1 Pheexiroosi 4 - Kafa Linguistics Project

Andire Kashoona Beemo

¹ Kiristoosi meenona xuuxoon bi beeggitoyich, ittoshi wotta ebi shaahe gaboon yeshoyich qannibote. Ebiyoo bi meenona xuuxoon beeggiti asho, axaaxoon shuunoon qajjito bi tunetoyichiye.

² Illa ebiyee gubb meenona beemoyich biich echeti yemeenooch bi beeyemmo Yeerichi daaggoyichalli, bi meechi gonde qaatoyich hajjeeree toonoone.

³ Yeerin ariyaani asheenaꞌo tunii beetoommon, yeelliibeeti kaayo, meechi qaatoo, masho, qelloon battiibeeti duubo, beshiiꞌi uyonaa tiyaariibeeti gommona shahalloyich goyinnoona ittoshi beshiiti yemeeno illa beddiye.

⁴ Ebi mooyoyich boonoshina tookkii ikkotteꞌi meechi qaatoo bullin ceechoyich ittoshi woco qajjitoyich worganeebee, ittoshin naagee beetinaꞌone;

⁵ tunebaani kashoona beetinaꞌonaa qititinaꞌonochi toommooch nalloyich qannito aafooch neexeree boonoshi shuuneti shuunoyich echeyemminaꞌone.

⁶ Asho bullichoommon meenona qitee nalloo boonoshi toommooch bi nalleyemmoyich, tunebaani ayaanoona Yeerichoommon boonoshi beeyemmoyich, mishiraachee qaaro qititinaꞌoyicholla wotta getteetone.

Yeeri Immiti Wojjoona Tatoona Shuuno

⁷ And illa bulli moochi ciiro katinnitone. Ebich corootoon ittoshi hakkemmoyich ittoshi qelloon quyoona qaalliree beebote.

⁸ Shuno bareenaꞌo shuuneti axaaxoon maariye; ebich bulli mooyoyee shiichiree ittoshinaa ittoshina mulloochee tiijjiree shunebote.

⁹ Guruuxeyaanoon ittoshinaa ittoshina ikkoo baroon iibbiibe.

¹⁰ Asho bi ikkikkoona Yeeri biich immiti baribare wojjoona tatoona shuuneree, are Yeer waanee bi deqqiti wojjoon bareenaꞌoyich gaaccemmon tuniibe.

¹¹ Yesuus Kiristoos waanaa mooyo bullina Yeeri oogemmoyich, Yeerichi qaaroon gettiibeeti asho koniyoona bi tunegaata, Yeerichi qaaroon bi gettemmoyich wocheeti ashoochoommon gete; maddeebeeto bi tunegaata, “Yeeri taach immiibeeti giidoonane ta maddaabeeto” getiree maddebe; oogee yiiroonaa giidoona bulli yemeenoon Yeerich tunebe. Ameena.

Kiristoosi Xuuxoon Beegoommon Xuuxee Beego

¹² Ta shunechinaꞌote! Kiristoosi toommooch ittoshi mullee tooꞌiyoo iberoo bi tuno xiisheyemmi, qaaqqoommo tuneꞌi ittoshi toommooch shaggiibeeti xuuxoyich “Dallaawe mooyo no toommooch waatone” getiree keqqiyaahote.

¹³ Tunebaani bi oogee yiiroo gaxxeehooba oogichi ittoshi emiremmoyich, and kiristoosichi xuuxee qoodeyecho ittoshi tunetoyich emiribote.

¹⁴ Kiristoosicho ittoshi tunetoyich ittoshin boonoshi naaggitaa, diireeto ittoshine; ittoshi diireetoo, oogee yiiree Ayaano, ebiyoo Yeerichi Ayaano, ittoshi toommooch bi beetoyichiye.

¹⁵ Ittoshi daggoochee koni toommoochona xuuxo shagigaata, ashoon bi wuxitoyich woyee bi gaajjitoyich, woyee gonde shuunoon bi shuunetoyich woyee ashi mooyooch bi giyitoyich tunaaye.

¹⁶ Tunebaani kittinnoo bi tunetoyich xuuxo bi toommooch shagigaata, are shigoona bi ceekketoyich Yeerin galleteballi, yeellaye.

¹⁷ Yeeri nallemmi aabo shaggitone; shiichiree bi kechi asheenaꞌo toommooch nallemmone. Shiichiree no toommooch nallemmo bi tunegaata, Yeerichi mishiraachee qaaroyich deꞌa getaani asheenaꞌochi ciiro amoon tunehe?

¹⁸ Yaafe Macaafooch bi kooreetoommon, “Cadiqe asho oogeti xuuxoona wodemmo bi tunegaata, hukkechinaꞌonaa axaaxechinaꞌonochi toommooch amo tunehe?”

¹⁹ Ebich Yeerichi daaggoona xuuxoon beeggii beetinaꞌo, deꞌe mooyon tuniibee, gibeneeto tuneti, halliti Yeerichi kishooch boonoshi kashoon quyiibeete.