1 Pheexiroosi 2 - Kafa Linguistics Project

¹ Illa gondo bullin, dawushoo bullin, mullee xalloo shaahoon, qanaatoon, oono bullinoo ittoshi waanee wokkiibote.

² Wodooch ittoshi diccemmoyich, and shiijjeti gaggere bushiisheenaꞌo ejjoon qaatoommon, ittoshi wotta xalloo tuneti Yeerichi qaaree ejjoon qaatibote.

³ Yaafe Macaafooch bi kooreetoommon, “Doono Yeeri deꞌo bi tunoon ciinnii ariito ittoshine.”

Kashechi Xaqqoommo Doono Yesuusi Tuno

⁴ Ashi waanaa hoxetaa duppeti, tunetaa Yeer waanaa kaacheti kashechi aaxxe xaqqoommi Yesuus Kiristoos waan giddemmo ittoshine.

⁵ Ittoshi giddemmo, kashechi xaqqoommon ayaanee kexon tuneꞌi hakkeyoyichiye. Ebina Yesuus Kiristoos waanaa emirikkiibeeti ayaanee deejjoon Yeerich giddiyoyich, yaafeeti qeesheenaꞌon tunemmo ittoshine.

⁶ “Yeeri ‘Ebiyoche, kexon deggii neechiibeeti, giimbee guummoommon tuniiꞌa ta kaacceti, taach aaxxoo tuneti xaqqoon Tsiyoon kotiyemmo taane; bi toommooch mulloon tooꞌiibeeto yeelleyaachemmone’ itone” getaa Yaafe Macaafooch kooreetone.

⁷ Illa ittoshi mulloon bi toommooch tooꞌiiti ittoshich ebi xaqqo aaxxoone; tunebaani bi toommooch mulloon tooꞌiyaaneenaꞌoyich, “Gimbenyeenaꞌo hoxee duppiti xaqqo, aroo kexon deggii neechiibeeti giimbee guummon tunehe,”

⁸ wotta, “Asheenaꞌon tephemmi xaqqoon, yexi dichemmi xaqqoon tunehe” getaa bi kooreetoommone. Yeerichi qaaroyich deꞌa geto boonoshi qajjitoyich, tepheeꞌi dihii beetinaꞌone; ebiyoo shiichiꞌi Yeeri boonoshich gabitoommoniye.

⁹ Tunetaa manderoochee keyiree worganikkiti bi bekkooch ittoshi giyemmoyich, ittoshin ceeggiti Yeerichi deꞌittinoon ittoshi gettemmoyich, kaacheti shiijjeroo, taatoo Yeerich maddeebeeti qeeshoo, yaafeeti aagetoo, bi hajjoo tuneti yoodo ittoshine.

¹⁰ Ebiyee aaf Yeerichi yoodo toono ittoshine; tunebaani and Yeerichi yoodo tuneto ittoshine; ebiyee aaf Yeerichi ariqqittinoon ariyaano ittoshine; tunebaani and bi ariqqittinoon ariito ittoshine.

Yeerichi Maddechinaꞌo

¹¹ Ta shunechinaꞌote! Kashoona koyeebeeti meechi qaatoochee ittoshi wokkemmoyich, hini showee toommooch iibboonaa shiqqoona tuneti ittoshin qollaabeeto taane.

¹² Yeerin ariyaani asheenaꞌo ittoshin, “Gondoon shuunee beetinaꞌone” iꞌi boonoshi oonniteenona, ittoshi gaawe shuunoon beegiree, Yeeri nalloyich bi waammi aabooba biin boonoshi oogiyemmoyich, boonoshi daggooch ittoshi beemi qoco gaaweto tunebe.

¹³ Doono Yesuus Kiristoosicha getiree ukkireenaꞌo bullich deꞌa getote; wotta bulliyee besho tuneꞌi qeejjiibeeti taatoyich,

¹⁴ gondoon shuunee beetinaꞌon sheeroonaa deꞌoon shuunee beetinaꞌon naadoonoyich bi waanee wocheeti iraasheenaꞌoyichoo deꞌa getote.

¹⁵ Ebiyoo deꞌe shuunoon shuunebee, iberoon ariyaani mullaalleenaꞌo ittoshi toommooch boonoshi yibbaatemmi yibbaatoon ittoshi mucciyemmoyich, Yeerichi daaggoo bi tunetoyichiye.

¹⁶ Guuchittinooch hajjeyoochee keyiree Yeerichi guuninaꞌochoommon beebotalli, are guuchittinoochee ittoshi keyon gonde shuunee qeroon tuniyaahote.

¹⁷ Asho bullin oogiibote; kittinnee ittoshi maneenaꞌon shunote; Yeerin shatote; taatoon oogiibote.

Kiristoosichi Shaahiyoo

¹⁸ Guuninaꞌote! Deꞌeenaꞌonaa ariqqechinaꞌona tuneti ittoshi dooninaꞌon baach tuneyaanoon, xummeenaꞌo tuneti ittoshi dooninaꞌonoo wotta oogiibote; boonoshichoo deꞌa getote.

¹⁹ Xukkeebee xuuxoon beeggiibeeti asho Yeerin gabiibee are xuuxoon bi haaꞌiigaata, galleteyemmone.

²⁰ Ittoshi shuuneti axaaxoyich yexxeebee ittoshi haaꞌiigaata, amee naadoon danehote? Tunebaani gaawe mooyon shuuneechii xuuxoon beeggiibee ittoshi haaꞌiigaata, ebi mooyo Yeeri aafoochaa ittoshin galletiyemmone.

²¹ Yeeri ittoshin bi ceeggito ebichiye. Wotta Kiristoosi bi qelloona ittoshicha ii xuuxoon beeggiꞌi, bi hilloon dabbibee, bi shuunetoommon ittoshi shuunemmoyich ittoshich bekkiitone.

²² Biyoo axaaxoon shuuneyaanoone; kooto bi noonoochee keyaanoone;

²³ biin naaggii boonoshi beehooba, wochiꞌi naagaanoone; biin boonoshi xuuxii beehooba, miicheyaanoone; tunebaani cadiqoona nalliibeeti Yeerich bi qelloon beshiiꞌi immiye.

²⁴ Axaaxoyich qitiree cadiqee shuunoon shuunebee no beeyemmoyich, bi qelloona bi meenona michi toommooch yooddeꞌi no axaaxoon shaaggiye; yexxeꞌi bi mayetoyich, wodito ittoshine.

²⁵ Ebiyee aaf aalleti bagoochoommon yallyallimiibeeto ittoshine; tunebaani and ittoshi kashee Qiddoonaa Quyechona tuneti Kiristoos waan wotteto ittoshine.