1 Pheexiroosi 1 - Kafa Linguistics Project

¹ Yesuus Kiristoosichi mishiraachechi Pheexiroosi waanee, Faantoosee showooch, Galaatee showooch, Qephadooqee showooch, Isiyee showoonaa Bitaaniyee showoonooch beeti katemoo bulliich shiqqoo tunee shaceꞌi beeti, Yeerina kaacheti asheenaꞌoyich,

² Nihoo Yeeri shiichiꞌi bi gabitoommon, bi kaaccitinaꞌoyich, Yesuus Kiristoosich deꞌa getoyich bi damoo wucaa xalletinaꞌonaa Yaafe Ayaanoona yaafeetinaꞌonoyich: Yeerichi wojjoonaa diggoona ittoshich woddebe.

Yeerichi Asheenaꞌoyich Beeti Gibeno

³ No Doono Yesuus Kiristoosichi Nuggishoonaa Nihoona tuneti Yeeri galleteebe. Yesuus Kiristoosi qitoochee timona, gibenoona ceenniti kasho nooch bi beeyemmoyich, bi maaree beshoona guttinnoon no shiijjemmoyich tuniitone.

⁴ Ebich Yeeri shimaajji kexooch ittoshich aalleyaani, duubeyaani, ciireyaani iristoon kotiitone.

⁵ Ittoshi mulloon Kiristoosi toommooch ittoshi tooꞌii beetoyich, yemeenee ciirooba bekkeya qanniti wodoyich Yeerichi giidoona quyeeꞌi beeto ittoshine.

⁶ And asheenaꞌo baribare gommona ittoshin boonoshi xuuxii beetoyich, giisheche aaboyich baach ayiniibeeto ittoshi tunetaanona, ebich oogeton emiribote.

⁷ Aallemmi aacholla qaaqqooch bi geddeebeeto, amoommo gaata bi tunoon xiishoyichiye; ebiyoommon wotta aachoyee beshe oogeti aaxxoo tuneti, Kiristoosi toommooch ittoshich beeti mullee tooꞌiyoo xuuxee daggoona bi besheebeeto, iberoo bi tuno xiisheyemmoyichiye. Wotta Yesuus Kiristoosi bekkehooba, galleto, oogee yiiroonaa naadoonon ittoshi danemmoyichiye.

⁸ Biin aafoona beegaano ittoshi tunetaanoona, shunniibeeto ittoshine; and biin beegaano ittoshi tunetaanoona, ittoshi mulloon bi toommooch tooꞌiito ittoshine. Ebich qaaroona ebine getaa getteyoo hakkeyaani, oogichii worganikkiti emiroon emiriibeeto ittoshine.

⁹ Ittoshi emiriibeeto, Yeeri ittoshin wodii bi beetoyichiye; ebiyoo ittoshi mulloon bi toommooch ittoshi tooꞌitoyichiye.

¹⁰ Yeeri ittoshich immemmi wojjeechon keemmiti keemechinaꞌo ebi wodoon kupphiiꞌi maqqii qaawiibee kichii kindiiꞌi gabiyeete.

¹¹ Boonoshich beeti Kiristoosichi Ayaano, Kiristoosichi xuuxeechonaa are xuuxoyee gubb bi danemmi oogee yiireechonon shiichiꞌi miixeebee, ebi mooyo bi tunemmo amee yemeenooch gaata, aabichiree bi woyemmo gaata bi bekkiiton kichii kindiiꞌi ariyoyich qaawii beeheete.

¹² Are keemechinaꞌo boonoshi gettiti wochoona boonoshi maddeto, ittoshichalli, boonoshich tunee qayo boonoshich bekkehe; wotta shimaayoochee wochetaa waati Yaafe Ayaanee giidoona mishiraachee qaaroon ittoshich miixeti asheenaꞌo and are wochoon ittoshich gettitinaꞌone. Maraakeenaꞌolla ebi mooyon maqqiꞌi ariyoyich qaatii beetinaꞌone.

Yaafeeti Qocoona No Beeyemmoyich Yeeri Noon Ceego

¹³ Illa shuunoyich cuye tiyiree qannibote; ittoshi qelloon quyoona beebote; Yesuus Kiristoosi bekkehooba ittoshi danemmi wojjoon ceenoona gibenebote.

¹⁴ Yeerich deꞌa ii beeti bushiishoon tunebotalli, ebiyee aaf tuushoona ittoshi shuunetoommi qaatoon dabbiyaahote.

^15-16 “Ta, yaafoo taane; ebich ittoshi yaafeeton tunebote” getaa Yaafe Macaafooch bi kooreetoyich, ittoshin ceeggiti Yeeri yaafoo bi tunetoommon, ittoshi wotta ittoshi beemi qoco bullina yaafeeton tunebote.

¹⁷ Koninolla heppaanoon bi ikkikkoyich bi shuuneti shuunoommona bi toommooch nalliibeeti Yeerin “Ta Nihoocho!” iꞌi ittoshi ceeggii beetoyich, illa hini iibboommo tuneꞌi, ittoshi beeti yemeeno bulliich biin shatona beebote.

^18-19 Ittoshi qaabbechinaꞌo waanee ittoshi woraashiti duube beemoochee ittoshi biisheeto, birewoochoommon woyee aachoochoommon aallemmi mooyona tuneyaanoon, bachaalli xalle bagoommon tuneti, Kiristoosichi aaxxe damoona bi tunoon ariibeeto ittoshine.

^20-21 Biinoo Yeeri alemo halleyaan beetaa kaaccitone; wotta qitoochee biin tiijjiti, oogee yiiroonoo biich immiti Yeeri toommooch bi naboona ittoshi mulloon tooꞌiibeeti ittoshicha iꞌi hini yemeenee ciiroochaa bekkehe. Ebich ittoshi mullee tooꞌiyoonaa gibenoona Yeeri toommooch tunetone.

^22-23 Guttinnoon ittoshi shiijjeto, kashechonaa bulli yemeenoon beeyechona tuneti Yeerichi qaaroocheeniye; ebiyoo aalleyaani yaroocheenalli aallemmi yaroochee toonoone; and iberee qaaroyich deꞌa getona xalleꞌi ittoshi maneenaꞌoyich ibere shuno ittoshich beetone; ebich mulloochee tiijjiree ittoshinaa ittoshina manjiiree shunebote.

²⁴ Yaafe Macaafooch bi kooreetoommon, “Meeno taheti asho bulli mocoommone; bi oogee yiiroo bulliyoo mocee bungoommone; mocoo shoolliye; mocee bungoo oojjiye.

²⁵ Tunetaa Doono Yeerichi qaaro bulli yemeenoon beetone.” Ittoshichoo mishiraachee qaaroochaa getteeti wocho ebine.