1 Qorontoosi 5 - Kafa Linguistics Project

Yeelliibeeti Mooyon Tuniiti Ashi Toommooch Phawuloosi Nalloo

¹ Ittoshi daggooch shunee mamo beemo waayee beetone; ebiyoo bi nihoochi mecheen shaaggiti asho beemone. Ebiyoommi yeelliibeeti mooyo Yeerich goyinneyaani asheenaꞌo daggoocholla aalloone.

² Ishigaata, aabichiꞌi geeciyote? Ebich ayina bedaachote? Ebiyoommi shuunoon shuuneti uroon ittoshi daggoochee kichibote.

^3-4 Ittoshi waanee ta wokketaanona, bulli aaboon ittoshin gabaabeeto taane; ittoshi daggooch beetochoommon Doono Yesuus Kiristoosichi yakkirecho tunaꞌa, hini gonde shuunoon shuuneti uro toommooch and nallito taane. Ittoshi kiceeꞌi beeti xaaꞌooch ayaanoona ittoshina tookkii ta tunetoyich, no Doono Yesuusi immiti giidoona,

⁵ bi meeno aalleechaa Doono Yesuus Kiristoosi woyemmi aabooba bi kasho wodemmoyich, ebiyoommi asho Sheexaanoyich beshiitaa ichebe.

⁶ Ittoshi geecoo tato toonoone. Giisheche bukee shittoo dofee bukoon koofiibeeto bi tunoon ariyaachote?

⁷ Shittaalli bukoommon ittoshi tunemmoyich, shittoommi axaaxoon ittoshi daggoochee kichibote. Shittaalli bukoommi asho ittoshi tunoon ariibeeto taane. Beshee Baarooba, deejjeebeeti bagoochoommon, Kiristoosi nooch deejjeetone.

⁸ Ebich xalle ibere mulloona shittoo giyaani koshonalli, xuꞌoonaa gondoona ceenniti mulloona shittoo giyiti bukoona hini baaroon baaraayone.

⁹ “Shunimaayeenaꞌona tookki ikkotteyaahote” iyaꞌa kooraa ittoshich wocheto taane.

¹⁰ Are ta kooriti wocho, alemeexi shunimaayeenaꞌochon woyee hiriggechinaꞌonaa boggechinaꞌonochon woyee shahalloyich goyinnechinaꞌochon toonoone. Ishichaꞌa ta koorito gaata, hini alemoochee tiyiree hammesho ittoshine getone.

¹¹ Tunebaani “Kittinnee maneenaꞌo getteetinaꞌo daggoochee ikkoo shunimaayo woyee hiriggecho woyee shahalloyich goyinnecho woyee naagecho woyee mashecho woyee boggecho bi tunegaata, biinna tookki ikkotteyaahote. Ebiyoommi ashoona tookkiree maayoonolla maayaahote” iyaꞌaniye ta koorito.

^12-13 Kittinnoo tuneyaani asheenaꞌo toommooch nallemmo ta toonoone; areenaꞌo toommooch nallemmo Yeerine. Tunebaani kittinneenaꞌo daggoochee gondoon shuunee beetinaꞌo toommooch nallaachemmo ittoshine? Yaafe Macaafooch bi kooreetoommon, “Ebiyoommi gonde ashoon ittoshi daggoochee wokkiibote.”