1 Qorontoosi 4 - Kafa Linguistics Project

Kiristoosich Boonoshi Maddemmoyich Kaacheti Mishiraachechinaꞌo

¹ Kiristoosichi maddechonaa Yeerichi maacee mooyon gaxxaꞌa gettaa bechaabeeti bi yakkirechona no tunoon asho bulli gabibe.

² Yakkirechinaꞌo bulli waanee qaaweebeeto, boonoshi shuunoona gibeneetinaꞌo tunoone.

^3-4 Ittoshiyoo tunebot woyee baroo koniyoona tuneba biich bekketon ta toommooch bi nalligaata, mooch haddaachemmo taane; tawoo ta toommooch gondo beemo taach aricheyaanoone. Tunebaani ebichi naboyich “Gondeyaano neene” getaa nalleyaache; ebich ta toommoocholla nalloon hakkaano taane; ta mooyon echeree nalloon hakkemmo, Doono tuneti Yesuus Kiristoosi ikkeetone.

⁵ Ebich Doono Yesuusi waataan beetaa, aabaalli nalloon koni toommoochona nalliyaahote. Doono Yesuusi bi waahooba, and manderooch aacheeton xallooch kichemmone; ashi mullooch beeti gaboon gaxxemmone. Arooba Yeeri asho bullin bi shuuni shuunoommona bi qelli qelloona galletemmone.

⁶ Ta maneenaꞌote! “Kooreeti sheeroon shaaddiyaahote” getteeton no waanee ittoshi ariyemmoyich, ittoshicha iyaꞌa taannaa Aphiloosinochi mooyon malletoon tuniiꞌa getteto taane. Ebich ittoshi daggoochee koniyoona ikkoona geecibee baroon hoxaaye.

⁷ Haano, bareenaꞌoyee besho neen tuniito, konine? Yeeri neech imaanee mooyo amo beete? Illa Yeeri neech immito bi tunegaata, amoyichiye Yeer waanee ne daneyaani wojjoon tuniiꞌa geecaabee ne naadee beeto?

⁸ And michito ittoshine! And gaanneto ittoshine! No taateyaan beetaa, taateto ittoshine! Ittoshi taateto gaata, shunnesho taane; ittoshina tookkiree taatesho noone.

⁹ Tunebaani “Yeeri bi mishiraachechi noon qitibe getaa nalleeti ashoochoommon bulliyee desh hoxeeti xaaꞌoon nooch immitone” iyaꞌaniye ta gabaabeeto. Ta ishichiti naboo, alemo bulliich, maraakeenaꞌonaa asheenaꞌonochi aafooch cooqqireeto no tunetoyichiye.

¹⁰ Kiristoosicha iyaꞌa tuushoo no tunetaa, ittoshi Kiristoosina mullecho tunehote; no niretaa, ittoshi kupphehote; no hoxeetaa, ittoshi naadeehote.

¹¹ Hanaach beddaahaa shaacaabeeto noone; shachewaabeeto noone; kuxoon tahaabeeto noone; hoxeeꞌa kishee gubboona tappeebeeto noone; beeyemmi kexo muccaꞌa guuddaabeeto noone.

¹² No hajjee kishoona shuunaabee maraataabeeto noone; ufenoo diiraabeeto noone; duꞌiitenoo haaꞌiibeeto noone;

¹³ gondoon no toommooch boonoshi yibbaatetaanoo deꞌoona wochaabeeto noone. Hanaach beddaahee hini alemeexi asheenaꞌo hidii duppiti guudoonaa caachoonon tuneto noone.

¹⁴ Hini mooyon ittoshich ta kooraabeeto, aaxxe ta hajjee bushiishoommon ittoshin kaareꞌi ciicoyichalli, yeelliyoyich toonoone.

¹⁵ Kiristoosina, haddaa ciyaani dojjechinaꞌo ittoshich boonoshi beetaa, meeti nihoo ittoshich aalloone; Kiristoos Yesuusichi mishiraachee qaaroona ta ittoshich nihoo tuneto taane.

¹⁶ Ebich “Taan shaahibote” iyaꞌa ittoshin qollaabeeto taane.

¹⁷ Ebichi naboyich shucheti, gibeneeti, Doono Yesuusina ta bushoo tuneti Ximootiyoosin ittoshi waan wochaabeeto taane. Bulli xaaꞌooch beeti kittinnee guuphinaꞌo bullich ta dojjaabeeti doyoommon, Kiristoos Yesuusina taach beeti kashee gommon aroo ittoshich shalligichemmone.

¹⁸ Ittoshi daggoochee ikkikkeenaꞌo taan “No waan waataachemmone” iibee geecii beetinaꞌone.

^19-20 Tunebaani Doono Yesuusi daaggigaata, ittoshi waan kaateree woyemmo taane. Yeerichi taatittino bekkemmo Yaafe Ayaanee giidoonalli, yibbaatoona toonoone; ebich waaree are geecechinaꞌochi yibbaatoon baach tuneyaanoon, boonoshi shuunee daggooch Yaafe Ayaanee giidoo beemonaa aalloonon xiishemmo taane.

²¹ Eke ittoshi shunniibeeto aabiniye? Gumboon yeshiree wobotee woyee shunoonaa shiimoona wobote?