1 Qorontoosi 12 - Kafa Linguistics Project

Yaafe Ayaanee Wojjoo

¹ Illa ta maneenaꞌote! Yaafe Ayaano immiibeeti wojjoon ittoshi ariyemmoyich qaawaabeeto taane.

² Ebiyee aaf Yeerin ariyaano ittoshi beehooba, gasheeꞌi kashaalli shahalleenaꞌo waan oriheebee ittoshi echoon tuushaano ittoshine.

³ Ebin ariibote: Koniyoona Yeerichi Yaafe Ayaanoona yaabeebee, “Yesuusi uppeto tunebe” getaache; ebiyoommon wotta Yeerichi Yaafe Ayaanoona yaabeyaanoon, “Yesuusi Doonone” geton hakkemmo koniyoona aalloone.

⁴ Illa Yaafe Ayaanee wojjoo baribaroone; tunebaani immiibeeti Yaafe Ayaano ikkoone.

⁵ No shuuni shuunee qoco baribaroone; tunebaani no shuunaabeeti shuunee Doono ikkoone.

⁶ Shuunee gommo baribaroone; tunebaani shuunoo bullin bullina shuunee beeto ikke Yeerine.

⁷ Tunebaani asho bi ikkikkoyich Yaafe Ayaanoon bekkiyee wojjoo icheebeeto tookki no gaachemmoyichiye.

⁸ Yaafe Ayaano ikke kittinnoyich shalligee yibbaatee hakkoon immiye; wotta are Yaafe Ayaano ariyee yibbaatee hakkoon baroyich immiye.

⁹ Ebiyoommon wotta are Yaafe Ayaano gibenoon baroyich immiye; wotta are Yaafe Ayaano biiyeton wodiyee hakkoon baroyich immiye;

¹⁰ wotta are Yaafe Ayaano ikkoyich gaakkechi mooyon shuunee hakkoon, baroyich wotta keemoon keemmi hakkoon, baroyich wotta ayaaneenaꞌon baribariiꞌi ariyee hakkoon, baroyich wotta baribare noonoona yibbaatee hakkoon, baroyich wotta are baribare noonoona yibbaateeton biichii wokkeellee hakkoon immiye.

¹¹ Ebi bullin shuuneebeeto, are ikke Yaafe Ayaano baachiye. Are Yaafe Ayaano bi hajjee daaggoonane kittinneenaꞌoyich boonoshi qelli qelloona wojjoon bi qoodii beeto.

Ashittinee Quumo

¹² Ashittino ikkoo bi tunetaanoona, meeti quumechone; ashittinee quumo meeto tuneebee ikke ashittinoon bi tunoommon, Kiristoosiyoo wotta ebiyoommone.

¹³ Ebiyoo Ayihudoon tunebon, Giriikoonoo tunebon, guunonoo tunebon, doononoo tunebon, ikke ashittinoon tunoyich ikke Yaafe Ayaanoona no afaalleetoyichiye; wotta Yeeri are ikke Yaafe Ayaanoochee no bullich bi uchitoyichiye.

¹⁴ Ashittino bi getteebeeto meeti quumeenaꞌo kiceetoani, ikke quumo ikkeeto toonoone.

¹⁵ Ikke ashi baatoo tiyiꞌi, “Ta, kishoo tuno ta qajjetoyich, ashittinee quumo toono taane” bi getigaata, ebina ashittinee quumo bi tuno echehe?

¹⁶ Wotta ikke ashi waamo tiyiꞌi, “Ta, aafo tuno ta qajjetoyich, ashittinee quumo toono taane” bi getigaata, ebina ashittinee quumo bi tuno echehe?

¹⁷ Quumo bulli aafo baach bi tunemmogaata, waayo aabichaa hakkeyeshe? Quumo bulli waamo baach bi tunemmogaata, shiiqqo aabichaa hakkeyeshe?

¹⁸ Tunetaa Yeeri baribare shuunoon shuuneebeeti quumeenaꞌon ikke ashittino tuniiꞌi bi shunnii shunnitooch kotiitone.

¹⁹ Bulli ikke quumo baach bi tunemmogaata, ashittino amoochee daneshe!

²⁰ Quumeenaꞌo meetinaꞌo tuneechaa ashittino ikkoo bi tuneto illa ebichiye.

²¹ Aafo kishoon “Neen qaawaache” geton hakkaache; wotta qello baatoon “Neen qaawaache” geton hakkaache.

²² Halla “Hakka guuteenaꞌone” getteebeeti quumeenaꞌo beshe gaacechinaꞌone.

²³ “Yeelliibeeti quumeenaꞌone” iyaꞌa no gabaa beetinaꞌon beshoon oogiiꞌa tahoon tajjaabeeto noone; wotta ashich bekkeyaani no quumeenaꞌon beshoon oogiibeeto noone.

²⁴ Malletechi no ashittinee quumeenaꞌoyich ebi bulli qaawiyaanoone. Tunebaani Yeeri yeelliibeeti quumeenaꞌoyich beshe oogoon immiꞌi, ashittinee quumeenaꞌon yeshiitone.

²⁵ Ebin bi tuniito, ashittinee quumeenaꞌo boonoshi daggooch barbarittinoo beetaachemmonaa boonoshinaa boonoshina shoodeyemmonoyichiye.

²⁶ Ikke quumo qaakkegaata, bareenaꞌo bulli tookkii qaakkeheete; ikke quumoyich oogo ichegaata, bareenaꞌo bulli tookkii emiriyeete.

²⁷ Illa ittoshi Kiristoosichi ashittino ittoshine; ittoshi qelli qelloona bi ashittinee quumo ittoshine.

²⁸ Yeeriyoo kittinnee guuphi daggooch shiichiꞌi mishiraachechinaꞌon, aree hillooch keemechinaꞌon, keejjinnoon dojjechinaꞌon qociitone; daakkiꞌi gaakkechi mooyon shuunechinaꞌon, biiyetinaꞌon wodiibeeti wojjechinaꞌon, iriteetinaꞌoyich deggechinaꞌon, yaabii qeejjechinaꞌon, baribare noonoona yibbaatechinaꞌon qociitone.

²⁹ Tunebaani kittinneenaꞌo bulli mishiraachechinaꞌone? Bulli keemechinaꞌone? Bulli dojjechinaꞌone? Bulli gaakkechi mooyon shuunechinaꞌone?

³⁰ Bullich biiyetinaꞌon wodiyee wojjoo beete? Bulli baribare noonoona yibbaatechinaꞌone? Bulli baribare noonoona yibbaateeton biichii wokkeellechinaꞌone?

³¹ Illa bulliyee beshe wojjeenaꞌon danoyich manjiiree qaawibote. Andoo bulliyee beshe gommon ittoshich bekkiyemmo taane.