1 Qorontoosi 14 - Kafa Linguistics Project

Yaafe Ayaano Immiibeeti Baribare Wojjoo

¹ Illa bulliyee beshoon kupphiiree shunoon dabbibote; Yaafe Ayaanee wojjoon danoyich qaatibote; eboshiyee keemoon keemoyich beshoon qaatibote.

² Baribare noonoona yibbaateebeeti asho, Yeerichani ashich yibbaateyaanoone; ebiyoo bi yibbaateebeeti yibbaatoo ashich bi tuusheetoyichiye; biyoo Yaafe Ayaanee giidoonane Yeerichi maacee mooyon bi yibbaateebeeto.

³ Tunebaani keemoon keemmiibeeto ashoon eenniyoyich, kupphiyoonaa goggiyoonoyichiye bi gettiibeeto.

⁴ Baribare noonoona yibbaateebeeti uro bi ikkeetoniye bi eenniibeeto; tunebaani keemoon keemmiibeeti uro kittinnee guuphoniye bi eenniibeeto.

⁵ Baribare noonoona ittoshi yibbaatoon shunnaabeeto taane; tunebaani beshoon ta shunnaabeeto, keemoon ittoshi keemoniye. Baribaare noonoona yibbaateeti yibbaatoo kittinnee guuphon bi eenniyemmoyich, wokkeelli biichemmi asho aallegaata, baribare noonoona yibbaateebeeti ashoyee keemoon keemmiibeeti ashoone besho.

⁶ Ta maneenaꞌote! And ittoshi waan waaꞌa Yeeri taach bekkiiti mooyon woyee ariyoon woyee keemoon woyee kittinnittinee doyoon getaanoon baribare noonoona ta yibbaategaata, ta womo ittoshich amoon hallehe?

⁷ Ximboonaa shumburoonoyich kasho aalloone; tunebaani asho ximboon yexxii bi beetaa woyee shumburoon huggii bi beetaa, elleebeeti ashich qiinoo bi arichiyoo qayigaata, shoddo amoona arichehe?

⁸ Wotta koyee malletoon arichiibeeti qaaroona tiroo (waaringo) hukkeyoo qayigaata, asho aabichireeshiye ginee koyoyich bi qannemmo?

⁹ Ebiyoommon asheenaꞌo ariibeeti noonoona kaachii yibbaato ittoshi qayigaata, aabichiree ittoshi gettii beeton ariyoo hakkeheete? Ittoshi yibbaatee beeton yongoani daammiibeeto, ashi waamooch giyaanoone.

¹⁰ Hini alemooch meeti baribare ashi noonoo beetone; tunebaani bi showi showoochaa yibbaateebeeti asheenaꞌoyich noonoo bulli tuusheyaanoone.

¹¹ Illa ikke asho yibbaatee bi beeti noonoon ta ariyoo qayigaata, are yibbaateebeeti uroyich dallaawoo tunemmo taane; are yibbaateebeeti uro taach dallaawoo tunemmone.

¹² Ebiyoommon wotta ittoshi Yaafe Ayaanee wojjoon kupphiiꞌi qaawiibeeto ittoshi tunetoyich, kittinnee guuphinaꞌon eenniyoyich tunemmi wojjeenaꞌon oogichiree qaawibote.

¹³ Ebich ashich baribare noonoona yibbaateebeeto bi yibbaateebeeti noonoon ariiree ashich biishi bi wokkeellemmoyich corootibe.

¹⁴ Baribare noonoona ta corootigaata, ta ayaano corootii beetone; tunebaani ta mullo daneti aafechi mooyo amolla aalloone.

¹⁵ Ishigaata, aabichibote? Ta ayaanoona corootemmo taane; ta mulloona wotta ariibee corootemmo taane; ta ayaanoona Yeerich shoddemmo taane; ta mulloona wotta ariibee Yeerich shoddemmo taane.

¹⁶ Ebi toono gaata, ne ayaano ikkeetona Yeerin ne galletegaata, ne gettaabeeto biich giyaani kittinnoyich bi tuusheetoyich, Yeerin ne galletaabeeti galletoyich ameena bi gettemmo aabichireeshiye?

¹⁷ Yeerin gaawichaꞌa galletetaa beeto tunemmo neene; tunebaani bare asho ebina eenaachemmone.

¹⁸ Ittoshi bulliyee beshoon baribare noonoona ta yibbaataa beetoyich, Yeerin galletehoye.

¹⁹ Tunebaani bareenaꞌon ta dojjemmoyich, kittinnee guuphi daggoochaa baribare noonoona aashire hume qaaroon ta yibbaatoyee, ta mulloona ariibee uuche qaaroon yibbaatoon shunnoye.

²⁰ Ta maneenaꞌote! Gonde mooyoyich nallefoon tunebotalli, gabee shappoona gaggereyaahote; gaboona dicciti ashoon tunebote.

²¹ “Doono Yeeri, ‘Baribare noonoon yibbaateebeeti asheenaꞌonaa dallaawe asheenaꞌonochi noonoona hini asheenaꞌoyich yibbaatemmo taane; ebi bi tunetaanoona waayeyaachemminaꞌone’ ii beetone” getaa Muusichi Sheerooch kooreetone.

²² Ebich baribare noonoona yibbaato malletoo bi tunemmo, Kiristoosi toommooch mulloon tooꞌiyaaneenaꞌoyichalli, tooꞌiitinaꞌoyich toonoone. Keemoon keemo Kiristoosi toommooch mulloon tooꞌiitinaꞌoyichalli, tooꞌiyaaneenaꞌoyich toonoone.

²³ Illa kittinneenaꞌo ikkooch kiceechii, boonoshi bulla baribare noonoona boonoshi yibbaatee beetaa, boonoshi beetooch ariyaani asheenaꞌo woyee Kiristoosi toommooch mulloon tooꞌiyaaneenaꞌo giyigaata, “Hini asheenaꞌo geyetinaꞌone” getaacheheete?

²⁴ Ebiyee boonoshi bulli keemoon keemmii boonoshi beetaa, boonoshi beetooch Kiristoosi toommooch mulloon tooꞌiyaani woyee ariyaani asho bi giyigaata, boonoshi bulli gettiibeeti qaaro bi maacoon michemmone; bi waayeti mooyo bulli biin ittibatemmone.

²⁵ Ebina bi mullooch aacheeti mooyo xalla bekkemmone; biyoo “Iberoon Yeeri ittoshi daggooch beetone” getibee yitiree Yeerich goyinnemmone.

Kittinneenaꞌo Kiceebeeti Kechi Qoco

²⁶ Illa ta maneenaꞌote! Ikkooch ittoshi kiceehooba, ikkoo shoddehe; baroo wotta dojjiye; baroo Yeeri biich bekkiiti mooyon gettiye; baroo baribare noonoona yibbaatehe; baroo baribare noonoona yibbaateeton biichii wokkeelliye. Eboshi bulli kittinneenaꞌon eenniyoyich gaaccemminaꞌo tunebeete.

²⁷ Baribare noonoona yibbaatee beetinaꞌo boonoshi beegaata, gutteree woyee bi beshigaata keejjeree biiꞌeyaayi kaalli kaalloona yibbaatebeete. Wotta ikke asho ebi baribare noonoona yibbaateeton biishi wokkeellibe.

²⁸ Biishi wokkeellemmo aallegaata, kiceeti kittinneenaꞌo daggoochaa qaaraaye; biinnaa Yeerinoyich baach gete.

²⁹ Gutte woyee keejje keemechinaꞌo geteete; bareenaꞌo wotta are getteeti qaaroon kichi kindiree gabibeete.

³⁰ Tunebaani are koteti asheenaꞌo daggoochee ikkoyich Yeeri ikke mooyon bekkiitaa getta bi tiyigaata, shiichiꞌi yibbaatee toommooch beeti uro cikkibe.

³¹ Waayeebeeto bulli ariyemmonaa kupphemmonoyich, ittoshi bulli kaalli kaalloona keemoon keemon hakkiyote.

³² Keemechinaꞌochi ayaano keemechinaꞌoyich hajjee beetone.

³³ Ebiyoo Yeeri diggee Nuggishoani, bunnee Nuggishoo toono bi tunetoyichiye. Yaafeeti kittinnee guuphinaꞌo daggooch tunemmi doyoommon,

³⁴ maacheenaꞌo kittinneenaꞌochi kicee daggoochaa cikki kotebeete; yibbaato boonoshich daaggeyaanoone. Sheerooch bi kooreetoommon, hajjeebeete.

³⁵ Kittinneenaꞌochi kicee daggoochaa maachee yibbaato yeelliibeeto bi tunetoyich, ikke mooyon ariyoyich boonoshi qaawigaata, boonoshi kexi kexoochaa boonoshi keneenaꞌon echebeete.

³⁶ Yeerichi qaaro kechito, ittoshi waaneeniye? Woyee ittoshi waan baachiye bi shaggito?

³⁷ Keemecho woyee ayaanee wojjecho taane iibeeti asho koniyoona bi beegaata, hini ta kooriti mooyo Doono tuniibote iꞌi bi gettiti wocho tunoon ariibe.

³⁸ Tunebaani koniyoona hini wochoon waayo bi qayigaata, bi getoon waayeyaahote.

³⁹ Ebich ta maneenaꞌote! Keemoon keemoyich, manjiiree qaawibote. Baribare noonoona yibbaatoon bajjaahote.

⁴⁰ Mooyo bulli yaaroonaa gaaweti gommona tunebe.