1 Saameeli 15 - Kafa Linguistics Project

Amaleeqeenaꞌon Saaꞌooli Koyo

¹ Saameeli Saaꞌoolich ishichiye: “Zayitoon huutiree bi asheenaꞌo tuneti Israꞌeeleenaꞌo toommooch neen ta taatiyemmoyich Doono Yeeri bi wocheto taaniye. Andoo Doono Yeeri gettii beeton waayebe;

² Beshe Mawe Doono Yeeri ishichiye: ‘Israꞌeeleenaꞌo Gibitsee boonoshi keyiyooba, Amaleeqeenaꞌo gommoochaa boonoshina koyetoyich, boonoshin sheeremmo taane.

³ And hamiree Amaleeqeenaꞌon koye; boonoshich beeti mooyo bullin ciroona aalliibe; koninolla echiyaahine; anaamon, maacheen, bushoonaa gaggeroonon wuxibe; wotta boonoshi gattoon, bagoonaa emmishoonon, gaaleenaa kuroonon wuxibe’ itone” iye.

⁴ Ebich Saaꞌooli bi asheenaꞌon Xelayim ceeggii kiciꞌi aroochaa haddiye. Israꞌeelee showoochee baatechi gutte balle hume ginee naayinaꞌo, wotta Yihudee showoochee aashire hume ginee naayinaꞌo tuneheete.

⁵ Aroochee Saaꞌooli Amaleeqeenaꞌochi katemooch hammiꞌi ikke bambooch aasheꞌi quyehe.

⁶ Saaꞌooliyoo Qeeneenaꞌoyich ishichiye: “Ittoshi Israꞌeeleenaꞌo Gibitsee keyiyooba, boonoshich deꞌe mooyon tuniito ittoshine. Amaleeqeenaꞌo waanee wohote. Ebi tuno qayigaata, boonoshina tookki ittoshin aalliyemmo taane” iye. Ebich Qeeneenaꞌo Amaleeqeenaꞌo waanee wokkiyeete.

⁷ Aroochee Saaꞌooli Hawilee tiijjiꞌi Gibitsaa aabi-keyo waan beeti Shuur beddaahaa Amaleeqeenaꞌon dabbiꞌi kochiye.

⁸ Amaleeqee taatoo Agaagin kashoona kecciꞌi deebiye. Bi asheenaꞌo bullin goraadoona hidii aalliihe.

⁹ Saaꞌoolinaa asheenaꞌona Agaagin, gaawi gaaweto tuneti bagoon, gattoon, gubbenoonaa bagee baaddoonon, gaaweto tuneti mooyo bullin wuxii aalliyoon qajjiyeete. Tunebaani gaacaalleenaꞌonaa gitteenaꞌonon baach wuxii aalliiheete.

Saaꞌoolichi Taatittinoon Doono Yeeri Qayo

¹⁰ Doono Yeeri Saameelich ishichiye:

¹¹ “Saaꞌoolin ta taatiitoyich ayinito taane. Biyoo taan dabboon qajjitone; ta getoonoo ceechemmon qajjitone” iye. Saameeliyoo ippehe; xumo bullinoo Doono Yeer waan cookiye.

¹² Saameeliyoo maaddoona tiyiꞌi, Saaꞌoolina daneya hammiye. Biyoo “Saaꞌooli Qermeloos hammiꞌi, biich haawulitoon shuuniitone. Aroochee wotteꞌi Galigala kinditone” getaa waayehe.

¹³ Saameeliyoo hammiꞌi Saaꞌoolina danehe. Saaꞌooliyoo biin “Doono Yeeri neen diiribe; Doono Yeerichi getoon ceechito taane” iye.

¹⁴ Saameeliyoo “Ishigaata, ebi ta waayaabeeti, qaaddiibeeti bageenaꞌochi qaaroonaa gatteenaꞌochi qaaroona, amoone?” iꞌi echehe.

¹⁵ Saaꞌooliyoo wochiꞌi, “Eboshi ginee naayinaꞌo Amaleeqeenaꞌo waanee boonoshi deebitinaꞌone. Asheenaꞌo gaawi gaawe bageenaꞌonaa gatteenaꞌonon boonoshi echiito, ne Nuggishoo Doono Yeerich deejjoyichiye. Tunebaani echetinaꞌon ciroona wuxaa aalliito noone” iye.

¹⁶ Saameeliyoo “Cikki beechibe; Doono Yeeri yiichi xum taach gettiton neech getona” iye. Saaꞌooliyoo “Gete” iye.

¹⁷ Saameeliyoo ishichiye: “Ne qelloon wochaꞌa ne qallayitaanona, Israꞌeelee yoodeenaꞌo toommooch iraashoo tuneto neene. Doono Yeeri Israꞌeelee taatoo ne tunemmoyich neen huuttitone.

¹⁸ Doono Yeeriyoo ‘Hamiree ebi axaaxechinaꞌo tuneti Amaleeqeenaꞌon ciroona wuxi hidi aalliibe; boonoshi aallemmi wottoon koye’ iꞌi neen wochehe.

¹⁹ Ishigaata, amoyich Doono Yeerichi getoon ceechemmon qajjenne? Amoyich kecceyemmi mooyon bogoyich dafeeꞌa, gonde mooyon Doono Yeeri aafooch shuunenne?” iye.

²⁰ Saaꞌooliyoo Saameelich “Doono Yeerichi getoon ceechito taane. Taan bi wochetoochoo hammeto taane. Amaleeqeenaꞌon ciroona hidaa aalliyaachaa, boonoshi taatoo Agaagin deebeto taane.

²¹ Tunebaani asheenaꞌo aallebeete getteeti gaawi gaawe mooyinaꞌon, bageenaꞌonaa gatteenaꞌonon ne Nuggishoo Doono Yeerich Galigalaa deejjoon giddiyoyich deebitinaꞌone” iye.

²² Saameeliyoo ishichiye: “Doono Yeeri bi qaaroyich deꞌa getona bi emiroommon, deejjoonaa buuroonon giddiyoona emirehe? Iberoon biich deꞌa geto deejjoon deejjoyee, bi getoon waayoo bagee baaddoochi awuyon deejjoyee beshoone.

²³ Hukkoon shuuno kaayee axaaxoon shuunoommone; babberittinoo shahalloyich goyinnoommi gonde mooyone. Ne, Doono Yeerichi getoon ne qajjetoyich, biyoo taatoo ne tuneyaachemmoyich neen qajjitone” iye.

²⁴ Saaꞌooliyoo Saameelich “Axaaxoon shuuneto taane. Doono Yeerichi getoonaa ne qaaroonon shaaddeto taane. Asheenaꞌon ta shattetoyich, boonoshi getoon ceechito taane.

²⁵ Illa and ta axaaxoon ne maaremmoyich neen qollehoye. Doono Yeerich ta goyinnemmoyich taanna tookki wottebe” iye.

²⁶ Saameeliyoo wochiꞌi, “Neenna tookki wotteyaache. Doono Yeerichi getoon ne qajjetoyich, Doono Yeeri Israꞌeelee taatoo ne tuneyaachemmoyich neen qajjitone” iye.

²⁷ Aroochee Saameeli bi hilla wotteya bi guuddimmona, Saaꞌooli bi qoreddee caappoon yechiye. Tahoo keexehe.

²⁸ Saameeliyoo ishichiye: “Doono Yeeri Israꞌeeleenaꞌochi taatittinoon hanaach ne waanee keexxiꞌi, neyee besho tuneti bare ashich immitone.

²⁹ Israꞌeeleenaꞌochi oogee yiiroo tuneti Yeeri kootaache; bi gaboonoo shaddaache. Bi gaboon bi shaddemmoyich, bi asho toonoone” iye.

³⁰ Saaꞌooliyoo wochiꞌi, “Axaaxoon shuuneto taane. Tunebaani ta asheenaꞌochi ukkireenaꞌonaa Israꞌeeleenaꞌo bullinochi aafooch taan oogiibe; ne Nuggishoo Doono Yeerich ta goyinnemmoyich taanna tookki wottebe” iye.

³¹ Ebich Saameeli biinna tookkii wottehe. Saaꞌooliyoo Doono Yeerich goyinnehe.

³² Saameeliyoo “Amaleeqeenaꞌo taatoo Agaagin taach deebote” iye. Agaagiyoo “Iberoon qitoo ebiyoommi caamoone?” ii shattii qeweebee waahe.

³³ Saameeliyoo “Ne goraado maacheenaꞌon bushaalleenaꞌo bi tuniyoommon, ne indeyoo maacheenaꞌo daggooch bushaalle tunemmine” iꞌi, Agaagin Doono Yeeri aafoochaa, Galigalaa qecciqeccaayii wuxiye.

³⁴ Aroochee Saameeli Raama hammiye. Saaꞌooliyoo Gibaaha beeti bi kexooch wottehe.

³⁵ Saameeliyoo bi qitimmi wottoon Saaꞌoolina wochinnoon daneyaanoone. Biyoo Saaꞌoolich eeppiye. Doono Yeeriyoo Saaꞌoolin Israꞌeelee taatoo bi tuniitoyich ayiniye.