1 Saameeli 18 - Kafa Linguistics Project

¹ Saaꞌoolinaa Daawitina yibbaatoon ciichiyeete. Aroyee gubb, Yonaataani Daawitich kashoommi nuuchoon tunehe. Biyoo Daawitin bi kashoona tachiꞌi shunniye.

² Aroobee aaboochee tiijjiꞌi Saaꞌooli, Daawiti biinna tookki bi beeyemmoyich tuniihe. Bi nihoo kexooch wotteree bi hammemmoyich daaggaanoone.

³ Yonaataani Daawitin bi kashoona tachiꞌi bi shunnitoyich, biinna tookkii wogoon giyiye.

⁴ Yonaataaniyoo bi taheti iddimoon kichiꞌi Daawitich immiye. Wotta bi tahoon, bi goraadoon, bi maꞌoonaa bi cuyeebeeti shachoonon immiye.

⁵ Saaꞌooli biin daachiiti koyee xaaꞌoo bulliichaa Daawitich mooyo kaamee beehe. Ebich Saaꞌooli bi ginee naayinaꞌo toommooch biin iraashiihe. Ebiyoo Saaꞌoolichi iraasheenaꞌonaa asheenaꞌo bullinon emirikkiye.

Daawiti Toommooch Saaꞌooli Qanaato

⁶ Daawiti Gooliyaadin wuxiꞌi bi wottehooba, ginee naayinaꞌo boonoshi kexooch boonoshi wottee beetaa, genneenaꞌo taatoo Saaꞌoolina daneya Israꞌeelee showooch beeti katemoo bulliichee kechiyeete. Boonoshiyoo kamboonaa ximboonon yechiꞌi duubbiibee capphii ililii beeheete.

⁷ Genneenaꞌo duubbiibee, “Saaꞌooli humeenaꞌon wuxiye; Daawiti aashire humeenaꞌon wuxiye” ii boonoshinaa boonoshina shoddee beeheete.

⁸ Ebi mooyo Saaꞌoolin emirikkaanoone. Saaꞌooli oogeton ippehe. Biyoo “Daawitich aashire humoon immiyeete; tunebaani taach humoon baach immiyeete. Illa ta taatittinoyee besh biich echeto amoone?” iye.

⁹ Aroobee aaboochee tiijjiꞌi Saaꞌooli Daawitin gonde aafoona ciinnii beehe.

¹⁰ Bi dechara Yeeri deejjiti gonde ayaano giidoona Saaꞌooli toommooch kindiye. Bi kexooch beechii geyechochoommon cikkii yibbaatee beehe. Daawitiyoo qemi qemona bi tunii beetoommon, ooge ximboon yexxii kaachii beehe. Saaꞌooli bi kishooch ginoon yechitone.

¹¹ Biyoo Daawitin daabboona xaaqqiya iꞌi bi ginoon awurehe. Tunebaani Daawiti gutte wottoon bi aafoochee ikiye.

¹² Doono Yeeri biin qajjiichii Daawitina tookkii bi tunetoyich, Saaꞌooli Daawitin shattiye.

¹³ Ebich Saaꞌooli Daawitin bi aafoochee wokkiiꞌi, hume ginee iraashoon tuniihe. Daawitiyoo bi ginee naayinaꞌon dabbiiꞌi koyee xaaꞌooch daammii, deebii beehe.

¹⁴ Doono Yeeri Daawitina tookkii tunehe. Ebich biinnaa bi ginee naayinaꞌona boonoshi koyeti xaaꞌoo bulliichaa kochii wochii beeheete.

¹⁵ Saaꞌooliyoo Daawitich mooyo kaamoon beeggiꞌi, aafichoyee beshoon biin shattiye.

¹⁶ Israꞌeeleenaꞌonaa Yihudee asheenaꞌona bulloshi Daawitin shunniyeete. Ebiyoo ginoochaa boonoshiyee aaf tuneꞌi koyiibeeto, Daawiti bi tunetoyichiye.

Saaꞌooli Bushee Mikaalin Daawiti Shaago

¹⁷ Saaꞌooliyoo Daawitich ishichiye: “Ta qaabbe bushee Meraabi beetine. Biin neech shaakkiyemmo taane. Ne baach gibeneetonaa ginee anaamonon tuneree taach maddebee, Doono Yeerichi ginoon koyebe” iye. Saaꞌooli bi ishichito, “Filsixeemeenaꞌo kishoona qitiballi, ta kishoona qitaaye” iꞌi bi gabitoyichiye.

¹⁸ Daawiti Saaꞌoolich ishichiye: “Taatoochi bushee keno tunemmi tawochi, koni taane? Ta nihoochi kechi asheenaꞌo, ta yaroo Israꞌeeleenaꞌo daggoochee konine?” iye.

¹⁹ Saaꞌooli bi bushee Meraabi Daawitich bi shaakkeyeshi aabo shaggiyooba, biin Meholatechi Adirelich shaakkiihe.

²⁰ Tunebaani Saaꞌooli bushee Mikaali Daawitin shunnahan. Saaꞌooliyoo ebi mooyon waayeꞌi emiriye.

²¹ Biyoo “Mikaalin biich shaakkiyemmo taane. Aroochee biin biich ollo tuniyemmo taane. Ebina Filsixeemeenaꞌo kishoona aallemmone” iꞌi bi mulloona gabiye. Ebich Saaꞌooli Daawitich “Ta bushee kenoon tunemmo neene” iꞌi guttinnoon gettiye.

²² Aroochee Saaꞌooli bi naayinaꞌoyich “Daawitin ‘Taatoo neenna emiritone. Bi naayinaꞌo bulliyoo neen shunnitinaꞌone. And illa ebich taatoochi busheen shaage’ getiree aashoona biich getote” iye.

²³ Boonoshiyoo ebin Daawitich gettiyeete. Biyoo “Taatoochi bushee kenoon tuno ittoshich kette mooyo shaahii beete? Ta, girecho, wotta aricheyaani asho taane” iye.

²⁴ Saaꞌoolichi naayinaꞌo hammiꞌi, ebi Daawiti gettiton Saaꞌoolich gettiyeete.

²⁵ Saaꞌooliyoo “Daawitich ishichibote; ‘Taatoo bi etteenaꞌo toommooch nichoon kichoon bi qaawii beetoyich, ne waanee bi qaawiibeeti xiloosho, balle Filsixeemeenaꞌon wuxiꞌi boonoshi shookoon ne deebon baachiye’ getote” iye. Saaꞌooli bi ishichito, Daawiti Filsixeemeenaꞌo kishoona bi qitemmoyich bi qaawitoyichiye.

²⁶ Saaꞌoolichi naayinaꞌo hammiꞌi, Saaꞌooli gettiton Daawitich gettiyeete. Daawitiyoo taatoochi bushee keno bi tunemmoyich gabeeti gaboona emiriye. Ebich taajjeeti aabo besheyaan beetaa,

²⁷ Daawitinaa bi asheenaꞌona tiyii hammiꞌi gutte balle Filsixeemeenaꞌon wuxiyeete. Daawiti taatoochi bushee keno bi tunemmoyich, boonoshi shookoo bullin haddiꞌi taatoyich immiye. Aroochee Saaꞌooli bi bushee Mikaalin Daawitich shaakkiihe.

²⁸ Saaꞌooli Doono Yeeri Daawitina tookkii bi tunoon, wotta bi bushee Mikaali Daawitin shunon xiishii ariihe.

²⁹ Saaꞌooliyoo aafichoyee beshoon biin shattiye. Biyoo kashoona beebee bi echeti yemeeno bullin Daawitich etto tunehe.

³⁰ Filsixeemee ginee iraasheenaꞌo kechiꞌi wochii wochii koyee beeheete. Tunebaani gino koyeebeeti aabo bullin, Saaꞌoolichi bare ginee iraasheenaꞌoyee beshoon kochii wochoona Daawitich mooyo kaamee beehe. Ebina bi shigo aricheton tunehe.