1 Qorontoosi 9 - Kafa Linguistics Project

Mishiraachechoyich Daaggeeti Mooyonaa Bi Waanee Echeeti Shuunoona

¹ Konichona hajjeyaani xalle asho toono taane? Mishiraachecho toono taane? No Doono Yesuusin ta hajjee aafoona beegaano taane? Ittoshi wotta Doono Yesuusi taanna bi shuuneti shuunee aafo ittoshi toone?

² Bareenaꞌoyich mishiraachecho tuno ta qayigaatoona, amolla bi tunetaa ittoshich mishiraachecho taane. Ittoshi qelloona, Doonona tunaꞌa mishiraachecho ta tunee maatemo ittoshine.

³ Taan echee beetinaꞌoyich ta immemmi wochoo ebine:

⁴ Kittinneenaꞌo immiton mamonaa uyona nooch bachetone?

⁵ Bare mishiraachechinaꞌonaa Doono Yesuusichi maneenaꞌona, Keefiyoo eboshi kittinnee boonoshi mecheenaꞌona tookkii shuunee shuunoyich gommo shaꞌoommon, noochoo no shaꞌemmoyich bachetone?

⁶ Woyee no hajjee kishoona shuunoon qajjiichii kittinneenaꞌona degeyoo taannaa Barnabaasinoyich baachiye bi bacheto?

⁷ Bi hajjee gijjoon maabee koyeebeeti ginee naayo konine? Woyinoon bechiꞌi bi aafetaa maataani goyecho konine? Miimon qiddeebee, are miinji ejjoochee uyaani qiddoo konine?

⁸ Ebin ta gettaabeeto, ashi gaboona baach toonoone; Yeeri wonna Muusich bi immiti sheeroochaanoo wotta ishichitone.

⁹ Are sheeroochaa “Maayoon gatteenaꞌona bushibee boonoshi noonoon cuchaaye” getaa kooreetone. Ishigaata, Yeeri ishichito, buchiibeeti gatteenaꞌoyich ayiniꞌiniye?

¹⁰ Yeeri bi ishichito, noocha iꞌi toone? Ashi goyoon gochiibeeti uro “Ta gochaabeeti maayo shagaa aroochee maayemmo taane” immi gibenoona goyo, wotta maayoon buchiibeeti gichecho “Hini ta buchaabeeti maayo ta gogoone” immi gibenoona busho biich qaawiihe; ebich noocha getaa hini mooyo kooreetone.

¹¹ Illa andire kashee qaaree yaroon ittoshi daggooch no shookketoyee, ittoshi waanee wotta no beemoyich tunemmi mooyon no danegaata, tateyaani mooyone?

¹² Bareenaꞌo ittoshina degee beetoyee no beshoon ittoshina degeeya shappiyone? Tunebaani Kiristoosichi mishiraachee qaaro amoonolla bi tepheyaachemmoyich, bullin haaꞌiihonalli, ebi nooch icheti daaggoona ittoshi waanee gaacheyaano noone.

¹³ Yaafee kechi maddechinaꞌo aroochee boonoshi maayemmon boonoshi danoon ariyaachote? Wotta yaafee kechi deejjee xaaꞌooch deejjoon giddii beetinaꞌo are deejjee maayoochee boonoshi qoodeyoon ariyaachote?

¹⁴ Ebiyoommon wotta “Mishiraachee qaaree ceegoon ashich bechii beetinaꞌo are mishiraachee qaaree gommoochee shohoon danebeete” iꞌi Doono Yesuusi sheeroon neechitone.

¹⁵ Tunebaani ebi daaggeenaꞌona ebin cir tuniyaano taane. Andoo ebin ta kooraabeeto, “Eboshi amoyich taach tuneyaacheete?” getoyich toonoone. Ebin tuniyoyee qitoo taach gaawiye. Ta geecoon koniyoona hoxebe getaache.

¹⁶ Mishiraachee qaaroon geto taach icheti echeyaani mooyone. Ebich ta geecemmi mooyo taach aalloone; mishiraachee qaaroon geto ta qayigaata, taach woowo!

¹⁷ Ebin ta qelloona shunnaꞌa ta getigaata, Yeeri taach wojjemmone; tunebaani ebin shunaanoon ta getigaata, ta tuniibeeto taach icheti aderoon quyo baachiye.

¹⁸ Illa Yeeri taach bi immemmi wojjoo amoone? Ta wojjoo, mishiraachee qaaroon gettiibee kittinneenaꞌona degeyaanoon, ashich mishiraachee qaaroon gatiyoon echeyaanoon ta bechoone.

¹⁹ Konichona guuchittinoon hajjeyaano ta tunetaanoona, beshe asheenaꞌon Kiristoos waan deeboyicha iyaꞌaniye ta qelloon guuno tuniiꞌa bullich ta hajjiibeeto.

²⁰ Ayihudeenaꞌon Kiristoos waan wochoyicha iyaꞌa, boonoshina tookkaa beebee boonoshin shaahaꞌa beeho; Muusichi Sheeroyich hajjee beetinaꞌon Kiristoos waan wochoyicha iyaꞌa, are sheeroyich hajjeyoon ta qajjetaanona, are sheeroyich hajjee beetinaꞌon shaahaa beehoye.

²¹ Ebiyoommon wotta Muusichi Sheeroyich hajjeyaaneenaꞌon Kiristoos waan wochoyicha iyaꞌa boonoshina tookkaa beebee boonoshin shaahaꞌa beeho; tunebaani ibere mooyoochaa Kiristoosichi sheeroyich hajjeyaanoon beetaano taane; ebich ebina Yeeri aafoochaa bi sheeroyich hajjeyaani uro toono taane.

²² Kiristoosi toommooch mullee tooꞌiyoona kuppheyaaneenaꞌon kupphiyoyicha iyaꞌa boonoshina tookkaa beebee boonoshichoommon Kiristoosi toommooch mullee tooꞌiyoona kuppheyaani ashoon shaahaꞌa beeho; taach hakkeebeeti gommo bullina ikkikkeenaꞌon wodiyoyicha iyaꞌa asheenaꞌo bullin bulli mooyona boonoshin shaahiyoye.

²³ Mishiraachee qaaroochee daneebeeti diiroon ta qoodeyemmoyich, mishiraachee qaaroyicha iyaꞌa ebi bullin tuniyaabeeto taane.

²⁴ Woccii beshoon gajjiteeꞌi wocee beetinaꞌo daggoochee wocona beshiree naadee wojjoon danemmo ikke uro baach tunoon ariyaachote? Ebiyoommon naadee wojjoon ittoshi danemmoyich kuppheree gaaweti wocon wocebote.

²⁵ Wotta qiiccebone iꞌi qiiccoyich tiyiibeeto bulli, bulli mooyona bi ashittinoon manjiiꞌi kupphiihe. Eboshi qiicceebeeto, aallemmi naadee gubbichoon danoyichiye; tunebaani no qiiccaabeeto, aalleyaani gubbichoon danoyichiye.

²⁶ Ebich shalligaanoon woccii beetinaꞌochoommon ta wocaache; yongoona qiiccee beetinaꞌochoommon duuboon qiicceyaache.

²⁷ Tunebaani bareenaꞌoyich mishiraachee qaaree ceegoon bechiichaa, diqqich qiiccee doyoochee ta muricaa qiiccoochee Yeeri taan bi bayaachemmoyich, ta ashittinoon guripphaabee taach hajjiibeeto taane.