1 Qorontoosi 2 - Kafa Linguistics Project

Yooddeeti Kiristoosichi Wochoon Phawuloosi Geto

¹ Ta maneenaꞌote! Ittoshi waan ta waahooba, Doono Yeerichi maacee mooyon ittoshich ta getteto, yibbaatee beshoona woyee shalligee beshoona toonoone.

² Arooba ittoshi daggooch ta beehooba, “Yesuus Kiristoosin, ebiyoo yooddeeꞌi qititi Kiristoosiyee damba, baroon ariyaache” iyaꞌa maacceto taane.

³ Ebich ittoshi daggooch ta yagito giidoo qachaabee, shattaabee, oogetonoo qewaabeeniye.

⁴ Ta yibbaatoonaa ta awaajjaabeeti awaajjoona ta tuniito, Yaafe Ayaanee giidoon bekkiyoonalli, ashi shalligoonaa dachee yibbaatoona toonoone.

⁵ Ebich mulloon ittoshi tooꞌiito, Yeeri giidee toommoochalli, hini showeexi ashi shalligee toommooch toonoone.

Yeerichi Shalligoon Yaafe Ayaano Bekkiyoo

⁶ Kiristoosi toommooch mullee tooꞌiyoona kupphetinaꞌo daggoochaa no yibbaataabeeto, ibere shalligoonalli, hini showeexi ashi shalligoon woyee boonoshi oogoochee kindemmi hini showee iraasheenaꞌochi shalligoon toonoone.

⁷ Hini shalligoo Yeerichi maacee mooyone; Yeeri yemeeno bulliyee aaf “Hini shalligoona oogee yiiroon boonoshich immemmo taane” iꞌi nooch gabiꞌi bi kotiiti yemeenoochee tiijjiꞌi hanaach beddaahaa, aacheeti mooyone.

⁸ Hini showee iraasheenaꞌo daggoochee ikkolla ebi shalligoon ariito aalloone; boonoshi ariito gaata, oogee yiiree Doono Yesuusin yoodaacheshinaꞌone.

⁹ Tunebaani ishichaa bi kooreetoommon, “Koniyoona bi aafoona beeggii bi ariyaanoon, bi waamona waayee bi ariyaanoon, tunemmone iꞌi bi mulloona cir bi shalligaanoon, Yeeri biin shunnii beetinaꞌoyich am shaahe meeti mooyoniye bi qanniito.”

¹⁰ Ebichi naboyich Yaafe Ayaano Yeerichi maacee moochi tuggooch beddaahaa, ikkoonolla echiyaanoon maqqii bi arii beetoyich, ebi bullin Yeeri bi Yaafe Ayaanoona nooch bekkiitone.

¹¹ Ikke ashi gaboon, bi mullooch beeti bi ayaanoyee besh ariyoon hakkemmo konine? Ebiyoommon wotta Yaafe Ayaanoyee besh Yeerichi maacee mooyon ariyemmo koniyoona aalloone.

¹² Tunebaani nooch icheti wojjoo bullin no ariyemmoyich, Yeer waanee wocheeti Ayaanoani, hini alemeexi ayaano toonoone nooch icheto.

¹³ Wotta hini wojjeechonoo gettaabeeto noone. Yaafe Ayaano boonoshi toommooch beeti asheenaꞌoyich, Yeerichi Ayaanee mooyon xiishiibee no gettaabeeto, hini showeexi ashi shalligoo arichiibeeti yibbaatoona tuneyaanoon, Yaafe Ayaano nooch bi arichiibeeti yibbaatoonane.

¹⁴ Yaafe Ayaano biich aalli asho Yeerichi Yaafe Ayaanee mooyon duubo bi tunii beetoyich, danoon hakkaache; shalligoonoo hakkaache; shalligoon hakkoo bi qajjiibeeto, ebi moochi gaacoon maqqiꞌi ariyoon hakkemmo, Yaafe Ayaano biich beeti asho baach bi tunetoyichiye.

¹⁵ Yaafe Ayaano bi toommooch beeti asho mooyo bullin maqqiꞌi ariyoon hakkiye; tunetaa koniyoona ebi are uroochi mooyon maqqiꞌi ariyoon hakkaache.

¹⁶ Yaafe Macaafooch bi kooreetoommon, “Doono Yeerichi gaboon ariito konine? Biinoo boyemmo konine?” Tunebaani Kiristoosichi gaboo nooch beetone.