1 Saameeli 21 - Kafa Linguistics Project

Daawiti Muricciꞌi Noob Hamo

¹ Aroochee Daawiti qeeshoo Ahimeleeki beeti, Noob hammiye. Ahimeleekiyoo qeweebee Daawitina daneya kechiꞌi, “Asho neenna tookkii aalloon amoyich ne ikkeeton waanne?” iye.

² Daawitiyoo qeeshoo Ahimeleekich ishichiye: “Taatoo ‘Ne wocheeti mooyonaa ne tuniyemmoyich ta getteti getoonon koniyoona ariyaaye’ bi itoyichiye. Ta asheenaꞌona aabiichaa ta danemmo gaata taajjeto taane.

³ And ne kishooch amo beete? Uuche xekee koshon woyee neech beemmo amoonolla taach imbe” iye.

⁴ Qeeshoo, Daawitich, “Yaafeeti kosho baachalli, asho bullich tunemmi kosho taach aalloone. Ne asheenaꞌo katinoon maacheena daneyaaneenaꞌo boonoshi tunegaata, ebi aroon daamon hakkihine” iye.

⁵ Daawitiyoo, “Iberoo daneyaaneenaꞌone. Aafi no doyoommon, no kecheti aaboochee tiijjiꞌi, maacheenaꞌo no waan katinaaneenaꞌone. Ta asheenaꞌochi achoo yaafoone. Yaafittinoon qaawaani gommooch no keyiyoobolla, ta asheenaꞌochi achoo yaafeetone. Ishigaata, ebi shaahe gommooch keyibee aabichiree ebin tuniyeheete?” iye.

⁶ Ebich qeeshoo yaafeeti koshon Daawitich immiye. Ebiyoo biich beeto Doono Yeerich aafooch bi geddeti madelloochee, qeeci kosho kereechaa tiyiti yaaree kosho baach bi tunetoyichiye.

⁷ Arooba Saaꞌooli qiddeenaꞌochi ukkiroo Edoomechi Doogi arooch beetone. Biyoo arooch bi daneto, Doono Yeeri aafooch bi giddemmoyich tuniyemmi doyoon ceechoyichiye.

⁸ Daawitiyoo Ahimeleekich, “Taatoochi geto afaafinoona ta kechemmoyich bi tuniitoyich, ta goraadoon woyee bare ginee qiicoon yeshaanooniye ta kecheto. Ne waan gino woyee goraado danehe?” iꞌi echehe.

⁹ Qeeshoo wochiꞌi, “Elaahi bamboochaa ne wuxiti Filsixeemo Gooliyaadi goraado beetone. Aroo qoreddoona kaappeꞌi efoodee gubb beetone. Ne qaawigaata aroon daambe; aroyee damba baroo hiniich aalloone” iye. Daawitiyoo, “Aroon taach imbe; aroommi gaaweto aalloone” iye.

Daawiti Maxxeꞌi Gaat Hamo

¹⁰ Ebina arooba Daawiti Saaꞌool waanee maxxeꞌi Gaati taatoo Akiish waan hammiye.

¹¹ Akiishi naayinaꞌo Akiishich, “Hini Daawiti bi showee taatoo toone? Wotta, ‘Saaꞌooli humeenaꞌon wuxiye; Daawiti aashire humeenaꞌon wuxiye’ ii boonoshinaa boonoshina capheebee boonoshi duubbito, hini Daawitich toone?” iyeete.

¹² Ebi boonoshi yibbaatoo Daawitin keqqichiye. Biyoo Gaati taatoo Akiishin oogichiꞌi shattiye.

¹³ Ebich Daawiti boonoshi aafoochaa bi halloon shaddiye. Biin boonoshi yechimmona, geyechochoommon katemee uxeroon qoopphiibee bi illaaccoo bi ishaanoona toollemmoyich tuniihe.

¹⁴ Akiishiyoo bi naayinaꞌoyich ishichiye: “Eke ciinote; hini uro geyechone. Ishigaata, biin ta waan ittoshi deebito, amoyichiye?

¹⁵ Ta aafoochaa bi geyemmoyich hini uroon ittoshi deebito, geyecho ta waan aalletenane? Ebiyoommi asho ta kexooch giyi beddiye?” iye.