besheꞌi geppee cillooch kechii neexehe. Boonoshi gutte daggooch gamini xaaꞌoo beetone.

¹⁴ Daawiti, ginee naayinaꞌonaa Neeri bushoo Abeneerinon ceeggiꞌi, “Abeneero, waayaa beetine?” iye. Abeneeriyoo “Ebi taatoochi waamooch cookaa beetocho, koni neene?” iye.

¹⁵ Daawitiyoo ishichiye: “Ne, kupphe uro toono neene? Israꞌeeleenaꞌo daggooch neenoommi kuppho konine? Ishigaata, taatoo ne doonon gaawichaꞌa quyoon ne qajjeto, amoyichiye? Ikke asho taatoo ne doonon wuxiya ittoshi beetooch giyitone.

¹⁶ Ebi ne tuniiti mooyo tato toonoone. Doono Yeeri beege! Doono Yeeri huuttiti, ittoshi doonon quyo ittoshi qajjitoyich, qita beddiyote. Eke and taatoochi, qoy beeti ginoonaa aachi qiicoona aabiich bi beeto gaata ciine” iye.

¹⁷ Saaꞌooliyoo Daawiti qaaro bi tunoon ariiꞌi, “Ta bushoo Daawito, ebi ne qaaroone?” iye. Daawitiyoo “Taatoo ta doonocho, eeha, ta qaaroone” iye.

¹⁸ Daakkiinoo ishichiye: “Taatoo bi guuno taan yookkii bi dabbiibeeto amoyichiye? Amooniye ta hallito? Ame gondooniye ta shuuneto?

¹⁹ Andoo taatoo ta doonocho, ne guuno ta gettaa beeton waayebe. Taanna ne kaaremmoyich tuniito Doono Yeeri bi tunegaata, deejjoon deꞌe. Tunebaani asheenaꞌo tunegaata, Doono Yeerina uppetinaꞌon tunebeete. Taan ‘Hamiree bare nuggisheenaꞌoyich goyinne maddebe’ iꞌi Doono Yeerichi showooch ta beetaachemmoyich hanaach taan yookkitinaꞌone.

²⁰ Andoo ikke asho akkoon yecha geppee toommooch qaawoommon, Israꞌeelee taatoo philloommi, hoxeeti taan wuxiyane bi waato; ta damoo Doono Yeeri aafoochee wohiree bare showooch ufaaye” iye.

²¹ Saaꞌooliyoo “Gondeto taane. Ta bushoo Daawito, wottebe; hanaach ta kashe ne aafoochaa aaxxe tunaꞌa bekketine. Ebich ebiyee damba ne toommooch gonde mooyon tuniyaachemmo taane. Tuushe ashi shuunoon shuuneto taane. Oogichaꞌa muricceto taane” iye.

²² Daawitiyoo wochiꞌi, “Taatoocho, ne gino ebiyoche, ne ashoochee ikkoon ne woche deejjaa, waaree daambe.

²³ Doono Yeeri asho bi ikkikkoyich bi cadiqittinoommonaa gibeneeto bi tunoommona qoccii beetone. Doono Yeeriyoo hanaach neen ta kishooch beshiiꞌi immitone. Tunebaani ta, Doono Yeeri huuttiti ne toommooch gondoon shuuneyaano taane.

²⁴ Ne kashoon aaxxe mooyon tuniyaꞌa hanaach ta wodiyoommon, ebiyoommon ta kasho Doono Yeeri aafoochaa aaxxe mooyon tuneree bekkebe. Biyoo ta iritoo bulliichee taan wodiibe” iye.

²⁵ Aroochee Saaꞌooli Daawitin, “Ta bushoo Daawito, Doono Yeeri neen diiribe. Meeti mooyon tuniyemmo neene; neechoo kaamemmone” iye. Aroochee Daawiti bi gommon hammiye; Saaꞌooliyoo bi kexooch wottehe.