1 Saameeli 22 - Kafa Linguistics Project

Daawit Waan Ikkikke Asheenaꞌo Womo

¹ Daawiti Gaatee Adulaami katemee katinooch beeti xaqqee gofooch hammiye. Bi maneenaꞌonaa bi nihoochi kechi asheenaꞌona ebin waayeꞌi bi waan hammiyeete.

² Iriteetinaꞌo, hiishoo boonoshi toommooch beetinaꞌonaa mooyo boonoshich caammitinaꞌona tuneti ikkikke asheenaꞌo bi waan hammiyeete. Boonoshi haddoo awudde balli beddiye. Daawitiyoo boonoshi toommooch ukkirehe.

³ Daawiti aroochee tiyiꞌi, Moꞌabee showooch beeti Mitsipha hammiye. Moꞌabee taatoyichoo “Yeeri taach tuniimmi mooyon ta ariimmi wottoon, ta nihoonaa ta indeena waaree ne waan beebeete” iye.

⁴ Biyoo boonoshin Moꞌabee taatoo waan kotiihe. Daawiti mishigooch bi koteti yemeeno bullin ebi taatoo waan beeheete.

⁵ Tunebaani keemechi Gaadi Daawitin “Hiniich beeyaahine; tiyiree Yihudee showooch hambe” iye. Ebina Daawiti tiyii hammiꞌi Heereeti shaarooch giyiye.

Noob Beeti Qeesheenaꞌon Saaꞌooli Wuxoo

⁶ Ikke areddoon Saaꞌooli Gibaaha beeti ikke geppooch, tamariskee michi yiirooch kotee beehe. Biyoo bi ginoon yechitone; wotta bi naayinaꞌo bi guudoona neexetinaꞌone. Arooch bi beetaa, bi asheenaꞌoochee ikkikkeenaꞌo Daawitinaa biinna tookkii beeti asheenaꞌonon boonoshi beegon gettiyeete.

⁷ Saaꞌooliyoo bi guudoona beeti bi naayinaꞌoyich ishichiye: “Biiniyaamee asheenaꞌote, eke ellebote; Iseyi bushoo goyee budonaa woyinee goyoonon ittoshi bullich immehe? Wotta ittoshi bullin humee iraashoonaa ballee iraashoonon tuniyehe?

⁸ Ta toommooch ittoshi koceeto ebichiye? Ta hajjee bushoo Iseyi bushoona tookkii wogoon bi gimon taach gettito koniyoona aalloone. Ittoshi daggoochee koniyoona taach aaxxiibeeto aalloone. Hanaach bi tunii beetoommon, ta naayo taan wuxiya ta toommooch bi tiyemmoyich ta bushoo kupphiyoon taach gettito aalloone” iye.

⁹ Aroochee Saaꞌoolichi naayinaꞌona tookkii neexeebeeti Edoomechi Doogi ishichiye: “Iseyi bushoo Noob beeti, Akixuubi bushoo Ahimeleek waan bi hamon beeggeto taane.

¹⁰ Ahimeleeki Daawiti amoon bi tuniyemmo gaata Doono Yeeri bekkiyemmoyich qollehe. Wotta shohoonaa Filsixeemo Gooliyaadichi goraadoonon biich immitone” iye.

¹¹ Ebich taatoo, Akixuubi bushoo, qeeshoo Ahimeleekin, wotta Noob beeti, qeesheenaꞌo tuneti bi nihoochi kechi asheenaꞌo bullin wochiiꞌi bi waan ceekkiihe. Boonoshi bulliyoo taatoo waan waaheete.

¹² Saaꞌooliyoo “Akixuubi bushoocho, waayaa beetine?” iye. Ahimeleekiyoo “Ta doonocho, waayaabeeto taane” iye.

¹³ “Neennaa Iseyi bushoona ta toommooch ittoshi koceeto, amoyichiye? Newoo biich koshonaa goraadoonon immehine; wotta biich Yeerin qollehine. Ebina biyoo ta toommooch tiyiꞌi, taan bi wuxemmi gommon qaawii beetone” iye.

¹⁴ Ahimeleekiyoo taatoyich ishichiꞌi wochiye: “Ne naayinaꞌo daggoochee gibeneeto, Daawitiyoommo konine? Biyoo ne bushee keno, ne quyee naayinaꞌo toommooch ukkiroo, wotta ne kexooch beeti asheenaꞌo oogiibeeti uroone.

¹⁵ Biich Yeerin ta qollo, arooba baachiye? Toonoone. Ebi ne toommooch koceeti koceyeechon amoonolla ta ariibeeto aallo bi tunetoyich, taatoo bi guuno taan woyee ta nihoochi kechi asheenaꞌon gondiyaaye” iye.

¹⁶ Taatoo “Ahimeleeko, neennaa ne nihoochi kechi asheenaꞌona iberoon qitecho ittoshine” iye.

¹⁷ Aroochee taatoo bi guudoona neexeebeeti, biin quyechi bi naayinaꞌon “Ebi Doono Yeerichi qeesheenaꞌo Daawit waan gaꞌetinaꞌone. Wotta Daawiti muricon ariibee taach gettemmon qajjitinaꞌone. Ebich boonoshin wuxibote” iye. Tunebaani taatoochi naayinaꞌo Doono Yeerichi qeesheenaꞌon wuxemmon qajjiyeete.

¹⁸ Taatoo, Doogin “Ne boonoshin wuxibe” iye. Edoomechi Doogi boonoshin wuxiye. Arooba muttee tuppoochee shippeti efoodoon taheti shinnaa uuche qeesheenaꞌon wuxiye.

¹⁹ Wotta Saaꞌooli qeesheenaꞌochi katemoo tuneti Noob beeti asheenaꞌo bulli goraadoona qiti boonoshi ciiremmon tuniihe. Biyoo anaaminaꞌonaa maacheenaꞌona, bushiisheenaꞌonaa gaggereenaꞌona, gatteenaꞌo, kureenaꞌonaa bageenaꞌona wuxaa boonoshi aallemmoyich tuniihe.

²⁰ Tunebaani Akixuubi bushoochi bushoo, Ahimeleeki bushiisheenaꞌo daggoochee ikkoo tuneti Abiyataari muricciꞌi Daawit waan hammiye.

²¹ Biyoo Saaꞌooli Doono Yeerichi qeesheenaꞌon wuxiiꞌi bi aalliyoon Daawitich gettiye.

²² Daawitiyoo Abiyataarich ishichiye: “Arooba Edoomechi Doogi arooch beemon ta beeggetoyich, Saaꞌoolich hamiree gettemmo bi tunoon xiishaa ariito taane. Ebi ne nihoochi kechi asheenaꞌo bulli qitito, ta naboonane.

²³ Andoo taanna tookki beebe; shattaahine; taan wuxiya qaawiibeeto, neenoo wuxiya qaawii beetone; taanna tookki diggoona beeyemmo neene” iye.