1 Qorontoosi 10 - Kafa Linguistics Project

Shahalloyich Goyinnoochee Woho

¹ Ta maneenaꞌote! Ebin ittoshi tuushoon shunaache. No qaabbechinaꞌo bulli quboona yiireebee Ceelle baharee aacon kimmiyeete.

² Muusina tookkii ikkottoyich, are quboonaa baharee aacona afaalleeheete.

³ Boonoshi bulli ikke ayaanee maayoon maaheete;

⁴ boonoshi bulliyoo ikke ayaanee uyoon uchiyeete; ebinoo boonoshin dabbiibeeti ayaanee Xaqqee Inderoochee uchitinaꞌone; are ayaanee Xaqqee Inderoo Kiristoosine.

⁵ Tunebaani Yeeri boonoshi daggoochee meetinaꞌona emiraanoone; ebich boonoshi dubeno barahooch dihii echetone.

⁶ Illa gonde mooyon boonoshi qaatitoommon no qaataachemmoyich, hini mooyo bulli nooch cuuꞌiyee malletoone.

⁷ “Israꞌeeleenaꞌo mamonaa uyonoyich koteheete; aroocheenoo duubba tiyiyeete” getaa bi kooreetoommon, boonoshi daggoochee ikkikkeenaꞌo tuniitoommon, shahalloyich goyinneyaahote.

⁸ No wotta boonoshichoommon shunoon maayaayone; boonoshi daggoochee ikkikkeenaꞌo shunoon maaꞌi ikke areddoon hiyaa keejje hume asheenaꞌo qitii ciiretinaꞌone.

⁹ Boonoshichoommon “Doonon yeshi beegone” gettaayone; boonoshi daggoochee ikkikkeenaꞌo “Doonon yeshi beegone” iꞌi dingeroona qoppeꞌi qitii ciiretinaꞌone.

¹⁰ Boonoshichoommon guruuxaayone; boonoshi daggoochee ikkikkeenaꞌo guruuxaa, aalliyecho kindiꞌi boonoshin aalliitone.

¹¹ Boonoshi toommooch tuneti mooyo bulli nooch malletoo tunetone; ebiyoo hini ciireexi yemeenooch beeti noon cuuꞌiyane bi kooreeto.

¹² Ebich “Kupphaꞌa neexaabeeto taane” ii beeto bulli bi dihaachemmoyich, bi qelloon ariibe.

¹³ Ashi toommooch waabeeti qiiccoyee damba bare qiicco ittoshi toommooch waataanoone; ittoshi hakkoyee beshiti qiicco ittoshi toommooch bi woyemmoyich daaggaani Yeeri gibeneetone; qiiccee toommooch beebee qiiccoocheenoo ittoshi muriccemmi kelloon ittoshich qanniyemmone.

¹⁴ Ebich ta shunechinaꞌote! Shahalloyich goyinnoochee wohote.

¹⁵ Mullecho ittoshi tunoon ariiꞌaaniye ebin ittoshich ta gettaabeeto; ebi ta gettaabeeti mooyon ittoshi nallibote.

¹⁶ Yeerin galletaꞌa no qoodeebeeti, diireeti xoofeexi uyo Kiristoosichi damoon gogo toone? No tiichaabeeti kosho Kiristoosichi meenon gogo toone?

¹⁷ Kosho ikkoo bi tunetoyich, hini are koshoochee qoodeebeeto no tunetoyich, no meettetaanona, ikke ashittino noone.

¹⁸ Eke Israꞌeeleenaꞌon gabibote: Yeerich giddeti deejjee maayoon maa beetinaꞌo deejjee gudoona tookkii ikkittino boonoshich beeto toone?

¹⁹ Illa ta gettaabeeto ama iiniye? “Shahalloyich deejjeeti deejjoo bi hallemmi mooyo beete” iiniye? Woyee “Shahalloo ittoshich bi hallemmi mooyo beete” iiniye?

²⁰ Toonoone; ta gettaabeeto, “Aageteenaꞌo deejjiibeeti deejjoo yinneenaꞌoyichani, Yeerich toonoone” iiniye. Ebich yinneenaꞌona tookki ittoshi guuphon qaawaache.

²¹ Doono Yesuus Kiristoosichi xoofoochee uyibee, yinneenaꞌo xoofoochee wotta uyon hakkaachote; Doono Yesuus Kiristoosichi madoochee maabee, yinneenaꞌochi madoochee wotta mamon hakkaachote.

²² Ebin tuniyoona Doonon Kiristoosin qanaatiibona? Nooch biyee beshe giidoo beete?

²³ “Bulli mooyo daaggeetone;” tunebaani bulli mooyo gaaccemmo toonoone. “Bulli mooyo daaggeetone;” tunebaani bullin mooyo eenniyemmo toonoone.

²⁴ Asho bulli bi manoyich gaawemmi mooyon gabiballi, bi qellichon baach gabaaye.

²⁵ Gabiyoochee kemeebeeti meeno bullin echeyaanoon, axiraacheyaanoonoo mamote.

²⁶ Ebiyoo “Showoonaa bi daggooch beeto bullina Doono Yeerichone” getaa Yaafe Macaafooch bi kooreetoyichiye.

²⁷ Kiristoosi toommooch mulloon tooꞌiyaani asho bi kexooch ittoshin bi ataalli gaata, shunniꞌi ittoshi hamigaata, bi giddiimmo bullin echeyaanoon, axiraacheyaanoonoo mamote.

²⁸ Tunebaani koniyoona ittoshich “Ebi deejjee meenone” bi getigaata, “Taan mangemmone” getiree bi gabaachemmoyich, ittoshich gettiti are uroyicha getiree maayaahote.

²⁹ Ta ishichaabeeto, “Ne manoochi mullo guttemmone” getoyichalli, “Ne hajjee mullo guttemmone” getoyich toonoone. Ikke uro “Illa bare ashi mullo gutteyaachemmoyich tuniiya ta qaawiton amoyichiye ta qajjemmo?

³⁰ Yeerin galletaꞌa ta maagaata, Yeerin galletaꞌa ta maabeeti maayoyich, amoyichiye taan boonoshi gondiyemmo?” getiree echemmone.

³¹ Illa ittoshi maataa, ittoshi uchitaa woyee amoonolla ittoshi tuniitaa, ittoshi tuniibeeti mooyo bullin Yeerichi oogoyich tuniibote.

^32-33 Meeti asheenaꞌo wodemmoyich, boonoshich gaaccemmi mooyonalli taach gaaccemmi mooyon qaawaanoon, bulli mooyona asho bullin emirikkaabeeti taachoommon, ittoshiyoo wotta asho bullin emirikkibote. Ayihudee ashoyich, Giriikee ashoyich, Yeerichi kittinnee guuphoyichoo xugo tuneyaahote.