1 Qorontoosi 11 - Kafa Linguistics Project

¹ Kiristoosichi qocoon ta dabboommon, ittoshi wotta ta qocoon dabbibote.

Yeerich Goyinnee Doyoo

² Bulli mooyona taan ittoshi gabii beetoyich, wotta ittoshich ta immeti doyoon manjiiꞌi ittoshi yechii beetoyich, ittoshin galletaabeeto taane.

³ Anaamo bullichi shimbo Kiristoosi, maachechi shimbo anaamo, Kiristoosichi shimbo Yeeri tunoon ittoshi ariyemmoyich shunnoye.

⁴ Ebich bi qelloon kaappiichii corootiibeeti woyee keemoon keemmiibeeti anaamo bulli bi shimbo tuneti Kiristoosiniye bi yeelliibeeto;

⁵ ebiyoommon bi qelloon kaafaanoon corootaabeeti woyee keemoon keemmaabeeti maachee bulli bi shimbo tuneti anaamoniye bi yeelliibeeto; ebiyoo bi qelloon kaafaani ure cakkeetiyoommi bi tunetoyichiye.

⁶ Bi qelloon kaafaache immi maachee bi qelloon cakkebuye. Cakkeyoo bi yeellegaata, kaafuye.

⁷ Anaamo Yeerichi shaahoonaa bi oogee yiiree malletoonon bekkiyecho bi tunetoyich, bi qelloon kaafo qaawiyaache; tunebaani maachee anaamoyich oogee yiiree malleteene.

⁸ Yeeri maacheen anaamo waanee halliyalli, anaamon maachee waanee hallaanoone.

⁹ Yeeri maacheen anaamoyich halliyalli, anaamon maachech hallaanoone.

¹⁰ Ebichi naboona, maraakeenaꞌochi naboonoo, maachee hakkee malletoo tuneti qelli kaafoon bi qellooch geduye.

^11-12 Tunebaani Yeeri maacheen anaamo waanee bi hallitoommon, ebiyoommon anaamo wotta maachee waaneeniye bi shiijjeebeeto; bullinoo hallito Yeerine. Ebich Doonona no beeti beemooch, maachee anaamona, anaamoo maacheena degee beetinaꞌone.

¹³ Eke ittoshi, ittoshi qelloona nallibote: Kittinneenaꞌo kiceeti xaaꞌoochaa maachee bi qelloon kaafaanoon Yeerich bi corootigaata, gaawiye?

^14-15 Qelloon kaacciibee genjiyoo anaamoyich bachoo bi tunoommon, genje qello maachech oogee yiiroo bi tunoon Yeeri ashich bi qociiti beemi shuriyoona ittoshich bekkeyaache? Yeeri maachech “Bi qello biich qeroone” iꞌi immitone.

¹⁶ Ebichi naboona gajjiteyemmo bi beegaata, nowoo tunebon woyee Yeerichi kittinnee guuphinaꞌoo, ebiyee damba bare doyoo nooch aalloone.

Doono Yesuusichi Madoochee Mamo

¹⁷ Ittoshi ikkooch kiceehooba, ittoshi shuuneebeeti shuunoo gondoonalli gaaweton bi deebo qajjii beetoyich, ebichi hillooch ta kooraabeeti wochoona ittoshin galleteyaache.

¹⁸ Shiichiree ta gettemmi mooyo, ittoshi kiceebeeti daggooch gajjiteyoo beemon ta waayetoyichiye; ebi gajjiteyoo qatoochaa iberoo tunoon tuushaano taane.

¹⁹ Ittoshi daggooch gajjiteyoo tiyiibeeto, ittoshi daggoochee ibere moochechi kittinneenaꞌo bekkemmoyichiye.

²⁰ Illa ikkooch kiceechii ittoshi maabeeto Doonochi koshon toonoone.

²¹ Ittoshi maa beegaata iibaareyaano ittoshine; bulli bi qelli qellee maacee miyoniye bi gabiibeeto; ebich ikkikkeenaꞌo maayemmon mucceꞌi shaacee beetaa, bareenaꞌo maa michiꞌi mashee beetinaꞌone.

²² Ishi amoone? Kechecho ittoshi toone? Ittoshi kexoochaa maa uyaachote? Woyee Yeerichi kittinnee guuphoniye ittoshi hoxeebeeto? Amolla aalli girechinaꞌoniye ittoshi yeelliibeeto? Ittoshin ama getote? Ebi mooyoyich ittoshin galletebote? Cir galleteyaache!

²³ Doono Yesuusi taach bi immiton, ta wotta ittoshich beshii ta immeti doyoo ebine: Doono Yesuusi beshiitaa bi ichemmi aroobee xum koshon tiijjiye;

²⁴ Yeerin galleteechii, tiichiꞌi, “Haꞌote; ebi ittoshich deejjeyemmi ta meenone. Taan shalligoyich, hini koshon mamote” iye.

²⁵ Ebiyoommon wotta gifiree hillooch xoofoon tiijjiꞌi ishichiye: “Hini woyinee uyo Yeeri ta damoona bi neechemmi andire wogee malletoone; ebin ittoshi uchimmi aabo bullina taan shalligoyich uyote” iye.

²⁶ Ebich hini koshon ittoshi maammi, hini xoofoochee ittoshi uchimmi aabo bullin, Doono Yesuusi wottee waammi wottoon ebin tuniyoona, ashich bi qitoon miixe beeyemmo ittoshine.

²⁷ Illa Doono Yesuusin yeelliimmi gommona, hini Doonochi koshoochee maabeeto woyee hini bi xoofoochee uchiibeeto bulli, Doono Yesuusichi meenonaa damoonon bi qallayitoyich, echeyemmone.

²⁸ Ebich asho bi qelli qelloona shiichiree bi mulleexi mooyon xiishiichi, are koshoochee mame; xoofoocheenoo uye.

²⁹ Asho koniyoona Doono Yesuusichi meeno amo gaata bi tunoon shalligaanoon bi maagaata, bi uyigaatoo bi toommooch naxoon deebemmone.

³⁰ Ebichi naboona ittoshi daggoochee meetinaꞌo biiyeꞌi niretinaꞌone; ikkikkeenaꞌoo qititinaꞌone.

³¹ Tunebaani shiichaꞌa no mulleexi mooyon no xiishito gaata, nalloo no toommooch waataacheshone.

³² Tunetaa yemeenee ciirooba, hini alemee asheenaꞌo toommooch bi nalliyooba, boonoshina tookkiree no toommooch bi nallaachemmoyich, and Doono Yesuusi no toommooch nalliibee sheerii beetone.

³³ Illa ta maneenaꞌote! Tookkii mamoyich ittoshi kicee beegaata, iibaareebote.

³⁴ Ittoshi kiceyoo nalloon ittoshi toommooch bi deebaachemmoyich, shaaceto koniyoona bi beegaata, bi kexoochaa mame. Echeti mooyon ittoshi waan ta waahooba qociyemmo taane.