1 Saameeli 16 - Kafa Linguistics Project

Taatoo Bi Tunemmoyich Daawiti Huutteyoo

¹ Doono Yeeri Saameelich ishichiye: “Israꞌeelee taatoo bi tuneyaachemmoyich biin ta qallayiti Saaꞌoolich tuumi ayini ne beeyemmo, aati wottooniye? Ne xoofooch zayitoon ceechiree, Beetilehem beeti Iseyi waan hambe. Tawoo bi bushiisheenaꞌo daggoochee taatoo bi tunemmoyich ikkoon taach kaacceto taane” iye.

² Saameeliyoo “Aabichireeshiye ta hammemmo? Saaꞌooli waayegaata, taan wuxemmone” iye. Doono Yeeriyoo ishichiye: “Ikke gidereen yeshi hamiree, Doono Yeerich deejjoon giddiiya ne womon gete.

³ Iseyinoo arooch ceege; aroochee ne tuniyemmon neech bekkiyemmo taane. Neech ta bekkiimmi ashoonoo taach huute” iye.

⁴ Saameeliyoo Doono Yeeri gettiton tuniihe; Beetilehem hammiye. Are katemoon qeejjiibeeti geeneenaꞌo qeweebee bi waan waaꞌi, “Diggoyichiye ne waato?” iyeete.

⁵ Saameeliyoo “Eeha, diggoone. Ta waato, Doono Yeerich deejjoon giddiyoyichiye. Ittoshi qelloon yaafiree, taanna tookki deejjee xaaꞌooch wobote” iye. Aroochee Iseyinaa bi bushiisheenaꞌonon yaafiye. Deejjee xaaꞌooch boonoshi woyemmoyichoo ceeggiye.

⁶ Boonoshi waammona, Saameeli Eliyaabin beeggiꞌi, “Iberoon Doono Yeeri huuttiti asho bi aafooch neexetone” iye.

⁷ Tunebaani Doono Yeeri Saameelin “Bi malletee gaawoon woyee bi neexee genjoon ciinnaahine; ta biin qallayito taane. Doono Yeeri ta, asho ciinnii beetoommon toonoone ta ciinnaabeeto. Asho ashi aafooch ciinniye; tunebaani Doono Yeeri ta, ashi mullooch ciinnehoye” iye.

⁸ Aroochee Iseyi Abinadaabin ceeggiꞌi, Saameelichi aafoona bi beshemmoyich tuniihe. Tunebaani Saameeli “Doono Yeeri hinin kaacaanoone” iye.

⁹ Aroochee wotta Iseyi Shaami beshemmoyich tuniihe. Saameeli “Hininoo Doono Yeeri kaacaanoone” iye.

¹⁰ Iseyi shabaatte bi bushiisheenaꞌo Saameelichi aafoona boonoshi beshemmon tuniihe. Saameeliyoo Iseyich “Doono Yeeri eboshin kaacaanoone” iye.

¹¹ Aroochee Saameeli Iseyin “Ne bushiisheenaꞌo eboshi baachiye?” iye. Iseyiyoo “Bullichi guuchoo hiniich waataanoone. Biyoo bagee quyoochiye bi beeto” iye. Saameeliyoo “Eke ne wochetaa wobe; bi waammi wottoon koteree maayoon maataachemmo noone” iye.

¹² Ebina Iseyi wocheꞌi bi woyemmoyich tuniihe. Biyoo dama qeeco, mallet gaawoonaa gaawe aafechonane. Doono Yeeriyoo “Ta kaacceto hinine; tiyiree huute” iye.

¹³ Aroochee Saameeli zayitee xoofoon tiijjiꞌi, bi maneenaꞌo aafooch biin huuttiye. Aroobee aaboochee tiijjiꞌi, Doono Yeerichi Ayaano Daawiti toommooch giidoona kindiye. Aroochee Saameeli Raama wotteꞌi hammiye.

Saaꞌoolich Daawiti Maddoo

¹⁴ Doono Yeerichi Ayaano Saaꞌool waanee wokkiye. Gonde ayaanoon Doono Yeeri deejjaa, biin xuuxiihe.

¹⁵ Bi naayinaꞌo biich ishichiyeete: “Ebiyoche, gonde ayaanoon Yeeri deejjaa, neen xuuxii beetone.

¹⁶ Ebich no doonocho, ooge ximboon yexxii kaayon hakkiibeeti ashoon no qaawemmoyich, ne daaggaa qaawi deebone. Biyoo Yeeri deejjiti gonde ayaano ne toommooch bi waagaata, ooge ximboon yexi kaachemmone; ebina ne achooch gaawemmone” iyeete.

¹⁷ Ebich Saaꞌooli bi naayinaꞌon “Ooge ximboon gaawichiꞌi yexxii kaayon hakkiibeeti ashoon qaawiree taach deebote” iye.

¹⁸ Bi naayinaꞌo daggoochee ikkoo ishichiye: “Ooge ximboon gaawichiꞌi yexxii kaayon hakkiibeeti, Beetilehemechi Iseyi bushoon beeggeto taane. Biyoo ginee anaamonaa koyoyich kupphoonane; wotta mashaamiti yibbaatechonaa gaawe malletechonane. Doono Yeeriyoo biinna tookkii beetone” iye.

¹⁹ Ebich Saaꞌooli “Bagoon quyeebeeti ne bushoo Daawitin taach deejjibe” iꞌi wocheyechinaꞌon Iseyi waan daachiihe.

²⁰ Iseyiyoo koshonaa ikke mollexxee woyinee uyoonon kurooch xaaniꞌi, ikke emmishee bushoona tookkii Daawitichi kishoona Saaꞌoolich daachiihe.

²¹ Daawiti Saaꞌool waan waaꞌi biich maddooch giyiye. Saaꞌooliyoo biin oogichiꞌi shunniye. Bi quyee naayon tuniihe.

²² Aroochee Saaꞌooli “Daawitin oogichaꞌa ta shunnetoyich, ta waan beeree taach bi maddemmoyich daaggibe” iꞌi Iseyich wochoon daachiihe.

²³ Aroobee aaboochee tiijjiꞌi, Yeeri deejjiti gonde ayaano Saaꞌooli toommooch bi waagaata, Daawiti bi ooge ximboon deebiꞌi yexxii kaachii beehe. Ebina Saaꞌooli achooch gaawee beehe; gonde ayaanoo bi waanee wokkii beehe.