1 Saameeli 2 - Kafa Linguistics Project

Haanni Corootiti Corooto

¹ Haanni ishichaꞌa corootiyan: “Ta mullo Doono Yeerina oogichii emiritone; Doono Yeerina kaama ciixeti taane. Taan bi wodiyoona oogichaa ta emiritoyich, ta etteenaꞌo toommooch miicceti taane.

² “Doono Yeeriyoommi yaafoo aalloone; biinoommo ciroona aalloone; no Nuggishoommi deebo aalloone.

³ Doono Yeeri bullin ariibeeti Nuggishoone; asho shuuneebeeti shuunoon machoona qoccii beetone. Ebich coodona yibbaatoon qayote. Geecee yibbaatoo ittoshi noonoochee kechaaye.

⁴ Giidechinaꞌochi ginee qiiceenaꞌo tiishetinaꞌone; tunebaani giidaalleenaꞌo giidoon danetinaꞌone.

⁵ Michitinaꞌo maayoon mucceꞌi gichetinaꞌone; tunebaani shaacetinaꞌo maayoon michiyeete. Xaafee shabaatte bushiishoon shiyahan; meeti bushiishoon shiyeti bi ikkeeti echahan.

⁶ Doono Yeeri wuxiye; wodiinoo iye. Siꞌoolooch daachiihe; aroocheenoo kichiye.

⁷ Doono Yeeri girechon tuniihe; gaannechonoo tuniihe; giishiihe; oogiinoo iye.

⁸ Biyoo girechon buttoochee tiijjiye; gittoonoo tulloochee tiijjiye. Iraasheenaꞌona tookkii boonoshin kotiihe; oogee qeenonoo boonoshich woraashiihe. Showee tuugeenaꞌo Doono Yeerichinaꞌone; boonoshi toommooch showoon kotiihe.

⁹ “Biyoo biich gibeneetinaꞌochi kashoon quyee beetone. Tunebaani gondeenaꞌo manderee daggooch dufaa aallemminaꞌone. Asho wudoon bi danemmo, bi hajjee giidoona toonoone.

¹⁰ Doono Yeerin shixxii beetinaꞌo buricemminaꞌone; biyoo shimaayoochaa boonoshi toommooch gigemmone; Doono Yeeri showee toommo bulliich nallemmone. Bi taatiiti taatoyich giidoon immemmone; bi huuttiti taatoon giidechon tuniyemmone” iyan.

¹¹ Aroochee Eliqaani Raama beeti bi kexooch wotteꞌi hammiye. Tunebaani bushoo Saameeli Shilooha echeꞌi, qeeshoo Eeli aafooch tunee, Doono Yeerich maddee beehe.

Eelichi Bushiisheenaꞌo Shuuneti Gonde Shuunoo

¹² Eeli bushiisheenaꞌo gaacaalleenaꞌone; Doono Yeerin ariyaani asheenaꞌone.

¹³ Qeesheenaꞌo asheenaꞌo waanee boonoshi echemmi mooyoyich icheti doyoon quyeyaaneenaꞌone. Ebiyoo ikke asho deejjoon bi deejjii beegaata, qeeshoochi aafee bushoo keejje gashechi gomoon yechiꞌi waa beehe. Meeno batt kachii beetaa,

¹⁴ shaallaatee daggooch woyee distee daggooch woyee gubee daggooch woyee shexxee daggooch, ebi keejje gashechi gomoon bi daachiitaa, bi yechii kechiti meeno bulli qeeshoyich tunee beehe. Deejjoon deejjiya Shilooha waabeeti Israꞌeeleenaꞌo bulli toommooch ebiyoommon tunii beeheete.

¹⁵ Ebiyoommon wotta, awuyoo batt micaan beetaa, qeeshoochi aafee bushoo waaꞌi, deejjoon giddiibeeti uroon, “Qeeshoo gaare meenonani, kachiti meenon ne waanee deꞌaachemmo bi tunetoyich, biich micheyemmi gaare meenon taach imbe” ii beehe.

¹⁶ Uroo “Shiichiree awuyoo miciichibe. Aroyee gubb ne shunnemmi wottoon daammemmo neene” bi getigaata, ebi aafee bushoo “Tuneyaache; and taach imbe; ne imo qayigaata, giidoona daammemmo taane” ii beehe.

¹⁷ Eeli bushiisheenaꞌo axaaxoo Doono Yeeri aafoochaa ebi shaahoon oogeti maggoo tunetone; ebiyoo Doono Yeerich giddeebeeti deejjoon boonoshi qallayii beetoyichiye.

Saameeli Shiloohaa Doono Yeerich Maddoo

¹⁸ Bushoo Saameeliyoo muttee tuppoochee shippeti efoodoon taheꞌi, Doono Yeeri aafooch maddee beehe.

¹⁹ Bi indeyoo nati natona Yeerich giddeebeeti deejjoon giddiyoyich bi kenoona tookkaa bi hammaabeeti haddoo bullina, giisheche kootoon shippaꞌa, biich daammaa beehan.

²⁰ Arooba Eeli Eliqaaninaa bi mechee Haanninon “Doono Yeerich bi immeti bushoochi keroon Doono Yeeri hini ure waanee bushiishoon neech imbe” iibee diirii beehe. Aroochee boonoshi kexooch wottee beeheete.

²¹ Doono Yeeriyoo Haannin diiriye. Biyoo xifahan. Bare keejje anaami bushiishoonaa gutte maache bushiishoonon shiyahan. Bushoo Saameeliyoo Doono Yeerich maddeebee dicciye.

Eelinaa Bi Bushiisheenaꞌona Mooyo

²² Ebiyooba Eeli oogeton geenetone. Biyoo bi bushiisheenaꞌo Israꞌeeleenaꞌo toommooch boonoshi tuniibeeto bullin, danee duukkaanee kellooch maddeebeeti genneenaꞌon boonoshi qemonoo waayee beehe.

²³ Ebich boonoshich ishichiye: “Ittoshi shuuneebeeti gonde shuunoon asheenaꞌo bulli waanee waayaabeeto taane. Amoyichiye ebiyoommi mooyon ittoshi tuniibeeto?

²⁴ Ta bushiishoocho, ebi tato toonoone. Doono Yeerichi asheenaꞌo daggooch yibbaateebeeti, ebi ta waayaabeeti ittoshi mooyo gaaweto toonoone.

²⁵ Ikke asho baroon bi xuꞌigaata, Yeeri shoobbii beetone. Tunebaani asho Doono Yeerin bi xuꞌigaata, shoobbemmo konine?” iye. Tunebaani bushiisheenaꞌo boonoshi nihoochi ciicoon waayemmon qajjiyeete; ebiyoo Doono Yeeri boonoshin aalliiya gabii maaccito bi tunetoyichiye.

²⁶ Bushoo Saameeli Doono Yeerinaa ashoona naadeebee, neexoon daakkiibee, diccii beehe.

Eelinaa Bi Bushiisheenaꞌona Toommooch Keemmeti Keemo

²⁷ Ikke areddoon ikke Yeer asho, Eeli waan waaꞌi, ishichiye: “Doono Yeer ishichii beetone: ‘Ne qaabbechi Harooninaa bi kechi asheenaꞌona Gibitsee taatoochi guuninaꞌo tuneꞌi boonoshi beetaa, Haroonich bekkehoye.

²⁸ Ta qeeshoo bi tunemmoyich, ta deejjee gudooch bi giddemmoyich, ixaanoon taach bi shookkemmoyich, ta aafoochoo efoodoon bi tahemmoyich, Israꞌeelee yoodeenaꞌo bulli daggoochee biin kaaccoye. Wotta Israꞌeeleenaꞌo taach deejjiibeeti deejjoo bulliichee qoodoo bi kechi asheenaꞌoyich bi beeyemmoyich tuniihoye.

²⁹ Ishigaata, ta beeyi kexooch bi giddemmoyich ta getteti deejjoonaa buuroonon ittoshi qallayiibeeto amoyichiye? Ta asheenaꞌo tuneti Israꞌeeleenaꞌo giddiibeeti deejjoochee gaawi gaaweton maabee ittoshin aangiyoona tayee beshoon ne bushiisheenaꞌon ne oogiyaabeeto, amoyichiye?

³⁰ “ ‘Israꞌeelee Nuggishoo Doono Yeeri ta, ne kechi asheenaꞌonaa ne nihoochi kechi asheenaꞌona bulli yemeenoon taach boonoshi maddemmoyich ebiyee aaf gibenikkito taane. Tunebaani and illa ebin tuniyaachemmo taane. Taan oogii beetinaꞌon oogiyemmo taane. Taan qallayii beetinaꞌo giishemminaꞌone.

³¹ Illa ebiyoche, ne kechi asheenaꞌonaa ne yaroonooch beeti gurimaashoo bullin ta wuxemmi aabo woyemmone. Ebich ne kechi asheenaꞌo daggoochee geene asho daneyaachemmone.

³² Bare Israꞌeeleenaꞌoyich mooyo mashaami beetaa, ne bulli yemeenoon xuuxemmo neene. Ne yaroochee geene asho ciroona daneyaachemmone.

³³ Tunebaani ne yaroochee echeree ta qeeshoon tune maddemmi asho, aafi yaamoonaa bi mullo tiishetona tunemmone. Bare ne yareenaꞌo bulli gurimaashebee qitemminaꞌone.

³⁴ “ ‘Ne gutte bushiishoo Hoofininaa Finihaasina toommooch shaggemmo neech malletoon tunemmone. Boonoshi gutti ikke areddoon qitemminaꞌone.

³⁵ Ta mulleexonaa ta gaboonon ceechemmi, gibeneeti, ta qeeshoon taach kaaccemmo taane. Bi shiijjeroon meeti yemeenoon beeyemmo tuniyemmo taane. Biyoo ta huutteti taatoo aafooch bulli aaboon maddemmone.

³⁶ Ne yaroochee echeti asho koniyoona gijjoonaa maayoonon danoyicha getiree bi aafooch dihi goyinnebee, “Ta maayemmi maayoon ta danemmoyich, yaafee kexeexi shuunoo aabinona ta shuunemmoyich taach daaggibe” getiree qollemmone’ itone” iye.