1 Qorontoosi 7 - Kafa Linguistics Project

Shaagee Mooyo

¹ Andoo mechee shaagi mooyon kooriꞌi taan echeto ittoshine. Mecheen shaagi qayo gaawetone.

² Tunebaani shunoon maa beetinaꞌo meettitoyich, anaamo bullich bi hajjee mechee beebuye; maachee bullich bi hajjee keno beebe.

³ Keno bi mechech bi ashittinoon woonnaaye; mecheyoo ebiyoommon wotta bi kenoyich bi ashittinoon woonnaayuye.

⁴ Mechee bi ashittinoon ta hajjoone gettaayuye; bi ashittino bi kenoochone. Kenoo ebiyoommon wotta bi ashittinoon ta hajjoone gettaaye; bi ashittino bi mechechone.

⁵ “Giisheche aabee wottoon corootibone” ii echeeꞌi ittoshi tuniiti aaboyee besh, ittoshinaa ittoshina woonneyaahote. Qellee hakkee qayona Sheexaanoo ittoshin bi dachaachemmoyich, wochinnoon ikkottebote.

⁶ Tunebaani ebin ta gettaabeeto, ciicoommonalli, getoommon toonoone.

⁷ Asho bulli taachoommon mechaalloon bi beemon shunnoye; tunebaani asho bullich bi qelli qelloona Yeeri biich immiti wojjoo beetone; ikkoyich icheti wojjoo ebiyoommo bi tunegaata, baroyich icheti wojjoo wotta baroone.

⁸ Tunebaani mechaalli anaaminaꞌonaa xuumeenaꞌonoyich “Shaagaanoon taachoommon ittoshi beegaata, gaawiye;

⁹ tunetee ittoshi qelloon quyo ittoshi mawiigaata, shaagote; meechi qaatoona micoyee, shaago gaawetone” iyaꞌa ciiccoye.

^10-11 Shaaggitinaꞌoyich wotta “Mechee bi kenoon qayi hammaayuye; tunebaani biin bi qajjaa hamigaata, bare kenoon shaagaanoon beebuye; woyee wotteree bi kenoona shunebuye. Keno bi mecheen gawukkaaye” iyoye. Ishichito, Doono Yesuusiyalli, ta toono taane.

¹² Wotta echetinaꞌoyich ishichiyoye; ishichaabeeto taalli Doono toonoone: Kittinneenaꞌo daggoochee Kiristoosi toommooch mulloon tooꞌiyaani mechechi uro bi beegaata, are bi mechee biinna tookkii beemon bi shunigaata, gawukkaaye.

¹³ Ebiyoommon wotta Kiristoosi toommooch mulloon tooꞌiyaani kenechi ure bi beegaata, bi keno biinna tookkii beemon bi shunigaata, biin qayi hammaayuye.

¹⁴ Ishichaa ta beeto, Kiristoosi toommooch mulloon tooꞌiyaani keno bi mulloon tooꞌiiti mecheena diireeto bi tunetoyichiye; ebiyoommon wotta Kiristoosi toommooch mulloon tooꞌiyaani mechee bi mulloon tooꞌiiti kenoona diireeti bi tunetoyichiye. Ebi bi tuno qayigaata, boonoshi bushiishoo eeꞌeenaꞌo tunemminaꞌone; tunebaani ibere mooyoochaa boonoshi bushiisheenaꞌo Yeerich yaafeetinaꞌone.

¹⁵ Tunetaa Kiristoosi toommooch mulloon tooꞌiyaano baroon bi qaawigaata baribe. Kittinnee manoo woyee manee ebiyoommi mooyona cuchetinaꞌo tooneenaꞌone. Yeeri noon bi ceeggito, diggoona no beeyemmoyichiye.

¹⁶ Haane, ne keno ne naboona bi mulloon Kiristoosi toommooch tooꞌiiree bi wodemmo gaata, amoon ariinne? Haano, ne mechee ne naboona bi mulloon Kiristoosi toommooch tooꞌiiree bi wodemmo gaata, amoon ariinne?

Yeeri Ceegiyoobee Beemooch Beemo

¹⁷ Asho bi ikki ikkoona Doono biich immitoommon, Yeeri biin ceegiyoobee bi beemooch beebe. Kittinnee guuphinaꞌo bullich ta beshiiti geto ebine.

¹⁸ Koniyoona Yeeri biin bi ceegiyooba dokireeto bi tunegaata, bi dokireyoon nookkaaye; baroo wotta Yeeri biin bi ceegiyooba dokireyaano bi tunegaata, ebiyee bekk dokireyaaye.

¹⁹ Yeerichi getoon ceechoani besho, dokireyoo woyee dokireyee qayo bi hallemmi mooyo aalloone.

²⁰ Asho bulli bi qelli qelloona Yeeri biin ceegiyoobee beemooch beebe.

²¹ Yeeri neen bi ceegiyooba guuno ne gaata, aaxxiyaahine. Tunebaani are guuchittinoochee ne kechemmi gommon ne danegaata, are gommon gawukkiyaahine.

²² Guuchittinooch beechii ceekketo, Doono Yesuus Kiristoosina guuchittinoochee kechitone; ebiyoommon wotta guuchittinoyich hajjeyaan beechii ceekketo Kiristoosichi guunone.

²³ Kiristoosi gatiyoon qocciꞌi ittoshin kemetone; ebich biichalli, ashich guunon tuneyaahote.

²⁴ Ta maneenaꞌote! Yeeri ittoshi qelli qelloona bi ceegiyoobee beemooch beechi Yeerina tookki ikkotteree beebote.

Shaagaaneenaꞌon Phawuloosi Ciico

²⁵ Shaagaaneenaꞌochon Doono Yesuusi taach getaanoone; tunebaani Doonochi ariqqoona gibeneeto tunaꞌa ta mulloona ta gabiton ittoshich ciiccoye.

²⁶ And hini yemeenooch beeti iritoochee tiyitona, taach gaaweto shaahiꞌi bekkaabeeto, asho bi beetooch bi beemone.

²⁷ Mecheen shaaggeto ne tunegaata, gawukkoon qaawaaye. Shaagaano ne tunegaata, mecheen shaagga qaawaaye.

²⁸ Tunebaani shaago neech axaaxoo toonoone; gidiidechoo shaakkeyoo axaaxoo toonoone; tunetaa shaaggii beetinaꞌo toommooch hini yemeeneexi mooyo iritoon deebemmone; ta qaataabeeto ebi iritooch ittoshi giyaachemmoyich bayoyichiye.

^29-31 Ta maneenaꞌote! Ta gettaabeeto ebiniye: Yemeeno qaminnitone; hini alemoonaa bi daggeexi mooyona beshee toommoochiye bi beeto. Ebich ebiyee bekk mechecho mechaalloochoommon, eeppiibeeto eefaanoochoommon, emiriibeeto emiraanoochoommon, qiicoon kemeebeeto qiicaalloochoommon, hini showee toommeexi mooyona gaacheebeeto bi beemon are mooyoyich baach tuniyaanoochoommon tunebe.

³² Tunebaani ta shunnaabeeto, ikke mooyonona gaabbaanoon ittoshi beeyemmoyichiye. Shaagaani kittinnoo Doonon emirikkoyich, Doono Yesuusichi mooyon gabiye.

³³ Tunebaani shaaggiti kittinnoo bi mecheen emirikkoyich hini alemeexi mooyon gabiye;

³⁴ ebina bi mullo gutte beera qoodeetone. Kittinnoo tuneti, kenaalli maachee woyee gidiidee bi kashoonaa bi meenona yaafeꞌa Doonochi tunoon bi qaawaa beetoyich, bi gabaabeeto Doono Yesuusichi mooyoniye. Tunebaani shaakkeeti maachee bi kenoon emirikkoyich hini alemeexi mooyon gabiyan.

³⁵ Ebin ta gettaabeeto, ittoshin gaachoyichiye; ebiyoo gaawe kittinnittinee qocoona ittoshi beeyemmonaa mulloon guttiyaanoon Doonoch ittoshi maddemmonoyichalli, ittoshin gaadoyich toonoone.

³⁶ Tunebaani ikke uro shaagga bi maakkiiti gidiidee diccaa oogaa bi gatiri gaata, “Biin shagaanoon ta yagoo tato toonoone” iꞌi bi gabigaata, bi shunniton tuniibe; boonoshiyoo shaageebeete; shaago axaaxoo toonoone.

³⁷ Tunetaa gaboon ikkochiꞌi bi mulloona kuppheti uro, bi qelloon quyoon bi hakkigaata, koninolla boyeyaanoon bi tuniyemmi mooyon gabiꞌi, bi maakkiiti gidiideen shagaache bi getigaata, gaawichite.

³⁸ Ebich shaagga bi maakkiiti gidiideen shaaggito gaawichite; qajjitoo beshoon gaawichite.

³⁹ Kenechi maachee bi keno kashoona bi beemmi wottoon, shaagee samaanoona cuchetine; tunebaani bi keno qitigaata, bi mulloon Doono Yesuusi toommooch tooꞌiiti kittinnoon baach tunebaani, bi shunneton shaago biich daaggeetone.

⁴⁰ Tunebaani ta gaboochaa wochinnoon shaakkeyaanoon bi beegaata, beshoon emiremmine. Wotta hini ta gettaabeeti mooyo Yeerichi Yaafe Ayaano gabiito taach shaahii beetone.