1 Saameeli 20 - Kafa Linguistics Project

Daawiti Muriccemmoyich Yonaataani Gaacho

¹ Aroyee gubb Daawiti Raami katemooch beeti Nayootee muriccii Yonaataan waan hammiꞌi, biich ishichiye: “Amooniye ta hallito? Ta gondochi amoone? Ne nihoo taan wuxiya bi qaawiibeeto, biich amoon ta gondetenane?” iye.

² Yonaataaniyoo “Yeeri ebin ne waanee wokkiibe; qitaachemmo neene. Ta nihoo shiichiꞌi taach getaanoon giisheche mooyon tuneba oogeton, amoonolla tuniyaanoone. Ishigaata, ta nihoo hinin taach bi aachemmi naboo beete? Mooyo ebi toonoone” iye.

³ Tunebaani Daawiti wochiꞌi, “Am shaahoon taan ne shunnaabeeto gaata, ne nihoo arii beetone. Biyoo ‘Yonaataani ebin bi ariigaata, ayinemmone’ iꞌi ne ariyaachemmon tuniitone. Beeyechi Doono Yeeri beege; wotta ne kashoona wogehoye; taannaa qitoonochi gutte daggooch ikke shaadde baachiye echeti” iye.

⁴ Yonaataaniyoo Daawitich “Neech ta tuniyemmon ne qaawaabeeti mooyon, amoonolla tuniyemmo taane” iye.

⁵ Daawitiyoo biich ishichiye: “Ebiyoche, yaach agenee keyi baaroo bi tunetoyich, maayoon mamoyich taatoona tookki madooch koto taach qaawii beetone. Tunebaani sharitti wottoon ikke kubbooch aashe ta beeyemmoyich tuniibe.

⁶ Ne nihoo ta aalloon ariiꞌi bi echegaata, ‘Daawiti, bi kechi asheenaꞌo bulli nati deejjoon giddiyemminaꞌo boonoshi tunetoyich, bi beemi katemoo Beetilehem afaafinoona hamoyich taan daaggoo qolletone’ gete.

⁷ Tunebe, bi getigaata, ne guuno taach gaawetone getone. Tunebaani bi ippegaata, ta toommooch gondoon bi gaboon ariyemmo neene.

⁸ Illa deꞌe mooyon taach tuniibe; ne guuno taanna tookkaa Doono Yeerina wogoon giyeto neene. Tunebaani gondo taach bi beegaata, ne taan wuxibe; amoyichiye ne nihoo taan wuxemmoyich, beshiiree ne immemmo?” iye.

⁹ Yonaataaniyoo “Yeeri ebin ne waanee wokkiibe; ta nihoo ne toommooch gondoon shuuneya bi gaboon ta ariito gaata, neech getaacheshote?” iye.

¹⁰ Aroochee Daawiti Yonaataanich, “Ne nihoo neech kaaroona bi wochigaata, taach gettemmo, konine?” iye.

¹¹ Yonaataaniyoo Daawitin, “Ne waataa gaddooch hambone” iye. Ebina boonoshi gutti gaddooch hammiyeete.

¹² Aroochee Yonaataani Daawitich ishichiye: “Israꞌeelee Nuggishoo Doono Yeeri no miixoo tunebe. Yaach woyee sharitta ta nihoo waanee mooyon xiishiree, neech bi gabiibeeti gaboo gaaweto bi tunegaata, ne waan wochoon daachiiree, neech arichiyemmo taane.

¹³ Tunebaani ta nihoo ne toommooch gondoon bi gabaa neech arichiyoon ta qayigaata, wotta diggoona ne hammemmoyich tuniyoon ta qayigaata, Doono Yeeri ta toommooch ebin tuniibe; ebinoo daakkibe! Doono Yeeri ta aabbina tookkii bi tunoommon neenna tookki tunebe.

¹⁴ Newoo kashoona ta beehooba, ta qitaachemmoyich Doono Yeer waanee tuneti deꞌittinoon taach bekkiibe.

¹⁵ Doono Yeeri ne etteenaꞌo bullin showee toommoochee hidii bi aalliihooba, ne deꞌittinoon ta kechi asheenaꞌo waanee bulli yemeenoon kuxxaahine” iye.

¹⁶ Yonaataaniyoo “Daawiti etteenaꞌo toommooch Doono Yeeri nallibe” iꞌi Daawiti kechi asheenaꞌona tookkii wogoon giyiye.

¹⁷ Yonaataaniyoo Daawitin bi shunoochee tiyitona biich bi wogemmoyich tuniihe. Ebiyoo Daawitin bi kashoona tachiꞌi bi shunnii beetoyichiye.

¹⁸ Aroochee Yonaataani Daawitich ishichiye: “Yaach agene kechi baaroone. Ne kote xaaꞌoo shokko bi tunoona, arooch aallo ne tuno arichemmone.

¹⁹ Sharitta ne aallo beshoon xiisheyemmone. Ebich daakki dugilla hamiree, ebiyee aaf ne aasheti xaaꞌooch beeti xaqqee gutee gaꞌooch beebe.

²⁰ Tawoo ikke tuneti mooyooch awureton shaahiiree, ne beeti xaqqo waan keejje shangeenaꞌon awuremmo taane.

²¹ Aroochee ‘Hamiree ebi shangeenaꞌon deebe’ getiree ta naayon wochemmo taane. Tawoo biich ‘Shangeenaꞌo beeto neyee hachiye. Hach taach deebe’ ta getigaata, keyiree wobe. Beeyechi Doono Yeeri beege! Ne toommooch shaggemmi gonde mooyo amolla aalloone.

²² Tunebaani ta biich ‘Shangeenaꞌo beeto neyee beqachiye’ ta getigaata, ne hammemmoyich tuniito Doono Yeeri bi tunetoyich, ne gommon hambe.

²³ Ebi neennaa taanna yibbaateti mooyoyich Doono Yeeri neennaa taanna daggooch bulli yemeenoon miixoone” iye.

²⁴ Ebina Daawiti kubbooch aashehe. Agene kechi baarooba taatoo gifiroon maaya kotehe.

²⁵ Taatoo daabbee gaꞌooch beeti, aafi bi doyee kote xaaꞌooch kotehe. Yonaataani beeto bi ciinoochiye; Abeneeri wotta bi gaꞌooch kotehe. Tunebaani Daawitichi kote xaaꞌoo shokkoon tunehe.

²⁶ Saaꞌooliyoo “Muusichi Sheeroo gettiibeeti gommona bi xalleyaachemmoyich tuniiti mooyo Daawiti toommooch diqqoona shago qayaache. Iberoon xalloo toonoone” iꞌi bi gabitoyich, arooba amoonolla getaanoone.

²⁷ Bi yaachich, ebiyoo agene kechi baaroobee dechara Daawiti kote xaaꞌoo andoo shokkoon tunehe. Saaꞌooliyoo bi bushoo Yonaataanich, “Iseyi bushoo yiichinaa hanaachinon gifirooch giddo bi qajjito amoyichiye?” iꞌi echehe.

²⁸ Yonaataaniyoo wochiꞌi, “Daawiti Beetilehem bi hammemmoyich ta daaggoon kupphiiꞌi qolletone.

²⁹ Biyoo ‘Ne daaggaa hambona; no kechi asheenaꞌo katemee daggoochaa deejjoon giddii beetinaꞌo boonoshi tunetoyich, ta manoo arooch ta danemmoyich taach gettitone. Ebich ne aafoochaa gidoon daneto ta tunegaata, hamiree ta maneenaꞌon ta beeggemmoyich taan daachiibe’ itone. Taatoochi gifirooch danoon bi qajjito ebichiye” iye.

³⁰ Saaꞌooliyoo Yonaataanin oogeton kaareꞌi biich ishichiye: “Hini xummeenaa deꞌa getaaneena tuneti ureechi bushoocho, ne qellich yeelloon, ne indeyichoo giishoon deeboyich, Iseyi bushoona tookkaa muddoo ne gawiyoon tuushaano taane.

³¹ Iseyi bushoo hini showee toommooch kashoona bi beegaata, newoo tuneb ne taatittino gappaachemmone. Qitecho bi tunetoyich, wocheree ta waan deebe” iye.

³² Yonaataaniyoo bi nihoo Saaꞌoolich wochiꞌi, “Amoyichiye bi qitemmo? Amooniye bi hallito?” iye.

³³ Saaꞌooliyoo Yonaataanin wuxiya bi ginoon awurehe. Ebina Yonaataani bi nihoo Daawitin wuxiya bi maacon xiishiye.

³⁴ Yonaataaniyoo oogeti kaaroona gifiroochee tiyiye. Arooba, ebiyoo are baaree decharooba, ciroona maayoon maataanoone. Bi nihoo Daawitin giishiitoyich, Daawitich ayiniye.

³⁵ Bi dechara maaddoona Yonaataani ikke bushoon dabbiiꞌi, Daawitina tookkii boonoshi taajjeti gaddooch biinna daneya hammiye.

³⁶ Biyoo bushoyich, “Hamiree ebi ta awureya iyaabeeti shangeenaꞌon qaawibe” iye. Bushoo hammimmona shangoon biyee beshiiꞌi awurehe.

³⁷ Bushoo shango dihiti xaaꞌooch shaggimmona, Yonaataani biin ceeggiꞌi, “Shango dihito, neyee aaf toone?

³⁸ Afaafinebe; kaatebe; yagiyaahine” iye. Bushoo shangeenaꞌon maciꞌi bi doono waan wottehe.

³⁹ Yonaataaninaa Daawitinoyee besh, bushoo ebi mooyon amoonolla ariyaanoone.

⁴⁰ Aroochee Yonaataani, bushoo bi ginee qiicoon yeshiree, katemooch bi hammemmoyich gettiye.

⁴¹ Bushoo hammitoyee gubb, Daawiti bi aasheti xaqqee gutee gaꞌoochee kechiꞌi, Yonaataani aafooch guteneꞌi keejje wottoon baroona guufee goyinnehe. Aroochee boonoshi guttiyoo eefeebee shumeheete. Tunebaani beshoon eeppito Daawitine.

⁴² Yonaataaniyoo Daawitin “ ‘Neennaa taanna daggooch, ne yaroonaa ta yaroona daggoochoo bulli yemeenoon Doono Yeeri tunebe’ iyaꞌa Doono Yeerichi shigoona wogoon no giyetoyee, illa diggoona hambe” iye. Aroochee Daawiti tiyii hammiye. Yonaataaniyoo katemooch wottehe.