1 Qorontoosi 3 - Kafa Linguistics Project

Yeerich Maddoo

¹ Ta maneenaꞌote! Meechi qaatoyich hajjee beetinaꞌoyich, Kiristoosina batt gaggereenaꞌoyich getoommonalli, Yaafe Ayaanoyich hajjee beetinaꞌoyich getoommon getaano taane.

^2-3 Ebiyee aaf ejjoonalli ittoshich ta uchito, kupphe maayoon maanjaano taane. Ebiyoo gaggeroo tuneꞌi hakkoo ittoshi qajjitoyichiye; and beddaahaanona meechi qaatoyich ittoshi hajjee beetoyich, kupphe maayoon hakkaano ittoshine. Qanaatoonaa kaaroona ittoshi daggooch bi beemo, meechi qaatoyich ittoshi hajjeyoo toone? Wotta ittoshi qoco hini showeexi ashi qocoon shaahiibeeto toone?

⁴ Ittoshi daggoochee ikkoo “Ta Phawuloosicho taane”, baroo wotta “Ta Aphiloosicho taane” bi getigaata, hini showeexi asheenaꞌon baach tunetote geto toone?

⁵ Illa Aphiloosiyoo tuneba ta Phawuloosiyoo tunebon, amoon hallesho noone? Ittoshi mulloon Kiristoosi toommooch ittoshi tooꞌiiti mishiraachee qaaroon gettaabee, Doono Yesuus Kiristoosi no ikkikkoyich bi immitoommon, biich maddaabeeti bi wochee bushiishoo baach noone.

⁶ Yaroon ta shookketaa, aacon Aphiloosi kittii bi uchitaa, shookketi yaroon colliiꞌi kaama eenniito Yeerine.

⁷ Ebich shookketi yaroon colliiꞌi kaama eenniibeeto, Yeeriyalli, yaroon shookkito woyee aacon kittii uchito, bi halliti mooyo aalloone.

⁸ Yaroon shookkitonaa aacon kittii uchitona ikkeenaꞌone. Yeeri boonoshi qelli qelloona boonoshi shuunetoommon boonoshich wojjemmone.

⁹ Ebich Yeerina tookkaa shuunaabeeti bi wochee bushiishoo noone; ittoshiyoo Yeeri gochiibeeti goyee budo ittoshine; ebiyoommon wotta Yeeri haggiibeeti kexo ittoshine.

¹⁰ Yeeri taach bi immiti wojjoona ariyechi gimbenyoo kexon hagga bi baashoommon baashito taane; baroo aree toommooch echeton ceechiya haggii beetone. Tunebaani haggiibeeto bi qelli qelloona aree toommooch aabichiree bi haggemmo gaata, bi qelloon ariibe.

¹¹ Baasheetoyee damba koniyoona bare baashoon baashoo hakkaache; are baashoo Yesuus Kiristoosine.

¹² Illa koniyoona ebi are baashee toommooch birewoona woyee aachoona woyee malletechi aaxxe xaqqoona woyee mixona woyee sheekkoona woyee qumberoona bi hagi gaata,

¹³ bi qelli qelloona hakketo am shaahoo gaata bekkemmone. Doono Yesuusi nalliya wotteree bi woyemmi aabooba, qaaqqoona miixeyemmone; are aabooba ikkikkoochi hago am shaahoo gaata qaaqqoo haattiree bekkiyemmone.

¹⁴ Are baashee toommooch haggito koniyoona, bi haggiti kexo qaaqqoona mico bi qayigaata, Yeeri biich wojjemmone.

¹⁵ Tunebaani koniyoona bi haggiti kexo qaaqqoona bi mici gaata, Yeeri biich wojjemmi wojjoon muccemmone; tunetaa aroo bi qelloona wodemmone; bi wodoo qaaqqoochee shottetaa kechiti ashi wodoommoniye.

¹⁶ Ittoshi Yeerichi yaafee kexo ittoshi tunoonaa Yeerichi Yaafe Ayaano ittoshi mullooch bi beemonon ariyaachote?

¹⁷ Koniyoona Yeerichi yaafee kexon bi happigaata, Yeeri biin wochiree happemmone; ebiyoo hini Yeerichi yaafee kexo Yeerich bi yaafeetoyichiye; are yaafee kexoo ittoshine.

¹⁸ Koniyoona bi qelloon dachaaye. Ittoshi daggoochee koniyoona hini showee toommeexi asheenaꞌochi gaboommon “Shalligecho taane” iꞌi bi gabigaata, shalligechon bi tunemmoyich, tuushoon shaahiree bekkebe.

¹⁹ Hini alemeexi asho shalligoone iꞌi bi gabiibeeti mooyo Yeeri aafoochaa tuushittinoone. Ebiyoo “Yeeri shalligechinaꞌo getteetinaꞌon boonoshi acona boonoshin yechii beetone” getaa bi kooreetoommoniye.

²⁰ Wottoo “Doono Yeeri shalligechinaꞌo getteeti asheenaꞌochi gaboo duubo bi tunoon arii beetone” getaa kooreetone.

²¹ Illa bulli mooyo ittoshicho bi tunetoyich, koniyoona ashoona geecaaye.

²² Phawuloosi tuneba, Aphiloosi tuneba, Keefi tuneba, hini alemo tuneba, kashoo tuneba, qitoo tuneba, beetoo tuneba, woyemmo tuneba, eboshi bulli ittoshichinaꞌone;

²³ ittoshiyoo Kiristoosicho ittoshine; Kiristoosiyoo Yeerichone.