1 Qorontoosi 16 - Kafa Linguistics Project

Iriteeti Kittinneenaꞌoyich Kiceyemmi Gijjee Buushoo

¹ Andoo Yerusaalemi kittinneenaꞌoyich gijjee buushee mooyon, Galaatee showooch beeti kittinnee guuphinaꞌoyich ta getteti getoommon, ittoshiyoo ebiyoommon wotta tuniibote.

² Ta waahooba ebi gijjee buushoo bi tuneyaachemmoyich, shabaatti shabaattee batti batti aabooba, ittoshi qelli qelloona Yeeri ittoshich wojjitoommon kichiree kotiibote.

³ Eechi ittoshi beetaa, ta waahooba, gibeneetinaꞌone iꞌi ittoshi kaaccimmi asheenaꞌona are ittoshi gijjee wojjoon koorichoona tookkiree Yerusaalem daachiyemmo taane.

⁴ Wotta Yerusaalem ta hamo qaawiibeeto bi tunegaata, taanna tookki hammemminaꞌone.

Phawuloosi Tuniiya Gabiti Mooyo

⁵ Makidoonee showoona hamma ta gabitoyich, aroona beshebee ittoshi waan shaggemmo taane.

⁶ Aree hillooch ta hammemmi xaaꞌoo aabiichona tuneba taan ittoshi deenaa ta gommon ta yechemmoyich, diqqich ittoshi waan yagoon qayaachemmo taane; woyee yooyon ittoshi waanaa kichoon qayaachemmo taane.

⁷ Doono Yeeri daaggigaata, meeti aaboon ittoshi waan yagiya gibenaa ta beetoyich, and gommon besheebee neexoona ittoshi waan shaggii wottoon shunaache.

⁸ Tunebaani Baaraachoo shaggimmi wottoon Efesoon yagemmo taane.

⁹ Ta yagemmo, mashaamiti shuunoon ta shuunemmoyich gamini kelloon Yeeri taach qechitoyichiye; wotta taach tollo tuneti meeti asheenaꞌo beetinaꞌone.

¹⁰ Ximootiyoosi taachoommon Doono Yesuusichi shuunoon shuunee beetone; ebich ittoshi waan bi waagaata, ittoshina tookkii bi beemmi wottoon gaabbaalloon bi beeyemmoyich tuniibote;

¹¹ koniyoona biin hoxaaye. Maneenaꞌon tookkiree ta waan woyemmo bi tunetoyich, iriteyaanoon bi woyemmoyich deenote.

¹² No manoo Aphiloosichon wotta, maneenaꞌona tookkiree ittoshi waan bi hammemmoyich oogichaꞌa biin qolleto taane; tunebaani and hamma qaawaanoone; tunetaa biich kaamehooba hammemmone.

Ciireexi Wocho

¹³ Ittoshi qelloon ariibote; Kiristoosi toommooch beeti ittoshi mullee tooꞌiyoona manjiree neexebote; shattaayi kupphebote;

¹⁴ ittoshi tuniibeeto bullin shunoona tuniibote.

¹⁵ Ta maneenaꞌote! Isxifanoosinaa bi kechi asheenaꞌona Akaayee showoochee Kiristoosi toommooch mullee tooꞌiyoona qaabbeenaꞌo boonoshi tunoon, wotta kittinneenaꞌon gaacheya boonoshi qelloon beshiiꞌi immitinaꞌo boonoshi tunoon ariibeeto ittoshine.

¹⁶ And ittoshin ta qollemmi ikke mooyo beetone; ebiyoo eboshiyoommi asheenaꞌonaa boonoshina tookkii shuuneebee yullee beetinaꞌo bullinoyich ittoshi deꞌa gettemmoyichiye.

¹⁷ Isxifanoosi, Fotunatoosinaa Akayiqoosina hach boonoshi waatoyich emirito taane. Ittoshi aalli xaaꞌooch ittoshin tuneꞌi ta shappoon ceechitinaꞌone.

¹⁸ Ittoshi mulloon boonoshi kashiitoommon, ta mulloon kashiitinaꞌone. Ebich eboshiyoommi asheenaꞌon gaawichi ariibote.

¹⁹ Isiyee showooch beeti kittinnee guuphinaꞌo ittoshin diggii beetinaꞌone. Aqilinaa Phirisqilina, boonoshi kexoochoo kiceebeeti kittinneenaꞌo no Doonochi shigoona gaawichii ittoshin diggii beetinaꞌone.

²⁰ Hiniich beeti maneenaꞌo bulli ittoshin diggii beetinaꞌone. Yaafeeti gommona shumeyoona ittoshinaa ittoshina ikkoo baroon diggiibe.

²¹ Ta, Phawuloosi hini diggiyoon ta koorito, ta hajjee kishoonane.

²² Doono Yesuusin shunaano koniyoona bi beegaata, aroo uppeto tunebe! No Doonocho, kaate wotteree wobe!

²³ Doono Yesuusichi wojjoo ittoshina tookki tunebe.

²⁴ Ta shuno Kiristoos Yesuusina ittoshina tookki beebe.