1 Qorontoosi 8 - Kafa Linguistics Project

Shahalloyich Deejjeeti Maayichon Phawuloosi Geto

¹ Andoo shahalloyich deejjeeti deejjeechon “No bullich ariyoo beemo” iberoone. Ariyoo ashoon geececho tunii beetone; tunebaani shuno ashoon eennii beetoone.

² Koniyoona “Ariyoo taach beetone” iꞌi bi gabigaata, are uro batt ibere ariyee xaaꞌooch shagaanoone;

³ tunebaani koniyoona Yeerin bi shunigaata, are uro Yeerina arichetone.

⁴ Illa and shahalloyich deejjeeti deejjoon mamichon bi tunegaata, shahalloo koote nuggishoo bi tunoonaa ikke Yeeriyee damba bare nuggishoo aallo bi tunoonon ariibeeto noone.

⁵ Showooch woyee shimaayooch nuggisheenaꞌo getteetinaꞌo beetaanolla, wotta hini nuggisheenaꞌonaa dooninaꞌona getteetinaꞌo meettitaanolla,

⁶ nooch beeto, ikke Nuggishoo baachiye; biyoo Nihoo Yeerine; mooyo bullin hallito, biine; biichiye no beeto. Wotta kittinnoo nooch beeto, ikke Doono baachiye; biyoo Yesuus Kiristoosine; Yeeri bulli mooyon biinnane bi halliito; biinnane no beeto.

⁷ Tunebaani asho bullich hini ariyoo aalloone. Ikkikkeenaꞌo ebiyee aaf boonoshi doyitoyich, hanaach beddaahaa ebiyoommi maayoon “Shahalloyich deejjeetone” iꞌi gabiibeeniye boonoshi maabeeto; yeexere mullecho boonoshi tunetoyich, “Eeꞌeto noone” iꞌi gabiyeete.

⁸ Tunebaani are maayoon mamo toonoone noon Yeer waan katichemmo; mamo no qajjetaanoo nooch shappemmo amolla aalloone; no maataanoo, nooch ceennemmo amolla aalloone.

⁹ Tunebaani ebi ittoshi mami aalloo kuppheyaani kittinneenaꞌoyich xugo bi tuneyaachemmoyich, ittoshi qelloon ariibot!

¹⁰ Ariyecho getteebeeti ne, shahallee yaafee kexooch deejjee maayoon maaya kotaa ne beetaa, yeexere mullecho neen bi beegi gaatoche? Ebiyoommi xaaꞌooch ne bekko are uroon “Deejjee maayoon mame” iꞌi kupphiyoo toone?

¹¹ Ebich ariyechone ne getteyoo hini kuppheyaani kittinnoon aallooch daachiyoo toone? Ebi are uro Kiristoosi biich qititi ne manoo toone?

¹² Ebina ittoshi maneenaꞌo toommooch gondoon shuuneebee, boonoshi yeexere mulloon mayiibee, Kiristoosi toommooch gondoon shuunee beetaachote?

¹³ Illa ta maabeeti maayo ta manooyich xugo bi tunesho gaata, biin yexi ta dichaachemmoyich, ta maayemmi meeno ta qitimmi wottoon echebe.