1 Saameeli 17 - Kafa Linguistics Project

Israꞌeelee Ginee Naayinaꞌon Gooliyaadi Shatiyoo

¹ Filsixeemeenaꞌo gino koyeya boonoshi ginee naayinaꞌon Yihudee showooch beeti Sokooha kiciyeete. Boonoshiyoo Sokoohinaa Azeqina daggooch beeti, Efes Damiim kaamboon geddiꞌi koteheete.

² Saaꞌoolinaa Israꞌeeleenaꞌona kiceeꞌi Elaahi bambooch kaamboon geddiꞌi koteheete. Boonoshiyoo Filsixeemeenaꞌona tookki koyeya yaaroona kechiyeete.

³ Bamboo boonoshi gutte daggooch tunemmona, Filsixeemeenaꞌo ikke baddi geppooch neexeheete; wotta Israꞌeeleenaꞌo bare baddi geppooch neexeheete.

⁴ Gaatee waati, bi neexo shiritte hiraa ciixon tuneti, Gooliyaadi getteebeeti, aricheti ginee anaamo Filsixeemeenaꞌo kaamboochee kechiye.

⁵ Biyoo gooshoochee shuuneeti ukoon ukeꞌi, shiche kiilo giraam bede gooshoochee shuuneeti getee ginee tahoon tahetone.

⁶ Bi borboroochoo gooshoochee shuuneeti gambaalloon gedditone. Gooshoochee shuuneeti ginoon bi gogooch gedditone.

⁷ Bi ginee yaaboo qoreddee shippechochi waanjoommi (shobboommi) uuroone. Bi ginee aafo shuuneeti xuuroo shabaatte kiilo giraam bedoone. Gaachoon shaaggiibeeti bi naayoo biyee aaf hammii beehe.

⁸ Gooliyaadiyoo neexeechii, yaaroona neexeti Israꞌeelee ginee naayinaꞌoyich ishichiꞌi cookiye: “Yaaroona neexeꞌi, meniich amooniye ittoshi hallii beeto? Ta Filsixeemo ta, ittoshi wotta Saaꞌoolichi guuno ittoshi toone? Ikke ashoon ittoshi kaacaa dugilla ta waan wobe.

⁹ Biyoo taanna koyeꞌi taan bi wuxigaata, no ittoshich guunon tunemmo noone. Tunebaani biin kochaꞌa ta wuxigaata, ittoshi no guunon tunemmo ittoshine; noochoo hajjeyemmo ittoshine” iye.

¹⁰ Are Filsixeemo daakkiꞌi, “Hanaach Israꞌeelee ginee naayinaꞌon miichoye. Eke ikke ashoon ittoshi imaa koyebone” iye.

¹¹ Saaꞌoolinaa Israꞌeeleenaꞌo bullina ebi Filsixeemee asho gettiton boonoshi waayehooba, oogeton keqqii shattiyeete.

Ginee Kaambooch Daawiti Hamo

¹² Daawitiyoo Yihudee showooch, Beetilehem beeti Efiraatee asho Iseyi bushoone. Iseyich shimitte anaami bushiishoo beetone. Biyoo Saaꞌoolichi taatittinee yemeenooba geenee baayetone.

¹³ Keejje qaabbe bi bushiisheenaꞌo Saaꞌoolin dabbiꞌi ginooch hammitinaꞌone. Boonoshiyoo qaabboochi shigo Eliyaabi, bi hilloocho Abinadaabi, wotta keejjinnoocho Shaami getteehe.

¹⁴ Daawiti bullichi guuche ciiroone. Keejje qaabbe bi maneenaꞌo Saaꞌoolin dabbitinaꞌone.

¹⁵ Daawitiyoo bi nihoochi bageenaꞌon quyoyich Saaꞌool waanee Beetilehem hammii, waa beehe.

¹⁶ Are Filsixeemee uro aabbe qemi wottoon maaddinaa womikkinon kechii boonoshich bekkeꞌi, boonoshin miichee beehe.

¹⁷ Ikke areddoon Iseyi bi bushoo Daawitich ishichiye: “Ebi keejje qunnee bungee gaawoonaa aashire xekee koshonon yeshiree, ne maneenaꞌo beeti ginee kaambooch kaateree hambe.

¹⁸ Ebi aashire kaafee mookoonoo boonoshi beeti hume ginee iraashoyich daami imbe; ne maneenaꞌochi achee diggoon eche waayeree, boonoshi diggittinoon bekkiibeeti malletoon taach yeshi wobe” iye.

¹⁹ Areegaata Saaꞌooli, Daawiti maneenaꞌonaa bare Israꞌeeleenaꞌo bullina Elaahi bamboochaa Filsixeemeenaꞌona koyee beetinaꞌone.

²⁰ Daawiti bi dechara maaddoona tiyiꞌi, bageenaꞌon bare ashoona quyiichii, Iseyi gettitoommon, maayoon yechiꞌi hammiye. Biyoo ginee naayinaꞌo kokkorii cookiibee, yaaroona koyooch boonoshi kechaahaa, boonoshi kaambooch shaggiye.

²¹ Israꞌeeleenaꞌonaa Filsixeemeenaꞌona boonoshi xaaꞌi xaaꞌoona koyoyich qanniꞌi, ciinee neexee beeheete.

²² Daawiti bi daammiti maayoon, qiicee ukkiroyich immiichii, ginee koyee xaaꞌooch wocona hammiye. Bi maneenaꞌon daneꞌi boonoshi achee diggoon echehe.

²³ Boonoshina tookkii yibbaatee bi beetaa, Gaatee waati, Filsixeemechi ginee anaamo, biyoo Gooliyaadi, ginechinaꞌo daggoochee aaf giddeꞌi ebiyee aafichoommon andoo yibbaatehe. Daawitiyoo ebin waayehe.

²⁴ Israꞌeeleenaꞌo uroon boonoshi beeggiyooba, bulliyona oogeton shattiꞌi woceheete.

²⁵ Israꞌeeleenaꞌo boonoshinaa boonoshina “Ebi qemi qemona kechiꞌi Israꞌeeleenaꞌon miicheebeeti uroon beeggiyote? Ebi uroon wuximmoyich taatoo wodde gijjoon wojjemmone. Bi busheenoo biich shaakkiyemmone. Israꞌeeleenaꞌo daggooch bi nihoo kechi asheenaꞌonoo gibiroochee wodiyemmone” iyeete.

²⁶ Daawitiyoo bi gaꞌooch neexeebeeti asheenaꞌon “Ebi Filsixeemoon wuxiꞌi ebi shaahe yeelloon Israꞌeeleenaꞌo toommoochee wokkiimmoyich, amoone ichemmo? Wotta Beeyechi Nuggishoo Yeerichi ginee naayinaꞌon bi miichemmoyich, ebi dokireyaani Filsixeemo, halla konine?” iꞌi echehe.

²⁷ Boonoshiyoo “Biin wuximmi ashich ichemmo, ebi ebine” iꞌi shiichiꞌi boonoshi gettiton wochinnoon gettiyeete.

²⁸ Qaabbe bi manoo Eliyaabi Daawiti asheenaꞌona tookkii bi yibbaatee beetaa waayehe. Biyoo oogeton kaareꞌi, “Aakkiya hiniich waanne? Are giisheche bageenaꞌon barahooch konich duppaachaa waanne? Geecechonaa gonde mullechona ne tunoon ariibeeto taane. Ginee koyoon beeggane ne waato” iye.

²⁹ Daawitiyoo “Amooniye ta hallito? Echoon hakkaachemmo taane?” iye.

³⁰ Aroochee Daawiti bare asheenaꞌo waan guuddiꞌi, are bi echetoommon echehe. Bi echeti asheenaꞌo bulli, shiichiꞌi bi waayetoommon, biich wochiyeete.

³¹ Ebi Daawiti gettiton ikkikke asheenaꞌo waayeheete. Boonoshiyoo Saaꞌoolich gettiyeete. Saaꞌooliyoo bi waan Daawiti woyemmoyich wochiihe.

³² Daawitiyoo Saaꞌoolich “Ebi uroyich koniyoona shati keqqaaye. Ne guuno ta hamiree ebi Filsixeemoon kochemmo taane” iye.

³³ Saaꞌooliyoo Daawitin “Ne batt giisheche bushoo neene. Tunebaani ebi uro bi bushittinoochee tiijjiꞌi koyoon doyiti uroone. Ebich hammii biinna koyoon hakkaachemmo neene” iye.

³⁴ Tunebaani Daawiti Saaꞌoolich wochiꞌi, “Ne guuno ta, ta nihoochi bagoon ta quyaa beehooba, daaheroo woyee diibo waaꞌi, bageenaꞌo daggoochee ikke bagoon bi daamigaata,

³⁵ tawoo bi hillooch hammaa yexxaꞌa, bi kookkoochee dichiibeeto taane; ta waan bi guudi gaatoo, bi qettee dolloona yechaachaa, yexxaꞌa wuxaabeeto taane.

³⁶ Ne guuno ta, daaheroonaa diiboonon wuxito taane. Ebi dokireyaani Filsixeemo beeyechi Nuggishoo Yeerichi ginee naayinaꞌon bi miichetoyich, biyoo boonoshi qitoommon qitemmone.

³⁷ Daaheroonaa diiboonochi kishoochee taan wodiiti Doono Yeeri, hini Filsixeemo kishoochee taan wodiyemmone” iye. Saaꞌooliyoo “Ishigaata, tunebe. Doono Yeeri neenna tookki tunebe” iye.

³⁸ Aroochee Saaꞌooli Daawitich bi tahoon tajjiye; gooshoochee shuuneeti ukoonoo ukiihe; bi getee ginee tahoonoo tajjiye.

³⁹ Daawitiyoo goraadoon ebi tahee toommooch cuyeꞌi shaaddeya bi getaa, biin mawiye. Ebiyoo, aroyee aaf ebiyoommi tahoon tahee ariyaano bi tunetoyichiye. Biyoo Saaꞌoolich “Ebi tahoon tahaꞌa doyaano ta tunetoyich, tahaꞌa shaaddoon hakkaano taane” iye. Ebich bi taheti tahoon shoottiye.

⁴⁰ Aroochee bi gumbeen bi kishooch yechiye. Aacooch hammii uuche xaqqee haalleenaꞌon tiijjiꞌi, bagoon quyeebee bi kalleebeeti bi kollooch geddiye. Bi xeppelloonoo bi kishooch yechiꞌi, are Filsixeemo waan giddehe.

Daawiti Gooliyaadin Wuxoo

⁴¹ Are Filsixeemo gaachoon shaaggiibeeti bi naayon bi aaf shiichiiꞌi, Daawit waan giddee waahe.

⁴² Biyoo Daawitin manjii ciinniꞌi, dama qeece, mallet gaawe giisheche bushoo bi tunetoyich qallayiye.

⁴³ Biyoo Daawitich “Gumboon yechaꞌa ta waan ne waabeeto ta, kunaanoo taane?” iye. Bi nuggisheenaꞌo shigoon ceeggiꞌi, Daawitin uppiye.

⁴⁴ Biyoo daakkiꞌi, “Eke ta waan wobe; ne meenon shimaajji gacoonaa kubbi cooxonoyich tuniyemmo taane” iye.

⁴⁵ Daawitiyoo biich ishichiye: “Ne, goraadoon, giishi ginoonaa ooge ginoonon yechaꞌa ta waan waabeeto neene. Tunebaani ta, ne miicheti, Israꞌeelee ginee naayinaꞌo Nuggishoo tuneti, Beshe Mawe Doono Yeeri shigoona ne waan waabeeto taane.

⁴⁶ Hanaach Doono Yeeri neen ta kishooch beshiiree immemmone. Tawoo neen yexi dichiree, ne qettoon kuxxemmo taane. Filsixeemee ginee naayinaꞌo dubenoonoo shimaajji gacoonaa kubbi cooxonoyich hanaach immemmo taane. Showee toommooch beeti asho bulli Israꞌeeleenaꞌo waan Nuggishoo beemon ariyemmone;

⁴⁷ hiniich kiceetinaꞌo bulli Doono Yeeri wodii bi beeto, goraadoonaa ginoona tunee bi qayonoo ariyemminaꞌone. Doono Yeeri kochii wochecho bi tunetoyich, ittoshin no kishooch beshiiree immemmone” iye.

⁴⁸ Are Filsixeemo Daawitin kocha bi waan giddee bi beetaa, Daawiti biinna koyeya koyee xaaꞌooch wocona hammiye.

⁴⁹ Bi kolloochee ikke xaqqeen kichii xeppellooch geddiꞌi awuree, are Filsixeemoochi barooch yexxiye. Xaqqoo bi baroon hottiꞌi giyiye. Biyoo baroona showooch guufehe.

⁵⁰ Ebiyoommi gommona Daawiti xeppelloonaa xaqqoona baach are Filsixeemoon yexxii wuxiye. Daawiti kishooch goraado aalloone.

⁵¹ Daawitiyoo wocona hammii bi toommooch neexehe. Are Filsixeemoochi goraadoon bi gonenoochee kaacciye. Biin wuxiꞌi bi qettoon goraadoona kuxxiye. Filsixeemeenaꞌo boonoshi ginee anaamo qitoon beeggiꞌi, wocee aalleheete.

⁵² Israꞌeeleenaꞌonaa Yihudee asheenaꞌona kokkorii cookiibee Gaat beddaahaa, wotta Eqirooni katemee kellooch beddaahaa yookkii dabbiyeete. Shaꞌarayimi katemooch daammiibeeti gommooch beeti Gaatinaa Eqirooninooch beddaahaa Filsixeemeenaꞌo dubeno dihiꞌi beehe.

⁵³ Israꞌeeleenaꞌo Filsixeemeenaꞌon yoohoochee wotteꞌi, boonoshi kaamboon bosheheete.

⁵⁴ Daawitiyoo are Filsixeemo qelloon yechiꞌi Yerusaalem daammiye; tunebaani are Filsixeemoochi ginee qiicoon Daawiti bi duukkaanooch kotiihe.

Daawiti Saaꞌooli Aafooch Giddo

⁵⁵ Daawiti Gooliyaadina koyeya bi hammii beetaa Saaꞌooli beeggiꞌi, bi ginee iraashoo Abeneerin “Abeneero, ebi bushoo koni bushoone?” iꞌi echehe. Abeneeriyoo “Taatoocho, ne kashoona wogehoye. Ta ariyaano taane” iye.

⁵⁶ Taatoo wochiꞌi, “Koni bushoo gaata eke hami eche waayebe” iye.

⁵⁷ Daawiti are Filsixeemoon wuxiꞌi bi wottetoyee gubb, Abeneeri biin Saaꞌool waan daammiye. Areegaata Gooliyaadi qello Daawiti kishooch beetone.

⁵⁸ Saaꞌooliyoo biin “Gurimaashoocho, koni bushoo neene?” iꞌi echehe. Daawitiyoo “Ta, Beetilehemechi ne guuno Iseyi bushoo taane” iye.