1 Qorontoosi 1 - Kafa Linguistics Project

Diggiyoo

¹ Kiristoos Yesuusichi mishiraachecho tunoyich Yeerichi daaggoona ceekketi Phawuloosinaa no manoo Sostenoosina waanee,

² Qorontoos beeti Yeerichi kittinnee guuphoyich, Kiristoos Yesuusina Yeeri yaafitinaꞌonoyich, wotta noonnaa boonoshinoyich Doono tuneti no Doono Yesuus Kiristoosichi shigoon xaaꞌoo bullichaa ceeggii beetinaꞌo bullina tookkii yaafeenaꞌo tunoyich ceekketinaꞌoyich:

³ No Nihoo Yeerinaa Doono Yesuus Kiristoosina waanee wojjoonaa diggoona ittoshich tunebe.

Yeerin Galleto

⁴ Kiristoos Yesuusina ittoshich Yeeri immiti wojjee naboyich bulli aaboon ta Nuggishoon galletaabeeto taane.

^5-6 Ta galletaabeeto, ittoshich no miixeti Kiristoosichi qaaroon Yeeri manjiitoyichiye; Yesuus Kiristoosina ikkotteti ittoshi bulli mooyona, ebiyoo yibbaatoo bullinaa ariyoo bullina gaannecho tuneto ittoshine.

⁷ Ebich Yeeri no Doono Yesuus Kiristoosichi womon bi bekkiyemmi aaboon ittoshi quyeebeeti daggooch, Yaafe Ayaano immiibeeti wojjoochee ikkolla ittoshich shappito aalloone;

⁸ wotta Yeeriyoo no Doono Yesuus Kiristoosi wotteree bi woyemmi aabooba ikke bachaallo ittoshi tunemmoyich, ciirooch beddaahaa ittoshin manjiiree neechemmone.

⁹ Bi Bushoo no Doono Yesuus Kiristoosina tookki ikkittino ittoshich bi beeyemmoyich, ittoshin ceeggiti Yeeri ebin ceechoyich gibeneetone.

Qorontoos Beeti Kittinneenaꞌo Daggooch Beeti Kaaro

^10-12 Tunebaani ta maneenaꞌote! Ittoshi daggooch kupphe kaaro beemon ikkikke Qelooꞌi kechi asheenaꞌo waanee waayeto taane. Ebiyoo ittoshi daggoochee ikkoo “Ta Phawuloosicho taane” bi immona baroo “Ta Aphiloosicho taane” ii beeto bi tunoon, wotta ikkoo “Ta Keeficho taane” bi immona baroo “Ta Kiristoosicho taane” ii beeto bi tunooniye. Ebich ta maneenaꞌote! Ittoshi bulli ikke yibbaatoon ittoshi yibbaatemmoyich, no Doono Yesuus Kiristoosichi shigoona ittoshin qollehoye; ikke mulloonaa ikke gaboona ikkottebotalli, kaareꞌi baribara guupheyoo ittoshi daggooch beeyaaye.

¹³ Halla Kiristoosi qoodeetone? Ittoshich yooddeto, Phawuloosine? Woyee Phawuloosichi shigoona aacona afaalleetote?

¹⁴ Qerisiphoosinaa Gaayoosinoyee damba ittoshi daggoochee koninolla aacona afaallaano ta tunoyich, Yeerin galletehoye.

¹⁵ Ebich koniyoona “Aacona boonoshi afaalleeto, Phawuloosi shigoonane” geton hakkaache.

¹⁶ Eeha, Isxifanoosichi kechi asheenaꞌon wotta aacona afaallito taane; tunebaani ebiyee damba bare ashoon aacona ta afaalloon xiishaano taane.

¹⁷ Kiristoosi taan bi wocheto, bi mishiraachee qaaroon ta gettemmoyichalli, ashoon aacona ta afaallemmoyich toonoone; Kiristoosichi masqalo duubo bi tuneyaachemmonoyich, ta gettaabeeto yibbaatee acona toonoone.

Yeerichi Giidoonaa Shalligoona Kiristoosi Tuno

¹⁸ Kiristoosichi masqalee mooyo aallooch hammii beetinaꞌoyich tuushittinoone; tunebaani wodaabeeti nooch Yeerichi giidoone.

¹⁹ Yaafe Macaafoochaa “Shalligechinaꞌochi shalligoon aalliyemmo taane; ariyechinaꞌochi ariyoon bajjemmo taane” getaa kooreetone.

²⁰ Illa shalligecho aaye? Muusichi Sheeree dojjecho aaye? Hini yemeenee ariyechi gajjiteyecho aaye? Yeeri alemee shalligoon tuushoo tuniyaanoone?

²¹ Yeerichi shalligoochee tiyitona, hini alemeexi asheenaꞌo boonoshi shalligoona Yeerin ariyoon boonoshi mawiitoyich, tuushittino shaahiitaa ciicheebeeti, hini no gettaabeeti mishiraachee qaaroona boonoshi mulloon Kiristoosi toommooch tooꞌii beetinaꞌon wodiyoyich, Yeerichi daaggoo tunetone.

²² Ayihudeenaꞌo malletoon beegoyich, Giriikeenaꞌoo shalligoon danoyich qaawiyeete.

²³ Tunebaani no, masqalooch yooddeti Kiristoosin awaajjaabeeto noone. Ebi Ayihudeenaꞌoyich xugo tunehe; Aageteenaꞌoyichoo tuushittinoon shaahiye.

²⁴ Tunebaani Yeeri ceeggitinaꞌoyich, Ayihudeenaꞌo tunebeeta Giriikeenaꞌo, Kiristoosi Yeerichi giidoonaa Yeerichi shalligoonane.

²⁵ Ebiyoo ashi shalligoyee Yeerichi tuushittino bi beshitoyichiye; ashi giidoyee Yeerich niro bi beshitoyichiye.

²⁶ Ta maneenaꞌote! Yeeri ittoshin bi ceegiyooba, am shaahe asho ittoshi gaata, eke shalligibote. Ittoshi daggoochee meetinaꞌo hini alemeexi ashi shalligoommi shalligechinaꞌo tooneenaꞌone; ittoshi daggoochee meetinaꞌo hini showeexi ashi giidoommi giidechinaꞌo tooneenaꞌone; ittoshi daggoochee meetinaꞌo hini showeexi ashi gaboochaa ogooge ashi yareenaꞌo tooneenaꞌone.

²⁷ Ebiyoommon shalligechinaꞌon yeelliyoyich, Yeeri hini alemeexi ashi gaboochaa tuusheenaꞌon kaacciye; giidechinaꞌon yeelliyoyich, hini alemeexi ashi gaboochaa giidaalleenaꞌon kaacciye.

²⁸ “Hini showee toommooch beeteete” getteeti mooyinaꞌon aalliyoyich, Yeeri hini alemeexi ashi gaboochaa hoxeeꞌi duppeti mooyinaꞌonaa batteeti mooyinaꞌonon kaacciye;

²⁹ ebich Yeeri aafoochaa geecoon hakkemmo koniyoona aalloone.

³⁰ Tunebaani Yeeri ittoshin Kiristoos Yesuusina tookkii ikkochitone; ebich Yeeri biin nooch shalligoo, cadiqoo, yaafoonaa biishechona tuniitone.

³¹ Ebich ishichaa bi kooreetoommon, “Geecemmo Doonona geecibe.”