1 Qorontoosi 13 - Kafa Linguistics Project

Ibere Shuno

¹ Asheenaꞌonaa maraakeenaꞌonochi nooneenaꞌona ta yibbaatetaa, shuno taach aallegaata, shuurikkimmona qaaddiibeeti gooshoommo woyee qaaxilloommo taane getone.

² Keemoon keemmi hakkoo taach bi beetaa, Yeerichi maacee mooyo bullin ariiꞌa ariyoo bullin dano ta hakkitaa, Yeerin gibenaꞌa geppoon “Hiniichee tiyiree okk ebiich beshebe” iyaꞌa tuniyoon ta hakkitaa, shuno taach aallegaata, shokkaachoo taane.

³ Taach beeto bullin qoodaꞌa girechinaꞌoyich ta immetaa, “Ta ashittino mice” iyaꞌa qaaqqooch giyaa ta miccetaa, shuno taach aallegaata, taach bi hallemmo amolla aalloone.

⁴ Shunecho bulli mooyon haaꞌiihe; ashoyichoo deehe. Shunecho qanaateyaache. Shunecho naadeyaache; geecaache;

⁵ yeelliibeeti mooyon tuniyaache; bi qellich gabaache; ippeyaache; xuꞌoon haddaache.

⁶ Ibere mooyona emiriyalli, gonde mooyona emiraache.

⁷ Bulli mooyon haaꞌiihe; bullin iberiihe; bullin gibenehe; kuxaanoon manjiye.

⁸ Shunoyich ciiro aalloone; keemo bi tunetaa, beshechone; baribare noonoona yibbaatee wojjoo bi tunetaa, echechone; ariyee wojjoo bi tunetaa, beshechone.

⁹ Ebiyoo no ariyoo ceenaani shappoo, keemoon no keemo ceenaani shappoo bi tunetoyichiye.

¹⁰ Tunebaani shappaani ceeno waahooba, hini shappoo aallemmone.

¹¹ Busha ta beehooba, bushittinee yibbaatooniye yibbaataabee ta echeto; gabaabee, shalligaabee ta echeto bushiishoochoommoniye. And gurimaashaachaa, hini bushittinee mooyo bullin beshiito taane.

¹² Hanaach Yeerin no ciinnaabeeto, dooshireti heeraawoochaa no malletoon no ciinoommoniye; tunebaani arooba biin no aafoona xallayi beeggemmo noone. And Yeerin woddiiꞌa ariyaano taane; tunebaani arooba Yeeri taan bi arii beetoommon, tawoo biin ariyemmo taane.

¹³ Illa iberiyoo, gibenoonaa shunoona hini keeminaꞌo manjiree beeyemminaꞌone. Eboshiyee besho shunoone.