1 Pheexiroosi 3 - Kafa Linguistics Project

Mecheenaꞌonaa Keneenaꞌonoyich Icheti Ciico

^1-2 Mecheenaꞌote, ebiyoommon wotta ikkikke ittoshi keneenaꞌo Kiristoosichi wochoon iberiyaaneenaꞌo boonoshi tunegaata, noonoona getona tuneyaanoon, boonoshin oogiibee, gaawe qocoona ittoshi beemon boonoshich bekkiibee, ebi ittoshi gaawe beemi qoco boonoshin Kiristoos waan bi deebemmoyich boonoshich deꞌa getote.

³ Qellee shippeyoonaa aachee gudichoon gedona woyee gatiyoo aaxxoo tuneti qoreddoon tahoona ashi beꞌenoyich tuneebeeti maachi shashoon qaawiyaahote.

⁴ Tunebaani Yeeri aafooch bi gatiyoo oogeton aaxxoo tuneti maacaa mashaamiti ashoon tunebote. Gaꞌi deꞌoonaa gaawe shuriyechonon tuneree aalleyaani malletoon qaawibote.

⁵ Ebiyoommon wotta wonnee yemeenooch Yeerin gibeneꞌi biich diireeti genneenaꞌo boonoshi keneenaꞌoyich deꞌa getona mashaamitinaꞌo tunetinaꞌone.

⁶ Eboshi daggoochee Saari ikkeene; biyoo Abrahamin “Ta doonocho” iyaꞌa ceeggaabee biich deꞌa iyane. Ittoshiyoo wotta amee mooyoyichona shataanoon gaawe shuunoon ittoshi shuunegaata, Saarichi bushiishoo ittoshine.

⁷ Keneenaꞌote! Ebiyoommon wotta hakka guuteenaꞌo boonoshi tunoon ariiree, gaawe shalligoona ittoshi mecheenaꞌona tookki beebote. Yeeri aafooch giddeꞌi corootoyich bajjiibeeti amee mooyolla bi beetaachemmoyich, boonoshiyoo wotta ittoshina tookki bulli yemeenee kashee wojjoon Yeer waanee danemminaꞌo boonoshi tunoon gabibee boonoshin oogiibote.

Cadiqee Shuunoon Shuunoona Xuuxee Beego

⁸ And ciiroochaa ta gettaabeeto, ittoshi bulli ikke mulloona beebote; ikke ashi iritoon ittoshi qelli iritoommon tuniiree ciinote; manaamanoochoommon ittoshinaa ittoshina shunebote; ariqqechonaa gaꞌi deꞌoonon tunebote.

⁹ Asheenaꞌo ittoshi toommooch gondoon boonoshi shuunegaata, gondoon gaaccaahote; boonoshi naagigaata, boonoshin diiribotalli, wochiree naaggaahote; ittoshi ceekketo ebin tuniyoona diiroon ittoshi woraashemmoyichiye.

¹⁰ Yaafe Macaafooch bi kooreetoommon, “Emiree kashoona beemon shunniibeeto, bi beeti yemeenooch gaawe mooyon beegoyich qaawiibeeti asho, bi heciyoona gondoon, bi noonoonoo dawushee yibbaatoon, yibbaataaye.

¹¹ Gonde mooyoochee bara shokiree, gaawe mooyon shuunebe; ashoona tookkiree diggoona beemon kupphiiree qaawibe.

¹² Doono Yeeri aafo cadiqeenaꞌo waan ciinnii beetone; boonoshi qolloon waayoyich bi waamo qechoone; tunebaani Doonochi aafo gondoon shuunee beetinaꞌoyich maggemmone.”

¹³ Deꞌe shuunoon shuunoyich ittoshi qiiccegaata, ittoshi toommooch gondoon hallemmo konine?

¹⁴ Tunebaani cadiqee shuunoon ittoshi shuunetoyich ittoshin xuuxoon boonoshi bekkiigaata, diireeto ittoshine. Asheenaꞌochi miichoon shattaahote; keqqiyaahote.

¹⁵ Tunebaani ittoshi mulloona Kiristoosi Doono bi tunoon shalligibee biich goyinnebote. “Gubbich ittoshich beeti gibeno amoone?” iꞌi ittoshin echemminaꞌochi echoon ittoshi wochemmoyich, bulli aaboon qanniton tunebote.

¹⁶ Tunebaani shiimebee boonoshi yibbaatoon qallayaanoon oogiibee yibbaatebote. Kiristoosina ittoshi daneti gaawe qocoon naageebeeti asheenaꞌo boonoshi oonniibeeti oonoyich boonoshi yeellemmoyich, xalle mullo ittoshich beebe.

¹⁷ Ebiyoo ebi Yeerichi daaggoo bi tunegaata, gondoon shuunoona tuneyaanoon deꞌoon shuunoona xuuxoon ittoshi beego gaaweto bi tunetoyichiye.

¹⁸ Ebiyoommon Kiristoosi Yeer waan noon giddiyoyich, bi qelloona bi cadiqo tuneebee, hukkechinaꞌoyich ikke wottoon ashi axaaxee naboona xuuxoon beeggiꞌi qititone; meenona qitiye; tunebaani ayaanoona beeyechon tunehe.

¹⁹ Are beeyechon bi tuneti ayaanoona hammiꞌi, cuyee kexooch cucheꞌi beeti kasheenaꞌoyich Yeerichi qaaroon gettiye.

²⁰ Ebi cuyee kexooch cucheꞌi beeti kasheenaꞌo wonna Noohi yemeenooch markabo shuuneehooba, Yeeri haaꞌiyoona bi quyee beetaa biich deꞌa getaache itinaꞌone; are markabooch giyiꞌi aacona woditinaꞌo giishecheenaꞌo, eboshiyoo shimitte asheenaꞌo baachiye.

²¹ Ebi aaco wotta and noon wodiibeeti aacona afaalleyee shaahiyoone; ebiyoo ashi achooch beeti kiinoon machii bayona tuneyaanoon xalle mulloona Yeer waan giddemmi qolloonane; ebiyoo bi tuneebeeto, Yesuus Kiristoosi qitoochee timonane.

²² Yesuus Kiristoosiyoo damba shimaayooch kechiꞌi Yeerichi qanne badd beetone; arooch beeti maraakeenaꞌo, shimaayeexi ukkireenaꞌonaa giidechinaꞌo bullina biich hajjee beetinaꞌone.