1 Kiinoo 5 - Kafa Linguistics Project

Roobeelichi Shiijjeroo

¹ Israꞌeelichi gutenee bushoo Roobeeline; tunebaani Roobeeli gutenee bushoo bi tunetaanoona bi nihoochi qeenon bi eeꞌitoyich, gutenee bushittinee aalloo (gooroo) Israꞌeeli bushoo Yooseefi bushiisheenaꞌoyich ichetone. Ebich gutenee bushee aallee taroona yoodee mazgabooch kobereyaanoone.

² Yihudi bi maneenaꞌo daggoochee kuppho, bi yaroo, iraasheenaꞌo kechiibeeti yaroo bi tunetaanoona gutenee bushittinee aalloo (gooroo) Yooseefichone.

³ Israꞌeelichi gutenee bushoo Roobeeli bushiisheenaꞌo: Hanooki, Faali, Hetsirooninaa Kariminane.

⁴ Yoꞌeelichi shiijjereenaꞌo: Bi bushoo Shemayaahi, Shemayaahi bushoo Googi, Googi bushoo Shimeꞌi,

⁵ Shimeꞌi bushoo Miki, Miki bushoo Reꞌayi, Reꞌayi bushoo Baali,

⁶ Baali bushoo Asooree taatoo Tigilaat Fileseeri keccii daammiti Berayahine. Biyoo Roobeeleenaꞌochi iraashoone.

⁷ Boonoshi xibeenaꞌon yechiti mazgaboochee daneti, Roobeeli yoodee yaree iraasheenaꞌo: Yeꞌeeli, Zakaariyaasinaa

⁸ Yoꞌeelichi yaroo, Shemayi bushoochi bushoo, Azaazi bushoo Belaahinane. Bi yareenaꞌo koteto Aroꞌeer, wotta aroochee tiijjiꞌi Neebinaa Baꞌaal Meꞌooninooch beddaahaa beeti showoochiye.

⁹ Gilaadee showoochaa boonoshich gijjoo shiijjee meettitoyich, aabi-keyo waan, Efiraaxisi aacooch beddaahaa beeti barahoon yechiyeete.

¹⁰ Saaꞌoolichi taatee yemeenooba Hagaareenaꞌona tookkii koyeheete. Boonoshin kochii wochii, boonoshi showoon yechiꞌi, Gilaadaa aabi-keyo waan beeti showoo bulliich koteheete.

Gaadichi Shiijjeroo

¹¹ Gaadi yoodo Roobeeli yoodoochi ciinooch, ebiyoo Saleeki katemooch beddaahaa beeti Bashaanee showooch kotehe.

¹² Yoꞌeeli ebi Bashaanee showooch iraashoone; Shafaami biyee deshoone; Yanaayinaa Shafaaxina wotta biyee deshi iraasheenaꞌone.

¹³ Ebi yoodeexi bare yareenaꞌochi qaabbechi shabaatteenaꞌo: Mikaꞌeeli, Meshulaami, Sheebi, Yoraayi, Yakaani, Ziiyinaa Ebeerinane.

¹⁴ Eboshiyoo Buuzi bushoo, Yahiidi bushoo, Yeshiishi bushoo, Mikaꞌeeli bushoo, Gilaadi bushoo, Yaroꞌaahi bushoo, Huuri bushoo, Abihayili bushiisheenaꞌone.

¹⁵ Guuni bushoochi bushoo, Abideli bushoo Ahi boonoshi yareenaꞌochi iraashoone.

¹⁶ Boonoshiyoo Gilaadee showoonaa Bashaanee showoonooch, boonoshi daggooch beeti gishiishi katemeenaꞌonaa Shaaroon beeti mocechi showoo bullinooch kotetinaꞌone.

¹⁷ Yihudee taatoo Yotaaminaa Israꞌeelee taatoo Yeroboꞌaminochi taatee yemeenooba, eboshi bulli boonoshi yari yaree woretoona mazgabooch kobereetinaꞌone.

¹⁸ Roobeelinaa Gaadinochi yoodeenaꞌonaa Minaasi yoodoochee qatinaꞌona daggooch ginee anaaminaꞌo, goraadoon cuyoonaa gaachoon yeshonon hakkiti, maꞌoon awureebeeti, koyoon doyiti, koyoyich qanniti, aabbaa awudde humaa shabaatte ballaa shiche asheenaꞌo beetinaꞌone.

¹⁹ Boonoshiyoo Hagaaree yoodeenaꞌo tuneti Yexuuree asheenaꞌon, Nafishee asheenaꞌonaa Nodaabee asheenaꞌonon kochiyeete.

²⁰ Koyoochaa Yeerin gibeneꞌi, boonoshin bi gaachemmoyich qolleheete. Biyoo boonoshi qolloon waayeꞌi, Hagaareenaꞌonaa boonoshina tookkii ikkottetinaꞌo bullinon boonoshi kishooch beshiiꞌi immiye.

²¹ Boonoshiyoo aache hume gaaleenaꞌon, gutte ballaa aache hume bageenaꞌon, gutte hume kureenaꞌonaa balle hume asheenaꞌonon kecciyeete.

²² Ebi koyo Yeerichi daaggoona koyeeto bi tunetoyich, meeti asheenaꞌon wuxiyeete. Boonoshiyoo kecaa boonoshi hammimmi wottoon are showooch koteheete.

Aabi-keyo Waan Koteti Minaasi Yoodo

²³ Minaasi yoodoochee qatinaꞌo Baꞌaal Hermoon, Seniirinaa Hermooni guudoonooch beddaahaa beeti Bashaanee showooch koteheete. Boonoshiyoo oogichii meettiyeete.

²⁴ Boonoshi yoodee yaree iraasheenaꞌo: Efeeri, Yishi, Eleli, Azireli, Erimiyaasi, Hodawiyinaa Yahidelinane. Eboshi bulli ginee anaaminaꞌo, aricheti asheenaꞌonaa boonoshi yari yaree iraasheenaꞌonane.

Aabi-keyo Waan Koteti Asheenaꞌo Kecaa Hamo

²⁵ Tunebaani asheenaꞌo boonoshi qaabbechinaꞌochi Nuggishoo Doono Yeerin xuqqiyeete. Boonoshi aafoochee Yeeri aalliiti, are showeexi asheenaꞌochi nuggisheenaꞌoyich goyinnee maddeheete.

²⁶ Ebich Israꞌeelee Nuggishoo Asooree taatoo Fuulichi (Biyoo wotta Tigilaat Fileseeri getteehe.) mulloon shuurikkiye. Biyoo waaꞌi Roobeelinaa Gaadinoch yoodeenaꞌonaa Minaasi yoodoochee qatinaꞌonon keccii daammiꞌi, and beddaahaa Halaahee showooch, Habooree showooch, Haraahee showoonaa Gozaani aachi gaꞌoonooch boonoshi kotemmoyich tuniihe.