1 Saameeli 25 - Kafa Linguistics Project

Saameeli Qitoo

¹ Saameeli qitiye. Israꞌeeleenaꞌo bulli kiceeꞌi biich eeppiyeete. Bi kexo beeti Raama biin duukkiyeete. Aroochee Daawiti tiyiꞌi desh Faraani barahooch hammiye.

Daawitinaa Abigelinochi Mooyo

^2-3 Kaaleebi yaroo tuneti, Naabaali getteebeeti ikke uro beehe. Biyoo Maꞌoonee ashoone. Biichoo Qermeloosi gaꞌooch showoo beetone. Oogeti gaannechi uroone. Keejje hume bagoonaa ikke hume emmishoona biich beetone. Bi mecheechi shigo Abigeli getteehe. Biyoo gaawe malletechi, wottoo shalligechi ureene. Tunebaani bi keno maacmanje, qoci gondee uroone. Ebi uro Qermeloosaa bi bageenaꞌochi eexon cakkii beehe.

⁴ Daawiti barahooch beechii, Naabaali bi bageenaꞌochi eexon cakkiibeeto bi tunoon waayehe.

⁵ Ebich Daawiti aashire gurimaasheenaꞌon bi waan wochee daachiihe; ishichiinoo iye: “Qermeloos beeti Naabaal waan hamiree ta shigoona biin diggiibote.

⁶ Biichoo ishichibote: ‘Diggoo neech tunebe. Ne kechi asheenaꞌonaa neecho tuneto bullinoyich diggoo tunebe.

⁷ Ne bageenaꞌochi eexon cakkiyaabeeto ne tunoon waayeto taane. Ne gijjee qiddeenaꞌo noonna tookkii boonoshi beehooba, boonoshi toommooch no shakkiiti iritoo aalloone. Qermeloos boonoshi beehooba, boonoshi waanee aalleti mooyo amolla aalloone.

⁸ Ne asheenaꞌon eche waayebe; ebi iberoo bi tunoon boonoshi neech gettemminaꞌone. Illa and gifiroon ne geddeti aaboon ne waan no waatoyich, ebi ta asheenaꞌo ne aafoochaa gidoon danebeete. Ne bushoo Daawiti, taannaa ne guuninaꞌonoyich ne kishooch beemmon ne immemmoyich neen qollaabeeto taane’ itone getote” iye.

⁹ Daawiti wocheti asheenaꞌo hammiꞌi, Daawiti shigoona ebi wochoon Naabaalich gettiyeete. Aroochee bi gettimmon waayeya quyeheete.

¹⁰ Naabaaliyoo Daawiti asheenaꞌoyich ishichiye: “Daawiti geto, konine? Iseyi bushoo geto, konine? And hini yemeenooch boonoshi dooninaꞌo waanee aallee hammiibeeti guuninaꞌo meetinaꞌone.

¹¹ Ishigaata, ta koshonaa ta aaconon, wotta ta bagee eexon caggii beetinaꞌoyich ta bashiti meenonoo, amoochee boonoshi waato gaata ta ariyaani asheenaꞌoyich daamiree imbote?” iye.

¹² Ebina Daawiti asheenaꞌo boonoshi hilla wotteꞌi, Naabaali gettito bullin biich gettiyeete.

¹³ Daawitiyoo bi asheenaꞌoyich “Ittoshi bulliyona ittoshi goraadoon cuyebote” bi getaa, boonoshi bulli boonoshi goraadoon cuyeheete. Daawitiyoo wotta bi goraadoon cuyehe. Awudde balli bede asheenaꞌo Daawitin dabbiꞌi hammimmona, gutte balle asheenaꞌo qiicoon quyoyich arooch echeheete.

¹⁴ Arooba Naabaalichi aafee bushiisheenaꞌo daggoochee ikkoo Naabaali mechee Abigelich ishichiye: “Daawiti bi diggiyoon boonoshi gettemmoyich wocheyechinaꞌon barahoochee no doono waan deejjaa, bi boonoshin naaggiye.

¹⁵ Tunebaani asheenaꞌo nooch gaawe asheenaꞌone. No toommooch gonde mooyon tuniyaaneenaꞌone. Boonoshina tookkaa gaddooch no beehooba, no waanee amolla aalleyaanoone.

¹⁶ Bagoon quyaabee boonoshina tookkaa no beehooba, areddoon tuneba xumoon nooch uxeroon tunetinaꞌone.

¹⁷ Illa and, ebin ariiree ne tuniyemmon tuniibe. Gonde mooyo no doononaa bi kechi asheenaꞌo bullinochi toommooch gabeetone. Bi gaata, gonde asho bi tunetoyich, biich gettemmo koniyoona aalloone” iye.

¹⁸ Abigeliyoo afaafinoona gutte balle koshon, gutte mollexxee woyinee uyoon, shuunetaa qanniti uuche bagee meenon, shaashaa shabaatte kiilo giraamee bungee gaawoon, ikke balle woyinee aafee yuunjoonaa gutte balle nuuphi balaasee michi aafoonon qannaayaꞌa, kuree toommooch boonoshi xaanemmon tuniihan.

¹⁹ Bi aafee bushiisheenaꞌonoo “Tayee shiichiree hambote; tawoo ittoshi hillooch dabbemmi taane” iyan. Tunebaani bi keno Naabaalich getaaneene.

²⁰ Biyoo kuroon yebbaꞌa geppeexi wuuqqe gommon bi hammaa beetaa, Daawitinaa bi asheenaꞌona bi waan waaheete. Biyoo boonoshina danahan.

²¹ Daawitiyoo “Ebi uroochi gijjoon barahoochaa ta quyeto duubooniye? Biicho tunetoochee aalleti amolla aalloone. Biich deꞌoon ta tuniitaa, taach gondoona wochitone.

²² Yaach maadda beddaahaa, bi ashoochee ikke anaamonolla ta echiigaata, Yeeri ta toommooch ebin tuniibe; ebinoo daakkibe” itone.

²³ Abigeliyoo Daawitin beeggaꞌa afaafinoona kuroochee kindiyan; showooch dihiꞌanoo biich goyinnehan.

²⁴ Bi baatooch guufeechaa ishichiyan: “Ta doonocho, axaaxoo ta toommooch baach tunebe. Ne gonnee ta yibbaatoon waayebe.

²⁵ Ta doonocho, hini getaa giyaani Naabaalin moochi haddiyaahine; biyoo bi shigoommone. Bi shigo Naabaali geto, mullaallo getone. Ta doono ne deejjiti gurimaasheenaꞌon ne gonnee ta, beegaane taane.

²⁶ “Ta doonocho, beeyechi Doono Yeeri beege! Wotta ne kashoona wogehoye. Damoon ne ukkaachemmoyich, wotta ne hajjee kishoona nichoon ne gaacaachemmoyich neen quyeto Doono Yeerine. Andoo ne etteenaꞌonaa ta doono ne toommooch gondoon gabii beetinaꞌona Naabaaliyoommon tunebeete.

²⁷ Ne gonnee ta, ta doono neech deebeti hini mooyo, neen dabbiibeeti ne asheenaꞌoyich ichebe.

²⁸ Ta doono ne, Doono Yeerichi koyoon ne koyaa beetoyich, Doono Yeeriyoo meeti yemeenoon beeyemmi taatittinoon ta doono neech immemmone. Ebich ne gonnee ta xuꞌoon maaribe. Ne beemi yemeeno bulliichoo gondo ne waanee danaaye.

²⁹ Asho koniyoona neen wuxiya yookkii bi dabbigaata, asho aaxxe bi qiicoon quyoommon ne Nuggishoo Doono Yeeri neen quye wodiyemmone. Tunebaani ne etteenaꞌochi kasheen, asho xaqqoon xeppelloona awuroommon awuremmone.

³⁰ Doono Yeeri ta doono neech bi gibenikkitoommon gaawe mooyon bi tuniihooba, Israꞌeeleenaꞌo toommooch bi taatiihooboo,

³¹ naboo aalloon ne ukkiti ashi damoo woyee ne hajjee kishoona ne gaacceti nichoo aallo bi tunetoyich, ta doono ne ayinemmi mooyo woyee ‘Aakka ebin tuniitote’ ne gettemmi mooyo beetaachemmone. Doono Yeeri gaawe mooyon neech bi tuniihooba, ne gonnee taan batteyaahine” iyan.

³² Daawitiyoo Abigelich ishichiye: “Hanaach taanna tookki ne danemmoyich neen deejjiti, Israꞌeelee Nuggishoo Doono Yeeri diireebe.

³³ Ashi damoon ta ukkaachemmoyich, wotta ta hajjee kishoona nichoon ta gaacaachemmoyich taan ne quyetoyich, ne gaawe gaboyich, newoo diireetin tunebe.

³⁴ Ne toommooch gonde mooyon ta tuniyaachemmoyich Doono Yeeri taan quyetone. Israꞌeelee Nuggishoo beeyechi Doono Yeeri beege; kaataa waaꞌa taanna ne daneyaan gaata, yaach maadda beddaahaa, Naabaalicho tuneti asheenaꞌo daggoochee ikke anaamolla echeyaacheshone” iye.

³⁵ Aroochee Daawiti Abigeli biich bi deebeti mooyon bi kishoochee deqqiye. Biichoo “Ne kexooch diggoona hambe; ne getteton waayeto taane. Ne qolletonoo tuniyemmo taane” iye.

³⁶ Abigeli Naabaal waan wottaa bi waahaa, taatee gifiroommi gifiroon geddiꞌi kexooch bi beetaa danahan. Biyoo oogichii bi mashetoyich, emiree toommoochiye bi beeto. Ebich showoo harimmi wottoon amoonolla biich getaaneene.

³⁷ Showoo haraa masho bi toommoochee besheechaa, bulli mooyon bi gettemmona mullee biiyo biin yechiye. Bi kishoo, bi baatoo qitiye.

³⁸ Aashire qemoyee gubb, Doono Yeeri Naabaalin naxetaa qitiye.

³⁹ Daawiti Naabaali qitoon bi waayehooba, ishichiye: “Naabaali taan bi naaggiti naagoyich nichoon kichiti, wotta bi guuno ta, gonde mooyon ta tuniyaachemmoyich taan quyeti, Doono Yeeri galleteebe. Doono Yeeri Naabaali shuuneti gondoon bi toommooch wochitone” iye. Daawitiyoo Abigelin shaagga wocheyechinaꞌon bi waan daachiihe.

⁴⁰ Bi naayinaꞌo Qermeloos beeti Abigel waan hammiꞌi, “Daawiti neen shaagga, bi waan neen no daammemmoyich bi wochetenane no waato” iꞌi biich gettiyeete.

⁴¹ Biyoo tiyaa baroona showooch guufeechaa, “Ta bi gonnee biich maddoonaa bi naayinaꞌochi baatoon mayonoyich qanniti taane” iyan.

⁴² Afaafinoona tiyaa kuroon yebbahan. Bi naayinaꞌo tuneti uuche maache bushiisheenaꞌon dabbiyaꞌa Daawiti wocheti asheenaꞌona tookkaa hammahan. Daawitichoo mecheen tunehan.

⁴³ Daawiti Yezireelechi Akinoꞌamin shaaggitone. Boonoshi guttiyoo bi mecheenaꞌon tuneheete.

⁴⁴ Tunebaani Saaꞌooli, Daawiti mechee tuneti bi bushee Mikaalin Galiimi katemee asho tuneti, Layishi bushoo Feliixich shaakkiitone.