1 Pheexiroosi 5 - Kafa Linguistics Project

Geeneenaꞌonaa Gurimaasheenaꞌonoyich Icheti Ciico

¹ Illa boonoshina tookkii geeno, Kiristoosichi xuuxee miixoo, wotta bekkeya ii beeti Kiristoosichi oogee yiiroochee qoodeyecho tuneti ta, ittoshi daggooch beeti geeneenaꞌon ciiccaabeeto taane:

² Asho bi bagoon bi quyoommon, ittoshi waan beeti Yeerichi asheenaꞌon quyebote. Asho ittoshin shuunebote iꞌi iritiitoyich tuneyaanoon, Yeeri daaggitoommon ittoshi mulloochee tiijji shuniree shuunebote. Gaacoon danoyich hiriggoona tuneyaanoon, deꞌe ittoshi daaggoona quyebote.

³ Kittinnee guuphinaꞌoyich gaawe shaahiyoon tuneree bekkebotalli, boonoshin giidoona hajjiyaahote.

⁴ Ebi mooyinaꞌon ittoshi tuniigaata, Qiddeenaꞌochi Qiddoo bi waammi aabooba, aalleyaani oogee yiiree gubbichoon ittoshich immemmone.

⁵ Gurimaasheenaꞌote! Ebiyoommon wotta geeneenaꞌoyich deꞌa getote. Yaafe Macaafo “Yeeri geecechinaꞌoyich mooyo kaameyaachemmoyich tuniihe; tunebaani boonoshi qelloon giishii beetinaꞌoyich wojjoon immiye” iye. Ebich kittinnoo tuneti ittoshi bulli ikkoo baroyich bi qelloon giishiibee qellee giishiyoon tahoochoommon tahebote.

⁶ Illa Yeeri bi daaggiti aabooba ittoshin bi oogiyemmoyich, Beshe Mawe Yeeri aafooch ittoshi qelloon giishiibote.

⁷ Biyoo ittoshich gabiibeeto bi tunetoyich, ittoshin iritiibeeti mooyo bullin bi toommooch dufote.

⁸ Ittoshi qelloon quyoona beebote; qaallibote. Ittoshi shixecho tuneti daabiloosi bi qooxxemmon qaawiꞌi, ciddiibeeti daaheroochoommon guuddii beetone.

⁹ Showee toommooch beeti kittinnee ittoshi maneenaꞌo ebiyoommi xuuxo bullin beeggii beetinaꞌo boonoshi tunoon ariiree, ittoshi mullee tooꞌiyoona manjiree, biin koyebote.

¹⁰ Bulli yemeenee bi oogee yiiroochee ittoshi qoodeyemmoyich Kiristoosina ittoshin ceeggiti, wojjoo bullin immiibeeti Nuggishoo, giisheche aaboon xuuxoon ittoshi beeggitoyee gubb, bi qelloona bi, ittoshich mooyo bullin tachemmone; ittoshin manjiyemmone; ittoshin kupphiyemmone; Kiristoosi toommooch mulloon tooꞌiyoochee ittoshi shuuraachemmoyich ittoshin neechemmone.

¹¹ Biichoo bulli yemeenoon giidoo tunebe. Ameena.

Ciireexi Diggiyoo

¹² Ittoshin ciiccaabee, hini wojjoo ibere Yeerichi wojjoo bi tunoon ittoshich miixaabee, gibeneeti manoommon ta tuniiti Sillaasichi kishoona hini qamini wochoon ittoshich kooraa daachiibeeto taane. Ebi are Yeerichi wojjoona manjiree neexebote.

¹³ Ittoshina tookkii wotta Yeeri biich kaacciti, Baablooni kittinnee guuphi asheenaꞌo, ta bushoo Maariqoosiyoo ittoshin diggii beetinaꞌone.

¹⁴ Kiristoosichi shunoona shumeyoona ittoshinaa ittoshina ikkoo baroon diggiibe. Kiristoosicho tuneti ittoshi bullich diggoo tunebe.