1 Saameeli 12 - Kafa Linguistics Project

Ciireexi Saameelichi Yibbaatoo

¹ Aroochee Saameeli Israꞌeeleenaꞌo bullich ishichiye: “Ebiyoche, taach ittoshi gettito bullin waayaꞌa, taatoon ittoshi toommooch taatiito taane.

² Illa and ebiyee damba ittoshin yaabi qeejjemmo biine. Tawoo geenaa bukketo taane. Ebiyoche, ta bushiisheenaꞌo ittoshina tookkii beetinaꞌone. Tawoo gurimaashittinoochee tiijjaꞌa and beddaahaa, ittoshin yaabaa qeejjaabee echeto taane.

³ And ittoshi aafooch neexeto taane. Illa Doono Yeerinaa bi huuttitonochi aafoochaa ta toommooch miixebote; koni gattooniye ta deqqeto? Koni kurooniye ta deqqeto? Koniniye ta dawushito? Wotta koniniye ta xuqqeto? Beeggaabee beegaanoon shaahaꞌa koni waaneeniye xuccoon ta maato? Ebiichee ikkoonolla tuniito ta tunegaata, ittoshich wochemmo taane” iye.

⁴ Boonoshiyoo wochiꞌi, “Noon dachaano neene; xuꞌaano neene. Ashi waanee amoonolla deꞌaano neene” iyeete.

⁵ Saameeliyoo “Ebi mooyoyich xalloo ta tunoyich, Doono Yeerinaa bi huuttitona hanaach ittoshi toommooch miixeenaꞌone” iye. Boonoshiyoo “Doono Yeeri miixoone” iyeete.

⁶ Saameeliyoo daakkiꞌi asheenaꞌoyich ishichiye: “Muusinaa Harooninon kaacciti, wotta ittoshi qaabbechinaꞌon Gibitsee kichiti Doono Yeeri miixoone.

⁷ Andoo Doono Yeeri ittoshinaa ittoshi qaabbechinaꞌonoyich bi tuniiti cadiqee shuunoyich Doono Yeeri aafoochaa ittoshin taggemmo ta tunetoyich, ebi ittoshi beetooch neexebote.

⁸ “Yaaqobinaa bi bushiisheenaꞌona Gibits boonoshi hammitoyee gubb, Gibitseenaꞌo boonoshin xuuxiitoyich ittoshi qaabbechinaꞌo Doono Yeer waan cookiyeete. Doono Yeeriyoo Muusinaa Harooninon daachiihe. Boonoshiyoo ittoshi qaabbechinaꞌon Gibitsee kichiꞌi hini showooch boonoshi kotemmoyich tuniiheete.

⁹ “Tunebaani asheenaꞌo boonoshi Nuggishoo tuneti Doono Yeerin batteheete. Biyoo boonoshin Hatsooree ginee iraashoo Siseerichi kishooch, Filsixeemeenaꞌo kishooch, wotta Moꞌabee taatoo kishooch beshiiꞌi immiye. Ittoshi qaabbechinaꞌon kochiyeete.

¹⁰ Boonoshiyoo Doono Yeer waan cookiꞌi, ‘Doono Yeero, neen qajjaꞌa Baꞌaaleenaꞌonaa Ashitarootoonochi misiloyich goyinnee maddoona axaaxoon shuuneto noone. Tunebaani and no etteenaꞌo kishoochee noon wodiibe; nowoo neech goyinne maddemmo noone’ iyeete.

¹¹ Doono Yeeriyoo Geediyoonin, Baraaqin, Yofitaahin, wotta taanoo deejjiꞌi ittoshi etteenaꞌo kishoochee ittoshin wodiihe. Ittoshiyoo keqqaalloon kotehote.

¹² “Tunebaani Amoonee taatoo Nahaashi ittoshin kocha bi womon ittoshi beeggiyooba, ittoshi taatoo tuneti Nuggishoo Doono Yeerin qajjiichii, ‘Ebi tuneyaache; noon yaabi qeejjemmi taatoon qaawaabeeto noone’ iyote.

¹³ And illa ittoshi echeti, wotta ittoshi kaacciti taatoo ebiyoche! Doono Yeeri biin ittoshi toommooch taatiitone.

¹⁴ Doono Yeerin shattiibeeto, biich goyinnee maddeebeeto, bi qaaroonoo waayaabeeto, bi getoonoo deꞌa ii ceechiibeeto ittoshi tunegaata, wotta ittoshinaa ittoshi toommooch taateti taatoona ittoshi Nuggishoo Doono Yeerin ittoshi dabbigaata, ittoshich gaaweto tunemmone.

¹⁵ Tunebaani Doono Yeeri qaaroon waayeyaachone ittoshi getigaata, bi getoonoo deꞌa ii ceechoo ittoshi qayigaata, biyoo ittoshi qaabbechinaꞌon bi naxoommon, ittoshinoo naxemmone.

¹⁶ “And illa ebi ittoshi beetooch neexeree, ittoshi aafoochaa Doono Yeeri tuniiya ii beeti, worganikkiti mooyon beegote.

¹⁷ And hini teepphee qecci gooroone. Tawoo Doono Yeer waan corootemmo taane. Biyoo xeeyoonaa amiyonon deejjemmone. Ittoshiyoo taatoo ittoshi toommooch bi taatemmoyich echoona, am shaahe axaaxoon ittoshi shuuneto gaata ebina xiishi ariyemmo ittoshine” iye.

¹⁸ Ebina Saameeli Doono Yeer waan corootiye. Arooba Doono Yeeri xeeyoonaa amiyonon deejjiye. Asheenaꞌo bulliyoo Doono Yeerinaa Saameelinon oogichiꞌi shattiyeete.

¹⁹ Asheenaꞌo bulli Saameelich “Taatoo no toommooch bi taatemmoyich echoona, bare no axaaxee toommooch hini axaaxoon daakkaꞌa shuuneto noone. No qitaachemmoyich, ne guuno nooch ne Nuggishoo Doono Yeer waan corootibe” iyeete.

²⁰ Saameeliyoo asheenaꞌoyich ishichiye: “Shattaahote; ebi shaahe axaaxoon shuuneto ittoshi tunetaanoona, Doono Yeerich ceeni ittoshi mulloona goyinne maddebotani, biin dabboon qayiree badd wotteyaahote.

²¹ Ittoshich gaacon woyee ittoshin wodiyoon hakkaani, gaacaalli mooyinaꞌon dabbi hammaahote; boonoshiyoo gaacaalleenaꞌone.

²² Doono Yeeri ittoshin bi asho tuniiya shunnito bi tunetoyich, Doono Yeeri ooge bi shigoyicha getiree, bi asheenaꞌon qayaachemmone.

²³ Wotta ittoshich corootee qayona Doono Yeerin xuꞌo ta waanee wohe! Ebiyee ta ittoshich deꞌoonaa kaamoona tuneti mooyon arichiyemmo taane.

²⁴ Ittoshi baach Doono Yeerin shatote; biich gibeneeton tuneree, ceeni ittoshi mulloona biich goyinne maddebote; ittoshich bi tuniiti worganikkiti mooyinaꞌon shalligibote.

²⁵ Tunebaani gondee shuunoochee wotteyaache ittoshi getigaata, ittoshinaa ittoshi taatoona aallemmo ittoshine” iye.