1 Saameeli 1 - Kafa Linguistics Project

Eliqaaninaa Bi Kechi Asheenaꞌona Shilooha Hamo

¹ Geppechi Efreemee showooch beeti Raami katemooch, Efreemi yoodoochee tuneti Eliqaani getteebeeti ikke uro beehe. Biyoo Tsuufi bushoo, Toohi bushoo, Elihi bushoo, Yerohaami bushoone.

² Eliqaani gutte mechechone. Ikkeechi shigo Haanni, wotta bareechi shigo Finaani getteehe. Finaani bushechine; tunebaani Haanni bushaalleene.

³ Are uro Beshe Mawe Doono Yeerich goyinnoonaa deejjoon deejjoonoyich bi beeti katemoochee Shilooha nati natona hammii beehe. Eelichi gutte bushiisheenaꞌo, Hoofininaa Finihaasina, qeesheenaꞌo tuneꞌi arooch beetinaꞌone.

⁴ Eliqaani Shilooha hammiꞌi deejjoon bi giddii beehoobee aabo bullin, bi mechee Finaanich, bi anaami bushiisheenaꞌonaa maache bushiisheenaꞌona bulloshich meenoochee boonoshi qoodi qoodoon immii beehe.

⁵ Haannin oogichiꞌi bi shunnii beetoyich, gutte kishoon tuniiꞌi biich immii beehe. Tunebaani Doono Yeeri bushoon bi shiyaachemmoyich Haanni maacoon dookkitone.

⁶ Doono Yeeri bi maacoon bi dookkitoyich, bi nuutee Finaani biin shewiiya ippiiya beehan.

⁷ Ebiyoo nati natona tunee beehe. Haanni Doono Yeerichi kexooch bi hammemmi aabo bullin bi nuutee biin shewiiya beehan. Ebina Haanni eeppaabee maayoon maayemmon qajjaa beehan.

⁸ Bi keno Eliqaaniyoo “Haanne, amoyichiye ne eeppaabeeto? Amoyich maataachine? Amoyichiye ne ayinaabeeto? Ta neech aashire anaami bushiishoyee beshaachote?” ii beehe.

Haanni Bushoon Shimoyich Corootoo

⁹ Ikke areddoon Shilooha beechii maa uchii boonoshi tiyitoyee gubb, Haanni tiyaa neexahan. Areegaata, qeeshoo Eeli Doono Yeerichi kechi kellee gaꞌooch, gabberooch koteꞌi beetone.

¹⁰ Haanniyoo bi kasho caammetoyich oogichaa eeppaabee Doono Yeer waan corootiyan.

¹¹ Ishichaanoo mookkahan: “Beshe Mawe Doono Yeero, ne gonnee ta xuuxoon beeggaꞌa taan ne gabigaata, ne gonnee taanoo batteyaanoon anaami bushoon taach ne imigaata, kashoona bi beemmi yemeeno bullin neech immemmi taane; bi qelloochoo appoo shagaachemmone” iyan.

¹² Haanni kuxaanoon Doono Yeer waan corootaa bi beetaa, Eeli bi noonoon ciinnii beehe.

¹³ Haanniyoo bi mulloona bi corootaa beetoyich, bi noonoo shuuribani, bi qaaro waayeyaanoone. Ebich Eeli “Mashetine” iꞌi gabiye.

¹⁴ Biyoo “Aati wottooniye ne mashe beeyemmo? Ebi woyinee uyoon ne waanee wokkiibe” iye.

¹⁵ Haanniyoo ishichaꞌa biich wochiyan: “Ta doonocho, masheyaane taane. Woyinee uyoon woyee mashiibeeti uyoon uyaane taane. Ta, oogeton ayiniti ure ta tunetoyich, ta iritoon Doono Yeerich shooshaaniye ta beeto.

¹⁶ Ebi shaahoon ta corootito, ta toommooch shaggiti iritoonaa xuuxoonoochee tiyitona bi tunetoyich, ne gonnee taan gaacaalli ureen tuniiree ciinnaahine” iyan.

¹⁷ Eeliyoo “Diggoona hambe! Israꞌeelee Nuggishoo ne qolleton neech imbe” iye.

¹⁸ Biyoo “Ne gonnee tawoo ne aafoochaa gidoo danetin tunebone” iyan. Aroochee wottaa hammahan; maayoonoo maahan. Aroyee gubb, illa aafichoommon ayinaaneene.

Saameeli Shiijjoonaa Yeerich Icheyona

¹⁹ Bi dechara maaddoona Eliqaaninaa bi kechi asheenaꞌona tiyiꞌi Doono Yeerich goyinneheete. Aroochee Raama beeti boonoshi kexooch wotteꞌi hammiyeete. Eliqaani bi mechee Haannina danehe. Yeeriyoo Haanni qolloon waayehe.

²⁰ Ebina Haanni xifaꞌa, anaami bushoon shiyahan. “Doono Yeer waanee ta qolletone” iyaꞌa, bi shigoon Saameeli iyan.

²¹ Ebiyee gubb, Eliqaani Doono Yeerich nati deejjoon deejjoonaa bi mookketi mookkoon giijjoonoyich, bi kechi asheenaꞌo bullina tookkii Shilooha hamma tiyiye.

²² Tunebaani Haanni bi kenoyich “Bushoo xano bi kuxxitoyee gubb, daamiree Doono Yeeri aafooch giddiyemmi taane. Biyoo echeti bi yemeeno bullin arooch beeyemmone” iyan. Ebich hamaaneene.

²³ Bi keno Eliqaaniyoo biich ishichiye: “Gaaweto tuneꞌi neech bekketon tuniibe; bushoo xano bi kuxximmi wottoon hiniich beebe; Doono Yeeri baach bi qaaroon ceechibe” iye. Ebina Haanni bushoon xaachaabee xano bi kuxximmi wottoon bi kexooch beehan.

²⁴ Bushoo xano bi kuxxitoyee gubb, Shilooha beeti Doono Yeerichi kexooch daammahan. Wotta biinna tookkaa keejje nati ikke gubbenoon, keejje qunnee buddinoonaa ikke mollexxee woyinee uyoonon yechaꞌa hammahan. Arooba bushoo batt nallefoone.

²⁵ Gubbenoon boonoshi guuritoyee gubb, bushoon Eeli waan deebiyeete.

²⁶ Haanniyoo Eelich ishichiyan: “Ta doonocho, hini xaaꞌooch ne aafooch neexaꞌa Doono Yeer waan corootiti ure ta tunoyich, ne kashoona wogehoye.

²⁷ Hini bushoon taach bi immemmoyich qollehoye. Doono Yeeriyoo ta qolleton taach immiye.

²⁸ Ebich tawoo biin Doono Yeerich immaabeeti taane. Bi kashee yemeeno bullin Doono Yeerich icheto tunemmone” iyan. Aroochee Doono Yeerich aroochaa goyinneheete.